1Hein netuenan ni Ishboshet, he anak ni Saul, he midhimetayan si Abner ziyà te Hebron, utew nahandek sikandin wey is langun he tig-Israel.
2Duen dezuwa he sakup ni Ishboshet he iyan mibpengulu te kedsurung diyà te inged te menge kuntada zan. Si Baana wey si Recab. Menge anak sikandan ni Rimon he tig-Beerot, he ebpuun te tribu ni Benjamin. Heini is Beerot sakup te Benjamin,
3su is nehuna he mid-ubpà kayi ne mibpemelaǥuy zan diyà te Gitaim, ne taman guntaan dutun dan en he meǥinged te kenà kandan he tanà.
4Gawas ki Ishboshet duen pa kevuwazan ni Saul he nesamà he iyan si Mefiboshet, he anak ni Jonatan. Lelime en he tuig is penuiǥen din te kebpatey ni Saul wey si Jonatan diyà te Jezreel. Hein netuenan duen te egahat ki Mefiboshet he minatey en si Saul wey si Jonatan, migègaanan din enawa sikandin ne mibpelaǥuy. Dutun te utew zin kegkezeǥusu he ebpelaǥuy, nelekaan din haazà is batà umbe nehimu he begelid heini.
5Ne sevaha he andew, midhendiyà te valey ni Ishboshet si Recab wey si Baanah he menge anak ni Rimon he tig-Beerot. Neudtu zutun is andew te kebpekeuma zan; si Ishboshet ne ebperperenggey.
6Ne midseled dan su uvag kun egkuwa zan te trigu. Ne midseled sikandan diyà te ruǥu ni Ishboshet ne zutun sikandin te katri zin edhidhizeǥà ne segugunè dan dunggava ziyà te getek. Ne midtamped dan is lieg din ne migkuwa zan is ulu ne mid-uwit dan te ebpelaǥuy ne ziyè dan mebayà te Araba te tivuuk he mezukilem.
8Hein nekeuma zan diyà te Hebron, mid-uwit dan is ulu ni Ishboshet diyà te ki David he ke sikandan te, “Heini en is ulu ni Ishboshet he anak duen te kuntada nu he si Saul he edhimatey pezem kenikew. Iyan is Nengazen mibales diyà te ki Saul ǥuntaan wey ziyà te menge kevuwazan din para kenikew.”
9Midtavak ni David sikandan te, “Egkeǥiyen ku keniyu is tutuu kayi te etuvangan te uuyag he Nengazen he iyan midluwas kedì te langun he ebpekekaid.
10Duen etew he midhendiyà te kedì diyà te Ziklag he nenudtul te minatey si Saul. Mid-isip din he igkesuat ku is kedtudtuli zin kedì. Piru impezakep ku sikandin ne midhimetayan ku. Iyan haazà suhul ku kandin te tudtul zin kedì.
11Guntaan, sikiyu is menge mezaat is menge ulaula edsilutan ku sikiyu te subra pa kayi, su midhimetayan niw is etew he wazè din salà, he ziyè dà edhidhizeǥà te keugelingen din he valey zutun te hizeǥeey zin. Ebpeveyazan ku heini keniyu is kedhimetayi niw kandin para mahanew kew zaan kayi te kelibutan.”
12Umbe, mibmenduan ni David is menge sakup din he ibpehimetayan si Recab wey si Baana. Ne midtuman dan haazà. Midpenamped is menge velad wey is menge paa zan ne imbitey is lawa zan diyà te peneng diyà te Hebron. Migkuwa zan is ulu ni Ishboshet ne inleveng dan diyà te midlevengan ki Abner ziyà te Hebron.
