1. Kraľengero 4

1

2

3

4

5

6

7

8

9

10

11

12

13

14

15

16

17

18

19

20

21

22

¹O Šalamun ačhiľa kraľis upral calo Izrael.

²Kala sas leskere bare uradňika: O Azarijah, le Cadokoskero čhavo, sas o rašaj.

³O Elichoref the o Achijah, le Šišoskere čhave, sas pisara andro palacis. O Jošafat, le Achiludoskero čhavo, sas o matrikaris.

⁴O Benajah, le Jehojadoskero čhavo, sas o veľiťeľis upral o slugaďa. O Cadok the o Ebjatar sas o rašaja.

⁵O Azarijah, le Natanoskero čhavo, sas o baro guverneris upral o krajengere guvernera. O Zabud, le Natanoskero čhavo, sas o rašaj the le kraľiskero pašutno radcas.

⁶O Achišar sas o uradňikos upral o služobňika andro palacis. O Adoniram, le Abdoskero čhavo, sas veľiťeľis upral o robotňika, save sas ispidle andre buči.

⁷O Šalamun ačhaďa dešuduj (12) guverneren upral o kraji andre calo Izrael, save pes starinenas pal o chaben prekal o kraľis the calo palacis. Dojekh lendar anelas andral peskero krajos jekhvar andro berš pre calo čhon chaben andre le kraľiskero palacis.

⁸Kala hin lengere nava the kraja: O Ben-Chur andro Efrajimike brehi;

⁹o Ben-Deker andro Makac, Šaalbim, Bet-Šemeš, Elon the Bet-Chanan;

¹⁰o Ben-Chesed andro Arubbot, Socho the caľi phuv Chefer;

¹¹o Ben-Abinadab andro Nafat-Dor – leskeri romňi sas e Tafat, le Šalamunoskeri čhaj;

¹²o Baanas, le Achiludoskero čhavo, andro fori Taanach the Megiddo the andre calo Bet-Šean, so hino paš e Caretan teleder le Jezreelostar, khatar o Bet-Šean dži ke Abel-Mechola the dži pal o Jokmeam;

¹³o Ben-Geber andro foros Ramot-Gilead – sas les o gava le Jairoskere, le Menaššeskere, andro Gilead, mek the e phuv Argob andro Bašan – ode sas šovardeš (60) bare fori le murenca, pre save sas o brondzune brani;

¹⁴o Achinadab, le Iddoskero čhavo, andro Machanajim;

¹⁵o Achimaac andro Naftali – le Achimaacoske sas romňi e Basemat, le Šalamunoskeri čhaj;

¹⁶o Baanas, le Chušajoskero čhavo, andro Ašer the Alot;

¹⁷o Jošafat, le Paruachoskero čhavo, andro Jissachar;

¹⁸o Šimej, le Elasoskero čhavo, andre phuv Benjamin;

¹⁹the o Geber, le Urihoskero čhavo, andre phuv Gilead, kaj sas o Amorejiko kraľis o Sichon the o Bašaňiko kraľis o Og. Upral savore kraji sas jekh baro guverneris.

²⁰O Judejci the o Izraeliti sas ajci but sar e poši paš o moros. Sas lenge mištes, bo len sas, so te chal a te pijel.