1Bena Solomon ese Iehova ena dubu na Ierusalem ai e haginia matama, Moria ororona ai; una gabu ai Iehova ese ia tamana David e hahedinarai henia, bena David ese una gabu e abia hidi, Oronana, tau Iebusu, ena uit ikwadina gabuna ai.
2Ena lohia laḡanina ihahanina huana iharuana ai, ia ese e haginia matama.
3Solomon ese Dirava ena dubu badidia na ini e karadia toma: latana na kiubit tauratoi-ahui (una na sene edia kiubit), bona lababana na kiubit ruahui.
4Dubu vairana kahana dehena ena lata na kiubit ruahui, dubu lababana heḡereḡerena; bona harana latana na kiubit sinahu-ta ruahui. Laloma kahana na gold ḡoeva-daena amo e ḡovaia.
5Dubu laloikoudia na beroso audia, gold ḡoeva-daena amo e ḡovadia, bona heraheradia e kara, pamu audia bona gold varodia.
6Dubu na dava-bada nadidia namohereadia amo e haheraia; bona gold na Paravaimi gold-na.
7Taunabunai, ia ese dubu idoinai, lavadia bona raka-vareai audia bona habadia bona iduaradia, na gold amo e ḡovadia; bona haba ai na kerubi e korodia.
8Bena ia ese helaḡa-herea gabuna e karaia; ena lata, dubu lababana heḡereḡerena, na kiubit ruahui, bona ena lababa na kiubit ruahui; bena gold ḡoeva-daena talent sinahu-tauratoi amo e ḡovaia.
9Ikoko metaudia na gold sekele imahui. Atai daiutudia danu na gold amo e ḡovadia.
10Helaḡa-herea gabuna ai ia ese kerubi rua au amo e korodia, bona gold amo e ḡovadia.
11Kerubi ruaosi hanidia e toi roro negana ai edia lata idoinai na kiubit ruahui. Kerubi ta hanina ta, ena lata na kiubit ima, be dubu habana ai e hetomu kau, ma hanina ta, ia danu ena lata na kiubit ima, be kerubi iharuana hanina ida e hetomu heheni;
12bona una kerubi hanina ta, ena lata na kiubit ima, be dubu habana ai e hetomu kau, ma hanina ta, ia danu ena lata na kiubit ima, be kerubi gini-gunana hanina ida e hetomu heheni.
13Hari kerubi ruaosi hanidia edia lata idoinai na kiubit ruahui; kerubi na aedia ai e gini, dubu e vaira henia.
14Ia ese seseahu na dabua vaiunna bona mia-kakana bona kakakakana bona aukana amo e karaia, bona kerubi laulaudia na seseahu dabuana ai e turi kau.
15Dubu vairanai ia ese au-tubua rua e kara, edia lata na kiubit toi-ahui ima; bona ta ta doridia ai kwara ikorodia e kara, edia lata na kiubit ima.
16Bena auri varodia e kara, ageva na heto, au-tubua doridia ai e atodia. Rimono huahuadia laulaudia sinahu-ta danu e kara, hari auri varodia ai e hakamo kau.
17Unu au-tubua na dubu vairanai e haginidia, ta diho kahana ai bona ta mirigini kahana ai; diho kahana ḡauna ladana e hatoa lakin, bona mirigini kahana ḡauna ladana e hatoa Boa.
