1Ka tjiṉṯu kutjupa Saulalu palumpa katja Jonathannga munu palumpa maḻpa tjuṯa kuḻu aḻṯingu munu tjanala wangkara wituwituningi Davidanya iluntankunytjaku. Palu Jonathannga panya Davidaku puḻkaṟa mukuringkupai.
2Munu paluṟu ankula Davidala ma-tjakultjunu, “Ngayuku mama mukuringanyi nyuntunya iluntankunytjikitja, ka nguḻu nyangama munu mungawinki ankula putingka nyara kumpiṟa nyinama, kaṉa ngayuku mama nyuntula itiwanungku ma-katiku, munuṉa nyuntunyatjara palula tjapilku, munuṉa paluṟu wangkanytja nyuntulalta maḻa tjakultjunkuku.”
4Munu mungawinki Jonathantu mulapaṯu mamangka panya wangkangu, “Nyaanguṟuṉa Davidanya iluntankuku? Panya paluṟunta rawa mulatu nyuntunya alpamilaningi. Wanyu paluṟu kutjupa kutjupa nyuntumpa ngunti palyaṉu? Wiya alatjiṯu. Kaṉa nyaanguṟulta iluntankuku?” Munu paluṟu wiṟu tjuṯa Davidanyatjara palula wangkangi alatji, “Kulila Mama! Davidalu panya nguḻu wiyangku alatjiṯu wati panya Kalaitjanya iluntanu, ka nyara palulanguṟulta nganaṉanya Mayatja Godalu alpamilaṉu nganaṉa Israelkunu tjuṯangku tjaultji Pilitjiyanya nguraṟa tjuṯa pungkula wiyantjaku, ka panyan nyakula puḻkaṟa alatjiṯu pukuḻaringu.”
6Ka katjangku panya wangkanytja Saulalu kuliningi munu paluṟu Mayatja Godala miṟangka kalkuṉu Davidanya iluntankunytja wiyangku wantinytjikitjangku.
7Ka maḻalta Jonathantu Davidanya aḻṯira tjakultjunangi Saulalu panya wangkara kalkuntja. Munu palulanguṟu katingu Saulaku ngurakutu, ka Davidanya palumpa ngurangka piṟuku waṟkaringi, panya paluṟu ngaṉmanypa waṟkarinytja puṟunypa.
8Palu pika panya paluṟu piṟukulta pakaṉu Pilitjiyanya nguraṟa tjuṯaku. Ka Davidanya Israelku tjaultji tjuṯatjara anu, munuya tjuṯa mulapa pungkula iluntaṟa wiyaṉu, kaya paluṟu tjana puḻkaṟa nguḻuringkula nguḻu wirtjapakaṉu.
9Ka tjiṉṯu kutjupa mamuku kurunpa Mayatja Godalanguṟu Saulala tjarpangu munu palunya kura kulintjaku palyaṉu. Ka paluṟu ngura palumpangka nyinara kuḻaṯa maṟangku witiṟa kanyiningi, ka Davidalu puṉu panya kita palumpa wangkatjinganingi.
10Ka Saulalu kuliningi, “Kuwariṉa palunya wakaṟa alatjiṯu wallpangka tjakatjunanyi.” Munu kuḻaṯa panya Davidalakutu ma-waṉingu palunya wakaṟa iluntankunytjikitjangku, palu Davidanya mapalku tjirkaṉu, ka wallpa kutju wakaṉu, ka paluṟu wirtjapakaṉu.
11Ka munga nyara palulalta Saulalu wati tjaultji tjuṯa wituṟa iyaṉu Davidaku ngurakutu mungangka nyakula tjiṉṯuringkula mungawinki pakannyangka palunya iluntankunytjaku. Palu Davidaku kuringku Mikalalu nintingku kuliningi munu palula wangkangu, “Mapalku ara mungangkaṯu. Palu ankunytja wiyangku wantirampan, kanta kutjupangku mungawinki pakannyangka nyakula iluntankuku.”
12Alatji paluṟu tjakultjunangi munu palulanguṟu palumpa kuri window-wanungku walatjunu mantakutu, ka kumpiṟa anu, kaya puṯu nyangu.
13Ka Mikalalu palumpa watiwati puṉunguṟu palyantjitja mantjiṟa Davidaku mantarangka tjarpatjunu, munu palumpa pulampa piitangka tjarpatjunu, munu nanikutaku inyu tjunu watiwatiku katangkalta mangka puṟunyarinytjaku.
14Ka mungawinki Saulalu wati tjaultji tjuṯa iyaṉu Davidanya witiṟa palulakutu ngalya-katinytjaku. Ka tjana ma-wirkankunyangka Mikalalu nyakula tjanala wangkangu, “Davidanya pikatjara ngarinyi piitangka.” Kaya maḻaku anu Saulalakutu witintja wiyaṯu.
15Palu Saulalu tjananya piṟuku maḻakungku wituṉu, “Ankulaya ngalya-kati piita winki, kaṉa ngayulu palunya iluntara.”
16Kaya mulapaṯu tjaultji panya tjuṯa maḻaku anu Davidaku waḻikutu munuya tjarpara nyangu watiwati piitangka ngarinyangka nanikutaku mangkatjara.
17Ka Saulalu kuliṟa Mikalala wangkangu, “Utiṉin panyatja tjukaṟurungku wangkama ngayula, palu walatjuṟan iyaṉu ngayuku mirpaṉtju.” Ka Mikalalu mamangka panya ngunti wangkangu, “Davidaluṉi alpamilantjaku wangkangu. Alatji paluṟu wangkangu, ‘Nyuntun ngayunya alpamilantja wiyangku wantirampa, kaṉanta iluntankuku.’”
18Ka nyara palulanguṟulta Davidanya wirtjapakaṉu tawunu ini Raamalakutu Samuelnga nyakunytjikitja. Munu palula wirkaṟa tjakultjunu Saulalu uwankara palunya palyantja. Munu pula tjunguringkula anu waḻi Nayatjalakutu munu pula ngura nyara palulalta ma-nyinangi, Davidanya pula Samuelnga.
19Ka kutjupangku nyakunytjatjanungku Saulala tjakultjunu panya Davidanya ngura Nayatjala nyinanytja Raamala.
20Ka Saulalu piṟukuṯu wati tjaultji tjuṯa wituṉu Davidanya witiṟa maḻakungku ngalya-katinytjaku. Kaya mulapaṯu wirkanu, munuya nyangu Samuelnga tjananya wati wangkatjara kutjupa tjuṯa kuḻu Godaku tjukurpa nyinara wangkanyangka. Samuelnga panya palumpa tjanampa mayatja nyinangi. Ka Godaku kurunpa wati panya Saulaku tjungutja tjuṯangka tjarpangu munu tjananya kuḻu wangkanytjaku palyaṉu, kaya tjana kuḻu wangkangi Godaku tjukurpa.
21Kaya tjukurpa nyanga palunya aṉangu tjuṯangku Saulala tjakultjunu, ka paluṟu piṟukuṯu tjaultji kutjupa tjuṯa iyaṉu, ka nyara paluṟu tjana kuḻu tjunguringkula wangkangi Godaku tjukurpa. Ka piṟukuṯu iyaṉu, kaya palu puṟunyaringu.
22Ka palulanguṟu Saulanyalta anu palula tjanalakutu ngura panya Raamalakutu munu mina tjuṉu puḻkangka ma-wirkanu ngura ini Tjikula munu aṉangu tjuṯangkalta tjapinu, “Yaaltji Samuelnga pula Davidanya?” Kaya wangkangu, “Nyaratja pula nyinanyi, waḻi nyara Nayatjala ngura panya Raamala.”
23Ka Saulanya anu Nayatjalakutu, ka iwarangka ankunyangka Godaku kurunpa palula mapalku tjarpangu, ka paluṟu kuḻu wangkaṟinangi Godaku tjukurpa tjana puṟunytju Nayatjalakutu ankula.
24Munu ngura palula ma-wirkaṟa mantara paluṟunku araltjaṟa waṉingu munu mantangka nikiti ngarira ma-mungartjirira ma-mungaringkula ma-tjiṉṯuringu, munu paluṟu Samuelta miṟangka rawangku wangkangi Godaku tjukurpa. Kaya aṉangu tjuṯangku nyakula urulyaraṟa kuliningi, munuya wangkangi, “Mulapa nyangatja Saulanyampa wangkatjararingu?”
