1. King 3:8-16

⁸Iwe, ngang noum chon angang, üa nom lein noum aramas ka filiretä, eu mwichen aramas mi chowatte, esap wor eman a tongeni aleaniir ren chomongur.

⁹Iei mine kopwe fang ngeniei ngang noum chon angang eu leluk mi mirit, pwe üpwe tongeni nemeni noum aramas fän pwüng o alefila mine a öch me mine a ngau. Ifa usun ai üpwe tongeni nemeni noum ei mwichen aramas mi chowatte?”

¹⁰Iwe, ewe Samol mi Lapalap a efich mine Salomon a eäni tüngor.

¹¹Iei mine a üreni Salomon, “Pokiten ka tüngor mirit pwe kopwe emweni aramas fän pwüng, nge kosap tüngor fän itom pwe kopwe manauatam ika pisekisek, ika tüngor mälan chon oputom,

¹²iei mine üpwe apwönüetä om tüngor. Üpwe fang ngonuk eu leluk mi mirit o tipachem, pwe esap wor eman mi wewe ngonuk lon kewe fansoun ra la, pwal lon kan fansoun repwe feito.

¹³Üpwe pwal fang ngonuk mine kosap tüngor. Üpwe fang ngonuk pisekisek me iteüöch, pwe esap wor eman king epwe wewe ngonuk lon unusen manauom.

¹⁴Nge are kopwe aleasochisiei o apwönüetä ai kewe allük me pwüüng usun Tafit semom we a föri, mürin üpwe alangatamala ränin manauom.”

¹⁵Iwe, Salomon a nela o mefi pwe Kot a fos ngeni lon an tan. Mürin, a feila Jerusalem, a ütä me mwen än ewe Samol mi Lapalap we pworofel o eäni asoren kek me asoren kinamwe ngeni. Mürin a föri eu kametip fän iten nöün kewe nöüwis meinisin.

¹⁶Lon eu rän, ruoman fefin mi amömö inisir fän iten lisowu ra feila ren ewe king o ütä fän mesan.