1Dutun te kedhadì ni David, duen nehitavù he vitil seled te tetelu he tuig. Ne zutun nekidlalag si David diyà te Nengazen. Migkaǥi is Nengazen te, “Neulaula is bitil tenged te kebpenhimetayi ni Saul wey te pemilya zin te menge Gibyunhen.”
2Kenà heini sikandan Israilihanen, kekenà, iyan heini kes nengesamà he menge uuyag te menge Amorihanen. Impenaad te menge Israilihanen he kenè dan en sikandan edhimetayan, piru si Saul, duen planu zin te kegeraa kandan tenged te igkeipeng din is Israel wey Juda. Impetawag ni David is menge Gibyunhen
3Ne mid-insaan din te, “Hengkey is ebeelan ku keniyu para meveyazi is salà ni Saul he mibeelan din keniyu? Keǥiya niw kedì, para tuvazi en maan te Nengazen is keet-etawan din.”
4Midtavak is menge Gibyunhen te, “Kenà egkeveyazan te selapì wey ke vulawan is kegkeepesi zey ki Saul wey te pemilya zin. Wazè dey zaan ketenged te kedhimatey te minsan hentei kayi te Israel gawas ke edtuǥutan key kenikew.” Mid-insà si David te, “Na, hengkey is egkesuatan niw he ebeelan ku para keniyu?”
5Midtavak sikandan te, “Egkesuatan ni Saul he meǥerè key para wazè en egkesamà kenami kayi te Israel.
6Umbe, iveǥey niw kenami kes pitu he menge kevuwazan din he menge maama, su edhimetayan dey sikandan, ne kenà id-awà is menge lawa zan diyà te egkesevukan dan he uvey te ed-ezapan te Nengazen diyà te Gibea, he inged ni Saul he mibpilì te Nengazen he hadì,” midtavak haazà is hadì te, “Uya ibeǥey ku en sikandan keniyu.”
7Piru si Mefiboshet is anak ni Jonatan he apù ni Saul ne wazà mulà iapil ni David te ebeǥey kandan, tenged te penangdù dan ki Jonatan diyà te etuvangan te Nengazen.
8Iyan imbeǥey zin is dezuwa he anak ni Saul he si Armoni wey si Mefiboshet, he anak ni Rizpa he anak ni Aya. Imbeǥey zaan ni David is lelima he anak ni Merab he menge maama. Si Merab anak ni Saul he esawa ni Adriel he anak ni Barzilai he tig-Mehola.
9Imbeǥey sikandan ni David te menge Gibyunhen ne midhimetayan sikandan is pitu ziyà te vuvungan he uvey te inged he zutun ed-ezapa is Nengazen. Ne wazè en welenga zutun is menge minatey he lawa zan. Neulaula heini timpu te kebpuun ked-eǥani te barli.
10Ne si Rizpa is anak ni Aya ne migkuwa te saku ne indempas din dutun te vatu su edhidhizeǥaan din. Su ebentayan din haazà is minatey he lawa para kenà mekaan te menge tagbis emun maandew, wey ke mezukilem ne kenà daan egkekaan te menge langgam diyà te ketelunan. Dutun sikandin med-ubpà puun pa te kebpuun te ting-eǥani taman te ked-uzan.
11Hein netudtulan si David te mibeelan ni Rizpa he esawa ni Saul,
12midhendiyà sikandin te menge meǥinged te Jabesh Gilead ne mibuyù din is menge tulan ni Saul wey anak din he si Jonatan. (Hein nepatey en si Saul wey si Jonatan te kebpekidtebek dan te menge Filistihanen diyà te Gilboa, ne imbitey te menge Filistihanen is minatey he lawa zan diyà te pelasa te Bet Shan, ne wazà petueni te menge tig-Jabes Gilead he migkuwa zan haazà is minatey he lawa.)
13Ne mid-uwit ni David haazà is menge tulan ni Saul wey ni Jonatan, inragkes din daan is menge tulan dutun te pitu he mibpehimetayan te menge Gibyunhen.
14Ne impeleveng din heini te menge sakup din diyà te midlevengan te amey ni Saul he si Kish diyà te inged he Zela ziyà te Benjamin. Netuman is langun he insuǥù ni David. Ne hein nepasad dutun, ne midtavak te Megbevayà is menge ked-ampù dan he meengked en is bitil zutun te nasyun dan.
15Neuma is timpu zutun he mid-uman medtebek is menge Filistihanen wey menge Israilihanen. Ne zutun te kebpekidtebek ni David wey te menge sakup din, ne utew sikandin neluǥat.
16Si Ishbi Benob he Filistihanen, utew zekelà he etew; sevaha sikandin he menge kevuwazan te menge Ripanhen, ne egkesuatan din te edhimatey si David. Is purù te vangkew zin ne brunsi ne heepat he kilu is keveǥat dutun, ne zuen daan beǥu he ispada zin.
17Meupiya su nekeuma si Abishai he anak ni Zeruya is edtavang ki David, ne nepatey zin haazà is Filistihanen. Ne migkeǥiyan si David te menge sakup din te, “Kenè key en ebpemineg ke ed-uman ka eduma kenami te kebpekidtebek. Iring ka te sulù te Israel, ne kenè key egkesuat he maawè ka.”
18Nepasad dutun, mid-uman en maan medtebek is menge Filistihanen wey menge Israilihanen, ne ziyà heini meulaula te Gob. Kayi he tebek ne nepatey ni Sibecai he tig-Husha si Saf he sevaha te menge kevuwazan te menge Ripanhen.
19Ne zuen pa sevaha he kedtebek dan diyà te Gob, ne nepatey ni Elhanan he anak ni Jaare Oregim, he tig-Betlehem, si Goliat he tig-Gat. Is bangkew zin ne meveǥat wey mekepal.
20Mid-uman en maan medtebek is menge Filistihanen wey menge Israilihanen; diyà heini meulaula te Gat. Kayi he tebek, duen etew he utew zekelà, he tig-heenem is kemer te kada velad wey paa zin. Sevaha zaan sikandin he menge kevuwazan te menge Rafa.
21Hein mid-undaunda zin is menge Israilihanen, ne midhimetayan sikandin ni Jonatan he anak te suled ni David he si Simea.
22Haazà is heepat he utew dezekelà he menge Filistihanen he menge kevuwazan te menge Rafa he tig-Gat. Mibpenhimetayan sikandan ni David wey te menge sakup din.
