1Neuma is timpu he iyan tinghipanew te menge hadì te kebpekidtebek, wazà mulà medhipanew si David, diyè dà sikandin mebpelintetaǥak te Jerusalem. Iyan din dà impehipanew te kebpekidtebek si Joab, wey is menge upisyal zin, wey is langun he menge sundaru te Israel. Nezaag eni Joab is menge Amunihanen ne midlingutan dan is Raba.
2Hein sevaha he mahapun dutun te meǥaan en edsanlep is andew, mid-enew si David ne midhiphipanew zuen te patag he atep te turuǥan din. Dutun te ebpememantew sikandin, neehè din diyà te zizalem is utew metaid he vahi he ebpemeziǥù.
3Midsuǥù si David te ibpaahà haazà ke hentei he vahi. Ne midtudtulan sikandin te haazà he vahi ne si Batsheba, he anak ni Eliam wey esawa ni Uria he Hitihanen.
4Ne zutun impekuwa ni David si Batsheba. Ne hein nekeume en sikandin diyà te ki David, ne mibpehulizè dan. (Beveǥu pa zutun he nepasad ni Batsheba is tulumanen te kebpenlumpiyu tenged te vinulan he ebpekeuma te vahi.) Nepasad dutun is kebpekedhulid dan ne mid-ulì sikandin.
5Wazà meuǥet ne egkeǥezam ni Batsheba he meǥingey en sikandin, ne mibpenelaan sikandin he ebpetudtulan si David he meǥingey sikandin.
6Umbe, mibpeuwit si David te lalag diyà te ki Joab he ibpehendiyà si Uria he Hitihanen te kandin. Umbe impehendiyà ni Joab si Uria te ki David.
7Hein nekeuma si Uria, mid-insaan ni David sikandin te kemusta si Joab, is menge sundaru, wey is kebpekidtebek dan.
8Ne migkeǥiyan ni David sikandin te, “Ulì ke en diyà te valey nu, wey medhimeley.” Ne mid-awà si Uria zutun te turuǥan ne mibpeuwit si David te gasa ziyà te valey ni Uria.
9Piru wazà med-uli si Uria, kekenà, diyè dà sikandin medlipezeng te ǥemawan te turuǥan duma is menge suluǥuen dutun te egalen din he si David.
10Hein netudtulan si David he wazà med-ulì si Uria, impetawag din ne mid-insaan din te, “Maan is wazè ka med-uli? Neuǥet en he wazè ka mekeulì diyà te keniyu.”
11Midtavak si Uria te, “Sikan is Kavan te Kebpekid-uyun wey is menge sundaru te Israel wey Juda diyà te kampu zan diyà te menge suǥud, ne zutun daan is peremandar zey he si Joab wey is menge upisyal zin. Ebpekehimu e pe be he ed-ulì te kegkaan, ked-inum, wey te kedhulid te esawa ku? Ibpenangdù ku kenikew he kenè ku egkeulaula is iring keniyan.”
12Migkeǥiyan ni David sikandin te, “Pelintetaǥak ke zà dèpa kayi te senge kezukileman, ne keeselem ibpelikù ku sikew ziyà te kampu.” Ne zutun mebpelitetaǥak si Uria te haazà he andew ziyà te Jerusalem. Dutun te sunud he andew,
13midhinggat sikandin ni David he megkaan wey med-inum duma kandin, ne midhubug sikandin ni David. Piru haazà he kezukileman wazè ded sikandin mekeulì, kekenà, nekeuman ded sikandin mekelipezeng duma kes menge suluǥuen ni David.
14Meselem dutun, midsurat si David pehendiyà te ki Joab he impeuwit din ki Uria.
15Iyan heini taǥù dutun te surat din: “Iyan ibpehuna si Uria, emun hendei is dekelà he tebek, ne ewai niw en para mepatey sikandin.”
16Dutun te kemulu en edlinguti eni Joab is Raba, ne ziyè dan ipezapit si Uria te lugar he zutun is menge melig-en he menge sundaru te menge kuntada.
17Nemenggawas haazà is menge sundaru zutun te inged ne mibpekidtebek dan, ne nepatey zutun si Uria wey is duma pa he menge sundaru ni David.
18Mibpeuwit si Joab te tudtul ziyà te ki David mehitenged te langun he nehitavù te tebek.
19Midteleenan din haazà is ibpepenudtul te, “Emun egkekaǥi nu en diyà te hadì is mehitenged te tebek,
20kela ke egkepauk sikandin ne ed-insaan ke zin te, ‘Maan is mid-uvey kew utew zutun te inged is ebpekidtebek? Wazè niw ve metueni he egkesaut kew man te panè dan puun te verengbeng dan?
21Kenè niw ves egketenuzan ke hengkey is ingkepetaya ki Abimelec he anak ni Jerubeshet diyà te Tebez? Kenè be iyan impatey zin is mid-uluǥan te vahi te ǥelingan he vatu puun diyà te zivavew te verengbeng, ne minatey sikandin? Maan is utew kew mid-uvey zutun te verengbeng?’ Ne emun iyan heini ibpenginginsè din, ne keǥiyi nu en sikandin te, ‘Nepatey kes suluǥuen nu he si Uria he Hitihanen.’ ”
22Migenat haazà is ibpepenudtul, ne hein nekeume en sikandin diyà te ki David ne midtudtulan din te langun he intelaan kandin ni Joab.
23Migkeǥiyan din si David te, “Midsurung key te menge kuntada ziyà te menge suǥud, piru mibpenlayas dey sikandan he edlikù diyà te pultahan te inged dan.
24Ne mibpanè key te tigpanè dan he ziyà te verengbeng, ne zuen nengepatey he zuma he menge sundaru nu ne naapil is suluǥuen nu he si Uria he Hitihanen.”
25Migkeǥiyan ni David haazà is mibpenudtul te, “Keǥiyi nu si Joab he kenà meseeng te nehitavù, su kenè ta egketuenan ke hentei is egkepatey ziyà te tebek. Keǥiya nu he mebpekelig-en sikandin, ne pedeyuna zin te edsurung haazà is inged taman te egkezezeetan heini.”
26Hein netuenan ni Batsheba he nepatey si Uria is esawa zin, ne midlalew sikandin.
27Neiwas is kedlalew zin, ne impekuwa sikandin ni David ne mid-uwit din diyà te turuǥan din. Mid-esawa sikandin ni David, ne wazà meuǥet ne mid-anak sikandin te maama. Piru wazà mesuat is Nengazen te mibeelan ni David.
