Ŋicwofuŋ I 3:8-16

⁸Erâ kiŋaŋŋicge no mac ʒi ŋicfâcge bâwosâec‐jopameŋ jaŋere ŋondeŋko domakopac. Jaŋe ŋic ŋokac guru sâko ʒare‐jeŋic fejâmbâŋkekacte ŋic moczi sâcne mi wosec‐jopaocmu.

⁹Irec go kiŋaŋŋicge nore maŋ mamanasu bâsokatec biaŋne â sâqocnere fuŋne hone tarahuc ŋicfâcge jaŋere dâŋ sâcne mutarazepac. Ŋicfâcge jaŋe guru sâko irec mozi dâŋjeŋic mutarame sâckeocmu?”

¹⁰Salomozi wiac iŋucnere Wofuŋ numucneme maname biaŋkewec.

¹¹Irec dâŋ ʒiŋuc bâtikiecnewec: “Go mamana biaŋ rohuc mumutara gie fârine bacmurâ numu‐narehuc juju ʒoricne jufecmurâ me moneŋ mafa sâko rauckecmurâ me râsifâcge jaŋe hâmo sipiric eniŋmurâ mi numu‐naremec.

¹²Manakic, irec erâ nunumugere sâcko egarehuc maŋɋârâŋ â mamana sâko bâfua‐garepe izi ŋic mârâc jumbiŋ â ʒâhec jufeniŋmu jaŋere mamana sirickecmu.

¹³Eme wiac gâcnere mi numu‐naremec i wâc ʒuhuckerâ garepemu, moneŋ mafa sâko mecne erâ ʒâŋe biŋe sâko mâmâc. Irec gore dameŋko ŋicwofuŋ gâcne juniŋmu jaŋe gore sâc mi bâfuanʒepieŋ.

¹⁴Go nore hatao juhuc dâŋsanaŋ â sâcmutâc dâŋnane mamacge Dawidizi ewec irec sâc ehuc reŋkecmuo ine raŋɋa raŋɋa jambuŋguhuc jupemu.”

¹⁵Eme Salomozi ɋârerâ ʒiŋuc mana tarawec: Â, ʒi guŋ manakopac. Iŋuc muhuc Jerusalem haeo ferâ Wofuŋte ʒâʒâfic katapa irec maŋfuŋko domahuc qowi bâzi â wama bâzi wiac rikerâ fekicnefâc‐ticne tiwa bâzi ejarewec.

¹⁶Eme dameŋ ira sasec ŋokac jajahec jahe ŋicwofuŋ dâŋ âzâcnenicte erao rapic.