Dagiti Proverbio 6:1-20

¹Anakko, no nangilasinka iti kuartam kas pammatalged iti utang ti kaarrubam, no nagkarika para iti utang ti maysa a tao a saanmo nga am-ammo,

²nangipakatka ngarud iti palab-og ti bagim babaen iti karim, ket natiliwka babaen kadagiti sasaom.

³Iti kasta ngarud, anakko, aramidem daytoy ket isalakanmo ti bagim, ta addaka iti babaen ti asi ti kaarrubam. Mapanmo ipakumbaba ti bagim ket ipakaasim iti kaarrubam a wayawayaannaka.

⁴Saanmo nga iridridep dagiti matam ken saanmo pagkidemen dagiti kalub ti matam.

⁵Isalakanmo ti bagim a kas iti ugsa manipud iti ima ti mangnganup, kas iti billit manipud iti ima ti sumisilo.

⁶Kitaem ti kuton, sika a sadut a tao, utobem dagiti wagasna ket agmasiribka.

⁷Awan ti mangidadaulo iti daytoy, opisial wenno turay,

⁸ngem mangisagsagana daytoy iti taraon iti kalgaw, ken kabayatan ti panagapit ket mangiduldulin daytoy iti kanennanto.

⁹Kasano pay aya a kabayag ti pannaturogmo, sika sadut a tao? Kaanokanto pay a mariing manipud iti pannaturogmo?

¹⁰“Iturogko pay bassit, iridepko laeng iti mabiit, idalikepkepko pay biit”-

¹¹ket umayto ti kinakurapaymo a kas iti agtatakaw ket dagiti kasapulam a kasla nakaarmas a suldado.

¹²Ti awan pategna a tao - ti nadangkes a tao - ket agbibiag babaen iti kinaulbodna,

¹³a kumanidday, sumanenyas babaen kadagiti sakana, ken agitudo-tudo babaen kadagiti ramayna.

¹⁴Iti pusona ket agpangpanggep isuna iti dakes babaen iti panangallilaw; kanayon isuna a mangparnuay iti riri.

¹⁵Ngarud, apagdarikmatto a kamaten isuna ti pannakadidigrana; apagkanitonto a madadael isuna ket saanen nga umimbag.

¹⁶Adda innem a banag a kagurgura ni Yahweh, adda pito a makarimon kenkuana:

¹⁷Dagiti mata ti napalangguad a tao, dila nga agul-ulbod, im-ima a mangpaspasayasay iti dara dagiti inosente a tattao,

¹⁸puso a mangparpartuat kadagiti dakes a panggep, saksaka a napartak a tumaray a mapan agaramid iti dakes,

¹⁹saksi a mangibagbaga kadagiti inuulbod, ken ti agparparnuay iti riri kadagiti agkakabsat.

²⁰Anakko, tungpalem ti bilin ti amam, ken saanmo a baybay-an ti sursuro ti inam.