Kiŋ 1 3:8-16

⁸Ma nêm sakiŋwaga aê kakô nêm lau, taŋ aôm kôjaliŋ sa naŋ, ŋalêlôm. Êsêac lau-m kapôêŋanô e ŋac teŋ êtôm êsa êsêac sa to êsam nêŋ ŋanamba lasê êŋgôm êtôm atom.

⁹Amboac tonaŋ ôkêŋ ŋalêlôm tokauc êndêŋ nêm sakiŋwaga aê gebe janam gôliŋ nêm lau ŋapep to jajala ŋajam to sec gebe asa êtôm gebe ênam gôliŋ nêm lau-m kapôêŋ tonec.”

¹⁰Apômtau gêŋô biŋ, taŋ Salomo keteŋ naŋ ŋajam.

¹¹Ma Anôtô kêsôm gêdêŋ eŋ gebe “Aôm koteŋ gêŋ tonaŋ ma koteŋ kêtu ômoa nom e ŋêŋgeŋ me ôtap awa taêsam sa me ôku nêm ŋacjo tuluŋa nec atom. Mago koteŋ mêtê tokaucŋa gebe ôjala gêŋ ŋajam to gêdêŋŋa.

¹²Tec ôlic acgom, galoc aê jaŋgôm biŋ, taŋ koteŋ naŋ, ŋanô êsa. Ôlic acgom, aê oc jakêŋ ŋalêlôm tokauc, taŋ êjala biŋ naêndêŋgeŋ êndêŋ aôm. Ŋac teŋ kêtap ŋalêlôm amboac tonaŋ sa gêmuŋ aôm atom ma teŋ oc êndaŋguc aôm atom amboac tonaŋgeŋ.

¹³Ma gêŋ taŋ koteŋ atom naŋ, aê gabe jakêŋ êndêŋ aôm amboac tonaŋ. Aê oc jakêŋ awamata to waem, taŋ kiŋ teŋ kêtap sa atom tageŋ naŋ.

¹⁴Ma aôm embe ôsa aêŋoc lêŋ ma ojop ŋoc ŋagôliŋ to biŋsu êtôm tamam Dawid kêmasaŋ naŋ, go aê gabe janac têku nêm têm ômoa matam jaliŋa ŋêŋgeŋ êwiŋ.”

¹⁵Ma Salomo mata gêlac ma gêlic gebe gêc mê teŋ. Go eŋ gêmu gêja Jerusalem ma jakêkô Apômtaunê poac ŋakatapa ŋanêmŋa ma kêkêŋ daja to dawama ma geno moasiŋ kapôêŋ teŋ kêtu nê sakiŋwaga samobŋa.

¹⁶Gêdêŋ tonaŋ mockaiŋo luagêc dêdêŋ kiŋ sêja ma sêkô eŋ laŋônêm.