Te Israel me Juda Hani Sigo Tuni Bidigo Po Elalubo Buku Deli 3:8-16

⁸Megi da, ena te nago da olama, te sa muani te we bidi hani dabe tomode bidibao,” wali. “Augwali te hauwa umabo mu ebaso, tama te bidi dabego nedebaso, te usu me egobeo.

⁹Tama tibaso, eno homugo nago enabolo te konebo wiegi yai homu kolesaga mao, te tama eno nago te we bidi bugagia tonalumainogo tiao, tama te mena kolesaga te wiegi yai ebo, ma te mena dwai kolesaga ebo me, te eno bugagia dagalamainu te tama tiao. Te meni ebaso da, teda te mena bidi me deligo nago te genuai we bidi hani dabe tonalubaso, te usu egobeo. Ena digi eno te usu mu me egobeo,” wali.

¹⁰Genuai Bidigo Solomongo te hanalu wali po odama, tama agai bugai homu mu te Solomonba yalio.

¹¹Tama tibaso, Godigo Solomonba te tiwai po wali, “Te nago enaba hanaluyu, te nageba eno te wiegi yai konebo homu kolesaga nageba menama, te nago te Israel dabe bugagia tonaluaibao po hanalu wali, te wiegi yai dao. Tama nago enaba te nage te tǫde sesabi sogo elama bidabo po me hanalubeo, tama nago enaba hanalu, te eno nageba te mone hauwa mao po wabe, tama me nago enabolo te nago boi bidi dabe dolabo po me hanalubeo.

¹²Tama tiyu, te mu tama, nago enaba te hanalu wali nai te eno nage mawaibao,” wali. “Megi da, te eno nagebolo te konebo wiegi yai homu kolesaga hauwa mawaibao,” po wai. “Polobadu te bidi me deligo te tobage kolesaga koneai me elalubeo, tama te nosali me te bidi me deligo nago te koneani kolesaga tobage tiwai te bidi mego sogobeo.

¹³Mu tama, nago enaba te genuai nogi me te mone hauwa saio wabo po me hanalubeo. Tiali goli, eno nagebolo te tigidali nai doado bage mawaibao, tama nage te king bidibo sogo te nago genuai nogi elalubo tiwai te gasa kingo te tiwai genuai nogi me elalugobeo.

¹⁴Tama te nage eno te sa muani te wiegi yai sunumidu peyu, tama nago te bomai po me eno po me wali peyu, te naga aya Devitgo te yali kolesaga tiwai ebaso da, teda eno nage te sesabi elama, te bobage sogo te tǫde bidimainu yaibao,” po wali.

¹⁵Genuai Bidigo po ola silibo si da, teda Solomon hodaluali, tama te tiwai te na yali da homu eyu, te tama koneani. Tialima, nosali te aga Jerusalemba ma pelama, tama te Genuai Bidigo Dąų Walali Bomai Po Munalubo Halobage elalubo madi pąba dologi pali. Tama agai te tigidali siago domainu ulubo ofa me, tama te God dali deli homu pedalumainu ebo ofa dabe dali yalio. Tama te tudi badu nosali, agai te ofisa dabego me, te aga sę bidi dabego dali, te genuai daa tubo nai ulama, tuai dao.

¹⁶Me sogo deli te penani we si te kingba asali, te agai augwali si po dodolumainogo asalio.