1 Kɔdɛnti 5

1

2

3

4

5

6

7

8

9

10

11

12

13

14

15

16

¹N yomu bɛ̀ nɑ̀ɑ́mmɛ̀ tipíìtì timɔu di borimɛ í wennimɛ̀. Kɛ̀ di dɔɔri bɑ́ bɛ̀ɛ̀ í tũ nKuyie mbɛ̀ í dɔɔri dɛ̀. Bɛ̀ tu òmɔù dɔutinɛ̀ o cicɛ pokù.

²Nɛ̀ mɛmmɛ kɛ̀ di kpɑɑ́ mɔkɛ tɛfentɛ̀, dɛ̀ do dò ndi yɛ̀mmɛ̀ mɛɛ̀ cɑɑ̀rɛ̀ kɛ̀ di bɛti dɛ kóo nìtì di cuokɛ̀.

³Mí n kpɛ́í, bɑ́ n yí mɛ ndi bonɛ̀mɛ̀, n yɛ̀mmɛ̀ di bonɛ̀mu kɛ̀ n diɛ́ nkɛ bekɛ́nɛ̀ dɛ kóo nìtì.

⁴Di tíí nnɛ̀ Yesu kó diyètìrì, n yɛ̀mmɛ̀ nɛ̀ ti Yiɛ̀ nYesu kó muwɛ̃rímú dɛ̀ yó ndi bonɛ̀mu.

⁵Kɛ̀ di ò duɔ́ ndibɔɔ̀, kòo kɔ̃̀ntìi kú kòo wɛ̃nnìi cootɛ́ tibeéntì yiè.

⁶Di í dò nkɛ́nsɑ̃ntí dimɑ́ɑ̀ di wennimɛ̀, kɛ yɛ̃́ mutie mùù muuti pɛ̃́ɛ̃̀ mù ɔ̃ɔ̃ mmɑmɛ̀ sɑ́m̀pɔ̀ nwe kɛ̀ tipɛ̃́ɛ̃̀cootìi múútí timɔu.

⁷Dɛitɛnɛ̀ mutie mùù muuti pɛ̃́ɛ̃̀ di miɛkɛ kɛ́ntú tipɛ̃́ɛ̃̀cootì pɑ̀ntì, kɛ yɛ̃́ bɛ̀ kùɔmɛ̀ Kirisi wèè tu diyentɛ́bɑnni kó fɛpìèfɛ̀ ti kpɛ́í.

⁸Nɛ̀ dɛ̀ kpɛ́í nyóunɛ̀ kɛ̀ tí mbɑɑ̀nnɛ̀ pɛ̃́ɛ̃̀ wèè í kɔɔrɛnɛ̀ mutie mùù muuti dɛ̀ɛ̀ tu ti bo nwennimɛ̀ kɛ nɑ́ɑ́ ntimɔ́mmɔnti, kɛ́yóu pɛ̃́ɛ̃̀ wèè kɔɔrɛnɛ̀ mutie mùù muuti dɛ̀ɛ̀ tu tidɔnnitì nɛ̀ mufòmmu yɛimu.

⁹N sòò di wɑ̃̀ri dìì pɑ́tíri, n sòò di nɑ̀kɛ́ kɛ tú di bɑ́ ntɑunɛ̀ bɛ̀ɛ̀ fòmmu í wenni.

¹⁰N sòò í yɛ̃ ndi yɑtɛnɛ̀ kutenkù kɔbɛ bɛ̀ɛ̀ fòmmu í wenni, kɛ̀ bɛ̀ duɔ́ mbɛ yɛ̀mmɛ̀ idíítí, kɛ yuuku, kɛ feu yɛbɔkɛ̀. N sòò yɛ̃ nKirisi kɔbɛ mbɛ bɛ̀ɛ̀ dɔ̀ɔ̀ri mɛ kóò botí. Kɛ̀ n do mbɛ nyɛ̃ n nɑ nyĩ di yɛ̀mu kutenkù miɛkɛ.

¹¹Di mpɑ́tíri miɛkɛ n dɔ́ kɛ́ di nɑ́kɛ́ kɛ tú kòò mɔù tu omɑ́ɑ̀ Kirisi kou kòo fòmmu í wenni, yoo ò duɔ́ nho yɛ̀mmɛ̀ idíítí, yoo ò feu yɛbɔkɛ̀, yoo ò cɑ̀ɑ̀ri bɛtɔbɛ̀ yètɛ̀ yoo ò tu kunɑɑ̀yɑ̃̀ɑ̃̀kù yoo ò tu oyúókù, di ketɛ́ kɛ bɑ́ɑ́ ò wɛ̃nnɛ́nɛ̀ kɛ́di.

¹²Míì í dò nkɛ́bekɛ́nɛ̀ bɛ̀ɛ̀ í tú Kirisi kɔbɛ, Kuyie nkuù yóó bɛ̀ bekɛ́nɛ̀. Di dòmmu kɛ́bekɛ́nɛ̀ di kó ditĩ̀nnì kɔbɛ, ti wɑ̃̀rimu kɛ tú: Bɛtinɛ̀ oyɛiwe di cuokɛ̀.