Amɔsu 4

1

2

3

4

5

6

7

8

9

¹Bɛɛ Sɑmɑrin tɔn kurɔbu, bɛɛ be i dimɔ i bɔriɑmɔ nge Bɑsɑnin nɑɑ gbiibi yi yi wɑ̃ɑ Sɑmɑrin guurɔ, i wɔnwɔndobu dɑm dɔremɔ, i bwɛ̃ɛbwɛ̃ɛbu tɑki dimɔ, mɑ i bɛɛn durɔbu sɔ̃ɔmɔ bu kɑ tɑm nɑ i nɔ. Tɛ̃, i swɑɑ dɑkio i nɔ.

²Nɛ, Yinni Gusunɔ nɑ bɔ̃rumɔ kɑ nɛn tiin yĩsi dɛɛrɑru nɑ mɔ̀, wee sɑɑ yɑ sisi yè sɔɔ bɑ koo bɛɛ kɑ bɛɛn bibun bweseru kɔkɔnu sɔre bu gɑwɑ nge swɛ̃ɛ.

³Bɛɛn bɑɑwure u koo yɑri kururun di kpɑ bu bɛɛ kubɑ sɔ̃ɔ yɛ̃sɑn nɔm geu giɑ. Nɛ, Yinni Gusunɔwɑ nɑ yeni geruɑ.

⁴Yinni Gusunɔ u nɛɛ, bɛɛ Isirelibɑ, i doo yɑ̃ku yee ten mi Betɛliɔ, kpɑ i n mɑn torɑrimɔ. I doo Giligɑliɔ, kpɑ i n mɑn torɑrimɔ nge mɛ̀n nɔɔ i ko kpĩ. I n bɛɛn yɑ̃kunu mɔ̀ bururu bɑɑtere, kpɑ i n kɑ bɛɛn kɛ̃nu nɑɑmɔ sɔ̃ɔ itɑ kɑ sɔ̃ɔ itɑ.

⁵I bɛɛn siɑrɑbun yɑ̃kunu koowo kɑ pɛ̃ɛ ye bɑ seeyɑtiɑ doke. Kpɑ i tɔmbu sɔ̃ mɑ i kɛ̃nu kuɑ kɑ kĩru. Domi yerɑ bɛɛ Isirelibɑ i kĩru bo. Nɛ, Yinni Gusunɔwɑ nɑ yeni geruɑ.

⁶N wee nɑ derɑ gɔ̃ɔrɑ duɑ bɛɛn wuu mɑrosu kpuro sɔɔ. Mɑ i dĩɑnu biɑ bɛɛn yɛnusu kpuro sɔɔ. Adɑmɑ kɑ mɛ, i ǹ gɔsirɑmɛ nɛn mi. Nɛ, Yinni Gusunɔwɑ nɑ yeni geruɑ.

⁷Nɑ yinɑ gurɑ yu nɛ ye n tie suru itɑ bu kɑ dĩɑnu gɛ̃. Nɑ derɑ gurɑ yɑ nɑ wusu gɑsun mi. Mɑ nɑ ǹ wure yu nɛ gɑsun mi. Nɑ derɑ yɑ nɑ gbenu gɑnu sɔɔ. Mɑ nɑ ǹ wure yu nɛ gɑnun mi. Mɑ nu gberɑ.

⁸Yerɑ bɛɛn wusu gɑsun tɔmbu bɑ dɑ wuu gɑgun mi bu kɑ nim wɑ bu nɔ. Adɑmɑ ben nim nɔru gɑ ǹ kpɑ. Kɑ mɛ, i ǹ gɔsirɑmɛ nɛn mi. Nɛ, Yinni Gusunɔwɑ nɑ yeni geruɑ.

⁹Nɑ derɑ bɛɛn dĩɑnu kusenu kuɑ, mɑ twee yi nɑ yi bɛɛn gbeɑn dĩɑnu kɑ bɛɛn dɑ̃ɑ gbɑɑnun wurusu kpuro di. Adɑmɑ kɑ mɛ, i ǹ gɔsirɑmɛ nɛ Gusunɔ bɛɛn Yinnin mi.

¹⁰Nɑ mɑɑ bɛɛ kɛ̃si kɛ̃si bɑrɑru sure nge mɛ nɑ kuɑ Egibitiɔ. Nɑ derɑ bɑ bɛɛn ɑluwɑɑsibɑ go tɑbu sɔɔ. Mɑ bɑ ben dumi mwɛɛrɑ. Nɑ derɑ i bɛɛn tɔn be bɑ gun nuburu nuɑ bɛɛn sɑnsɑniɔ. Adɑmɑ kɑ mɛ, i ǹ gɔsirɑmɛ nɛn mi.

¹¹Nɑ bɛɛ surɑ nɑ kɔsukɑ nge Sodomu kɑ Gomɔrɑ ye nɑ kɑm koosiɑ. Mɑ i kuɑ nge dɑ̃ɑ nɔɔ ge bɑ wunɑ dɔ̃ɔn di. Adɑmɑ kɑ mɛ, i ǹ gɔsirɑmɛ nɛ, Yinni Gusunɔn mi.

¹²Yen sɔ̃nɑ bɛɛ Isirelibɑ kon bɛɛ sɛɛyɑsiɑ. Ǹ n mɛn nɑ, i n sɔɔru sɑ̃ɑ i n kɑ nɛ Gusunɔ bɛɛn Yinnin siribu mɑrɑ.

¹³Domi nɛnɑ nɑ guunu mɔmɑ, mɑ nɑ woo tɑkɑ kuɑ. Nɑ rɑ nɛn bwisikunu tɔnu giɑsie. Nɑ rɑ mɑɑ yɑm bururɑm gɔsie yɑm wɔ̃kuru, kpɑ nɑ n sĩimɔ guunu wɔllɔ. Nɛn yĩsirɑ Gusunɔ wɔllu kɑ tem Yinni.