1Ka paluṟu pula wangkara wiyaringkunyangka Saulaku katja Jonathannga Davidaku maḻparingu munu paluṟu Davidaku puḻkaṟa alatjiṯu mukuringangi.
2Ka tjiṉṯu nyanga palulanguṟu Saulalu palunya rawangku kanyiningi mamakutu iyantja wiyangku.
3Ka Jonathannga Davidaku puḻkaṟa mukuringkula palunya kalkuṉu pula tjungu maḻpaṟara tiṯutjara nyinanytjikitjangku.
4Munu palulanguṟu kuuta aṉangitja araltjaṟa Davidanya ungu, mantara panya pikakitja paluṟu tjarpapainya kuḻu, munu tjula waṟa, punaṟa, pilta kuḻu palunya ungu.
5Ka Saulalu Davidanya rawangku iyaningi tjaultji tjuṯatjara ankula aṉangu kutjupa tjuṯangka pikaringkunytjaku mirpaṉtju panya tjuṯangka. Kaya paluṟu tjana tiṯutjarangku alatjiṯu pungkukatingi. Ka palulanguṟu Saulalu Davidanya ngurkantaṟa tjunu palumpa tjaultji tjuṯa mayatjangku kanyintjaku, kaya wati tjaultji tjuṯa palumpa puḻkaṟa pukuḻaringi, munuya palumpa tjanampa mayatja-mayatja tjuṯa kuḻu palumpa pukuḻaringi.
6Ka Davidalu Kalaitjanya iluntankunyangka maḻangka tjaultji panya tjuṯa ngura walytjakutu walytjakutu anangi. Kaya Saulanya tjana ngura tjuṯangka wirkankunyangka minyma tjuṯa tjanampa nyakula puḻkaṟa pukuḻarira mirawaṉingi, munuya inma pukuḻṯu inkara nyaṉpiṟa wangkatjingaṟa waḻkuningi.
7Alatjiya wangkara inkangi, “Saulalu warmaḻa tjuṯa iluntanu tjinguṟu nampa nyangatja 1,000, palu Davidalu mungilyi mulapa iluntanu nampa nyangatja 10,000!”
8Ka Saulalu inma nyangatja kulinu munu puḻkaṟa mirpaṉaringu, munu unngu kuliningi, “Ai! Davidanyaya nyangantu puḻkaṟa mirawaṉinyi paluṟu winki nyaṟuntja ngayula muṉkara. Tjinguṟuya mukuringanyi Davidaku mayatjarinytjaku ngayuku aṟangka.”
9Munu palulanguṟu Saulanya Davidaku nyaṟaringangi munu paluṟu palunya tiṯutjarangku nyakula aṟuningi.
10Ka tjiṉṯu kutjupa Godalu piṟuku mamuku kurunpa walatjunu mayatja panya Saulalakutu, ka palula kurunta unngu tjarpangu munu palunya kuraṟa pungangi, ka paluṟu kawakawaringkula waḻi palumpangka unngu para-ngaṟala mirangi. Ka Davidalu Saulaku waḻingka kita wangkatjinganingi, panya paluṟu rawangku alatjinkupai. Ka Saulalu kuḻaṯa maṟangku kanyiningi,
11munu unngu kuliningi, “Kuwariṉa palunya wakaṟa alatjiṯu wallpangka tjakatjunanyi.” Munu paluṟu kuḻaṯa panya Davidalakutu ma-waṉingu kutjara-aṟangku, ka paluṟu tjirkaṉu ka aḻa wakaṉu.
12Ka Mayatja Godanya Davidala tjungu nyinangi, palu Saulanya paluṟu wantikatingu. Ka palulanguṟu Saulanya Davidaku nguḻuringangi.
13Munu paluṟu Davidanya tjunu tjaultji 1,000-ku mayatjarinytjaku munu palunya tjananya wituṟa iyaṉu ankula mirpaṉtju panya tjuṯangka pika pungkunytjaku.
14Ka Mayatja Godanya Davidala tjungu nyinanyangka paluṟu tjana mirpaṉtju panya tjuṯa tiṯutjarangku pungkula waintaringi.
15Ka Davidalu rawangku pungkunytja Saulalu ruuru kuliningi munu palulanguṟu palumpa puḻkaṟa nguḻuringangi.
16Palu aṉangu Israelnga nguraṟa munu Judah-nya nguraṟa uwankara palumpa puḻkaṟa pukuḻaringi, panya paluṟu mayatja wiṟungku tjananya ngalkiningi.
17Ka tjiṉṯu kutjupa Saulalu wangkangu Davidala, “Ngayuluṉanta ungkuku nyuntunya ngayuku uṉṯalpa ngaṉmanyitja ini panya Miṟapanya kuri nyuntumpa nyinanytjaku. Palu nintila-waraṟaṉi wanyu tjaultji kuṉpu mulapa ngaṟalampa, munu ankula Pilitjiyanya nguraṟa tjuṯangka pikariwa Mayatja Godaku.” Alatji Saulalu wangkangi panya paluṟu Davidanya ilunytjaku mukuringangi. Paluṟu kuliningi, “Wai ngayulu walytjangku palunya pungkula iluntanama. Wanti kaṉa Pilitjiyanya nguraṟa tjuṯakutu iyala, kaya paluṟu tjana palya ma-pungkula iluntara.” Alatji Saulalu unngu kuliningi.
18Ka Davidalu Saulala wangkangu, “Wiya, kuṉṯaringanyiṉa mayatja puḻkaku uṉṯalpa aḻṯinytjaku, panya nyuntun ngayuku walytjapitiku ngurpa. Paluṟu tjana puḻka wiya waintaṟa nyinanytjaku ngura nyanga Israelta.” Alatji Davidalu wangkangi.
19Ka ngula tjiṉṯu waṯalpi ilaringu Saulaku uṉṯalpa aḻṯinytjaku, palu Saulalu Davidanya ungkunytja wiyangku wati kutjupa ini Atuṟiyalnga ungu wati panya Mawulanya nguraṟa.
20Ka Saulaku uṉṯalpa kutjupa nyinangi ini panya Mikalanya munu paluṟu Davidaku puḻkaṟa mukuringangi. Ka Saulalu tjukurpa nyangatja kuliṟa puḻkaṟa pukuḻaringu.
21Panya paluṟu alatji kuliningi, “Palyaṉa Mikalanya unganyi Davidanya, munuṉa palu puṟunypaṯu ngunti kuralku, ka ankula Pilitjiyanya nguraṟa tjuṯangka pikariwa kaya pungkula ma-iluntara.” Munu Saulalu piṟuku Davidala wangkangu, “Uwa palya, nyuntu kuwari ngayuku waputjuriku.”
22Munu mayatja Saulalu wati palumpa waṟkaripai maṉkurta wangkangu Davidala ankula kampangkaṯu ma-wangkanytjaku. Alatjiya palula wangka, “Mayatja Saulanya nyuntumpa puḻkaṟa pukuḻarinyi, nganaṉa kuḻu. Kan wanyu palumpa uṉṯalpa aḻṯiku?”
23Kaya mulapaṯu ankula palula ma-tjakultjunu Davidala, ka paluṟu tjanala wangkangu, “Ngayulu wati ngaḻṯutjara mani puḻkatjara wiya munu ngayuku walytja tjuṯa kuḻu ngaḻṯutjara. Ngayulu kutjupa kutjupa kanyintja wiya mayatjanya ungkunytjikitjangku palumpa uṉṯalpaku, kantiṉi palyaṯu ngayunya ungkunytja wiyangku wantima.”
24Kaya wati panya palumpa waṟkaripai maṉkurpa maḻaku ngurakutu anu munuya Saulala tjakultjunu Davidalu tjanala wangkanytja.
25Ka Saulalu wangkangu wati panya tjuṯangka, “Wiya, ngayuluṉa maniku mukuringkunytja wiya ngayuku uṉṯalpa aḻṯinytjaku, palu ngayulu mukuringanyi paluṟu ankula wati Pilitjiyanya nguraṟa tjuṯa nampa nyangatja 100 pungkula wiyantjaku. Palulanguṟultaṉa palunya ungkuku ngayuku uṉṯalpa.” Alatji paluṟu tjanala wangkangi, palu unngu paluṟu kuliningi alatji, “Kuwariya Pilitjiyanya nguraṟa tjuṯangku palunya-waraṟa wiyaṉi.”
26Ka Davidalu tjukurpa nyangatja kulinu munu puḻkaṟa pukuḻaringu Saulalu wangkanytjitja palyantjikitjangku. Ka Saulalu tjiṉṯu ngurkantanu palumpa panya uṉṯalpa aḻṯinytjaku. Ka tjiṉṯu panya palula kuwaripangka Davidanya anu wati palumpa tjaultji tjuṯatjara, munuya Pilitjiyanya nguraṟa wati tjuṯa mulapa iluntanu. Munu maḻaku ngurakutu aṟuringkula Saulala tjakultjunu, “Nampa nyangatjaṉa 200 iluntanu.” Ka palulanguṟu Saulalu Davidanya ungu palumpa uṉṯalpa Mikalanya, ka palumpa waputjuringulta.
28Nyanga palulanguṟu Saulalu kuliningi, “Mulapa, nyangatja Mayatja Godanya Davidala tjungu alatjiṯu nyinanyi.” Munu paluṟu nyakula kuliningi panya palumpa uṉṯalpa Davidaku puḻkaṟa mukuringkunyangka.
29Munu palulanguṟu Saulanya Davidaku puḻkaṟa nguḻuringangi munu palumpa mirpaṉtju nyinangi rawa mulapa ilunytjakutu-wangkara.
30Ka Davidanya panya wiṟu mulararingu panya paluṟu pika uwankarangka tiṯutjara waintaringi Pilitjiyanya nguraṟa tjuṯa pungkula wiyaṟa, panya paluṟu kuṉpu wiṟu mulapa Saulaku tjaultji tjuṯangka muṉkara alatjiṯu. Kaya aṉangu tjuṯangku palunya kuliṟa mirawaṉingi manta winkitjangku.
