Agoago Podo 6:1-20

¹Dagu dama daane, e hai behee? Goe gu hagababa bolo e hui di boibana o tangada dela i golo?

²E hai behee? Goe gu daahi go au helekai donu? Guu kumi go au hagababa ne hai?

³Deenei laa, dagu dama nei, goe gu i lala nia mogobuna o tangada deelaa. Malaa, deenei dau hai e doo iei goe gi daha mo di maa: hana hagalellele gi mee, dangidangi gi mee gi hagamehede ina goe.

⁴Goe hudee kii be hagamolooloo.

⁵Lele gi daha mo di hele, lele be di ee dela e lele gi daha mo tangada puu manu.

⁶Nia daangada hagatoo, kabe ina nia hangahaihai o nia loada ala e mouli ai!

⁷Digaula di nadau dagi e dagi ginaadou ai.

⁸Gei digaula e benebene nadau meegai i di madagoaa dela e mahanahana gi togomaalia gi di madagoaa magalillili ma gaa dae mai.

⁹E waalooloo behee taane hagatoo dono kiikii hua? Mee e duu i nua ma gaa hee?

¹⁰Ana helekai e hai boloo, “Au ga habini ogu lima ga kii laa, e haga molooloo haga dulii.”

¹¹Malaa, di madagoaa hua dela e kii iei mee, di hagaloale gaa tale ang gi mee, ga heebagi gi mee gadoo be tangada gaiaa.

¹²Balu daangada huaidu e helehelekai tilikai.

¹³Digaula e gemugemu mo di haga hagailoo gi nadau wae mo nadau lima, e halahalau goe.

¹⁴I nia madagoaa huogodoo, digaula e bilabilaan huaidu i lodo nadau hagamamaanadu, e haga logo nia haingadaa i nia madagoaa huogodoo.

¹⁵Di haingadaa damana gaa tale ang gi digaula i di ingoo hua di madagoaa, gei digaula ga lauwa kono.

¹⁶Aanei la nia mee e hidu Dimaadua e de hiihai ginai, hagalee hai gii hai: tangada e bida hagalaamua ia, tolole hai kai tilikai, nia lima ala e dadaaligi nia daangada nadau ihala ai, di libogo haga maanadu huaidu, nia wae ala e limalima di haele e hai nia mee huaidu, tangada hagadootonu e tataanga nia kai tilikai, mo tangada e hai nia daangada gi hagawelewele i nadau mehanga.

²⁰Dagu dama daane, heia nia mee o do damana ne hagi adu, hudee de langahia nia mee o do dinana ne aago adu.