1 Baṉara 3:8-16

⁸Meke hiera si rau sapu koa pa korapadi rina tinoni, saripu ele vizati Goi pude na Mua tie soti; soku hola meke lopu boka ta nae si arini.

⁹Gua asa, ke mamu poni au sa ginilagilana lohina d sapu ta hivae pude boka kopu valeana ni arau sari na Mua tinoni pa tinoṉoto, meke tumae gilania rau sa vinotikaena koasa sapu leana meke kaleana. Ura na esei kaqu boka baṉara valeana ni sari na Mua tinoni hire?” gua si asa.

¹⁰Meke qetu nia e Zihova sapu gua tepa ia e Solomone koa Sa.

¹¹Ke zama la sa Tamasa koasa, “Sina tepa ia goi sa ginilagilana lohina pude boka totoli va toṉoto, ba lopu sa tinoa va gelenae na tinagotago babe na vina matedi ri mua kana,

¹²ke kaqu tavetia Arau gua sapu tepa ia goi. Kaqu poni nigo ginilagilana lohina Arau, sapu namu loke tie pukerane ele tagoa, meke loke tie pule si kote gugua asa.

¹³Ba kaqu ponigo tugo Arau sapu gua lopu tepa ia goi. Kaqu na tie tagotago na ta pamaṉaemu si goi pa doduruna sa mua tinoa, hola ni sari doduru baṉara pule.

¹⁴Meke pana va tabe Au na kopuni goi sari na Qua tinolitolie na tinarae, kekeṉoṉo puta gua sapu tavetia sa tamamu se Devita, si kaqu ponigo tinoa va gelenae tugo Arau si goi,” gua si Asa.

¹⁵Meke vaṉunu se Solomone meke gilania sa sapu e Tamasa si zama koasa pa pinutagita. Beto asa si topue pule la pa Zerusalema si asa, meke la turu pa kenuna sa Bokese Vinariva Egoi te Zihova, meke taveti sa sari na vina vukivukihi va uququ meke sari na vina vukivukihi hinenahena binaere koe Zihova. Beto asa si tavetia sa si keke inevaṉa tadi doduru nana palabatu nomadi koasa nana qinavuna.

¹⁶Keke rane si mae vura gedi si karua maqota koe Solomone sa baṉara.