1 BƐKPÀÀTÌBƐ̀ 16:13-30

¹³Dɛndɛ kó dimɑ̀ɑ̀ dɛ̀ ò tùɔ̀kɛní o yɛi kpɛ́í nkɛ nɛ̀ o birɛ Edɑɑ kɔ̃mɛ ò do dɔ̀ɔ̀ mɛ̀ kɛ́tɑnnɛ́ Isidɑyɛɛribɛ mɛyɛi mmiɛkɛ kɛ́yíi nti Yiɛ̀ nKuyie mmiɛkɛ nɛ̀ bɛ kó mubɔɔféù.

¹⁴Edɑɑ dɔɔ̀rìmɛ̀ tɛ̃mɛ̀ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ ndɛ̀ í tú Bɛkpɑ̀ɑ̀tìbɛ̀ tɔ̃mmú pɑ́tíri ketirì yoo didɛ́rì, bɛ̀ nɑ̀ɑ́ nyɛ̀mɑyɛ̀ kpɛ́í nkɛ kɛ̀ dɛ kó yɛpɑ́tɛ í bo nkɔkɛ́ Kuyie nnɑ́ɑǹtì pɑ́tíri miɛkɛ.

¹⁵Sudɑɑ kɔbɛ kóo kpɑ̀ɑ̀tì Asɑɑ kpɑ̀tì benni sipísìdɛ́ nɛ̀ diyiénnì miɛkɛ nkɛ̀ Simmidi nɑɑ́mmɛ̀ Isidɑyɛɛribɛ kóo kpɑ̀ɑ̀tì, kɛ́ntɔ tikpɑ̀tì kɛ dɔ̀ yɛwe yɛ̀yiekɛ̀. Dɛ̀ do sɔ̃́ mbɛ̀ pi Kibetɔ̃ɔ̃ nwe Fidisitɛ̃ɛ̃bɛ ɛì.

¹⁶Bɛhɑ̃ɑ̃pɔ̀mbɛ̀ kèè dìì mɔ̀nnì bɛ kɑrì kɛ dò nSimmidi bɔ nhokpɑ̀ɑ̀tì koò kùɔ. Dɛ kó diyiè dìmɑ́ɑ̀ miɛkɛ kɛ̀ Isidɑyɛɛribɛɛ pĩ́ nhohɑ̃ɑ̃pɔ̀nkótì Omidi tikpɑ̀tì dɛndɛ dihɑ̃ɑ̃pɔ̀nkɑrì.

¹⁷Dɛ mɔ̀nnì Omidi nɛ̀ o ɑ̃ɑ̃pɔ̀mbɛ̀ kɛ̀ bɛ̀ɛ ítɛ́ bɛ do kɑri dɛ̀ kɛ́pi Kibetɔ̃ɔ̃ kɛ́kɔtɛ kɛ́do Tidisɑɑ.

¹⁸Simmidi sɔ̃́ ndìì mɔ̀nnì bɛhɑ̃ɑ̃pɔ̀mbɛ̀ do dihɛì kòo kɔtɛ kɛ́tɑ tɛkpɑ̀ɑ̀tìcĩ́ɛ̃̀tɛ̀ o kó kudieku kɛ́cɔ́u nkɛ̀ tɛ̀ɛ ò wɛ̃nnɛ́nɛ̀ kɛ́cɔ́útɛ́ kòo kú.

¹⁹Dɛndɛ ò tùɔ̀kɛní o yɛi nkpɛ́í nkɛ, ò dɔ̀ɔ̀ mɛ̀ ti Yiɛ̀ nKuyie nyí dɔ́ dɛ̀, kɛ tũ̀nnɛ o cicɛ Sedoboɑmmu kó mɛyɛi nhò do dɔ̀ɔ̀ mɛ̀ kɛ́tɑnnɛ́ Isidɑyɛɛribɛ mɛyɛi miɛkɛ.

²⁰Simmidi dɔɔ̀rìmɛ̀ tɛ̃mɛ̀, ò bɔmmɛ̀ okpɑ̀ɑ̀tì, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

²¹Dɛ mɔ̀nnì kɛ̀ Isidɑyɛɛribɛɛ totɛ́ kɛ̀ diwɛ́tirìi tũnnɛ Kinɑti birɛ Tibinni kɛ́ we mpĩ́ ntikpɑ̀tì. Kɛ̀ diwɛ́tirì tɛrì nkpɑɑ́ tũ nhOmidi.

²²Omidi kó ditĩ̀nnì diì do nɑ Tibinni kpɛri kɛ̀ Tibinnii kú kɛ̀ Omidii nɑɑ́ nhokpɑ̀ɑ̀tì.

²³Sudɑɑ kɔbɛ kóo kpɑ̀ɑ̀tì Asɑɑ kpɑ̀tì benni sipísìtɑ̃ɑ̃ti nɛ̀ dìmɑ́ɑ̀ miɛkɛ nkɛ Omidi nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́mbo Tidisɑɑ kɛ dɔ̀ yɛbie nyɛ̀kuɔ̀. Ò do tɔ tikpɑ̀tì kɛ dɔ̀ yɛbie ntɛpíítɛ̀ nɛ̀ yɛ̀dɛ́ɛ̀ ndi.

²⁴Dɛ kó difɔ̃nkúò kɛ́dontɛ́ Simmɛdi borɛ̀ Sɑmmɑrii tɑ̃rì mɛdítíbii nsikɔupísìkuɔ̀ (6000) kɛ́mɑɑ́ dihɛì dɛ kó ditɑ̃rì ĩ́nkɛ̀, kɛ́ dì yú ò dì dontɛ́nɛ̀ wè kó diyètìrì kɛ dɔ̀ Sɑmmɑrii.

²⁵Kɛ̀ Omidii dɔɔ̀ ti Yiɛ̀ nKuyie nyí dɔ́ dɛ̀ kɛ́pɛ̃ɛ̃tɛ́ bɛ̀ɛ̀ ò niitɛ́nɛ̀ kɛ di tikpɑ̀tì.

²⁶Ò do tũ̀nnɛ Nɛbɑti birɛ Sedoboɑmmu kó mɛborimɛ mmɛ, ò do dɔ̀ɔ̀ mɛ̀ɛ̀ yɛi nkɛ́tɑnnɛ́ Isidɑyɛɛribɛ mɛyɛi miɛkɛ kɛ́yíi nti Yiɛ̀ nKuyie mmiɛkɛ nɛ̀ bɛ kó mubɔɔféù.

²⁷Omidi dɔɔ̀rìmɛ̀ tɛ̃mɛ̀ nɛ̀ ò dokɛ́ mùù doò dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

²⁸Kòo kú kɛ̀ bɛ̀ɛ ò kũnnɛ́ Sɑmmɑrii kòo birɛ Akɑbuu sɔɔtɛ́ o kpɑ̀tì.

²⁹Sudɑɑ kɔbɛ kóo kpɑ̀ɑ̀tì Asɑɑ kpɑ̀tì benni sipísìtɑ̃ɑ̃ti nɛ̀ diniínnì ndi, Omidi birɛ Akɑbu nɑɑ́mmɛ̀ Isidɑyɛɛribɛ kóo kpɑ̀ɑ̀tì, kɛ́ntɔ tikpɑ̀tì kɛ dɔ̀ yɛbie nsipísìdɛ́ nɛ̀ yɛ̀dɛ́ɛ̀, kɛ bo Sɑmmɑrii.

³⁰Kòo birɛ Akɑbuu dɔɔ̀ ti Yiɛ̀ nKuyie nyí dɔ́ dɛ̀ kɛ̀ dɛ̀ɛ pɛ̃ɛ̃tɛ́ bɛ̀ɛ̀ ò niitɛ́nɛ̀ kɛ di tikpɑ̀tì.