1. Kraľengero 3:8-16

⁸Akana me som ade maškar tire avrikidle manuša, save hine ajci but, hoj pes len na del te zgenel aňi te zrachinel.

⁹Mangav tut, de man goďi, sar te ľidžal tire manušen, hoj te sprindžarav, so hin lačho a so nalačho. Bo ko šaj ľidžal kada baro narodos?”

¹⁰Le RAJESKE sas pre dzeka, so peske o Šalamun mangľa.

¹¹Phenďa leske: “Mištes kerďal, hoj tuke na mangľal baro dživipen, aňi o barvaľipen, aňi o meriben peskere ňeprijaťeľengero, ale mangľal tuke o goďaveripen, hoj mištes te sudzines.

¹²Vašoda kerava avke, sar mandar mangľal. Dava tut baro goďaveripen, hoj savoro te rozprindžares; ajso goďaveripen, so mek šoha (ňikda) ňikas anglal tu na sas aňi na ela.

¹³Dava tut the oda, so mandar na mangľal: O barvaľipen the e slava – avke, hoj pal calo tiro dživipen ňiko le kraľendar na ela ajso sar tu.

¹⁴Te phireha pal mire droma a te doľikereha mire zakoni the prikazaňja avke, sar oda doľikerelas tiro dad o David, dava tut, hoj but te džives.”

¹⁵Androda o Šalamun pes prekerďa a avľa pre oda, hoj o RAJ vakerelas leha andro suno. Paľis geľa andro Jeruzalem a ačhaďa pes angle RAJESKERI Zmluvakeri Archa. Anďa ode labarde the smiromoskere obeti a kerďa prekal savore peskere služobňika hoscina.

¹⁶Jekhvar avle ko Šalamun duj džuvľija, save sas lubňa, a ačhile anglal leste.