Sie Tokosra 16:13-30

¹³Baasha ac wen natul Elah eltal akkasrkusrakye LEUM GOD lun Israel, mweyen eltal alu nu ke ma sruloala, ac oayapa kolla mwet Israel in oru ma koluk.

¹⁴Ma nukewa saya ma Tokosra Elah el oru, simla oasr in Sramsram Matu Ke Tokosra Lun Israel.

¹⁵In yac aklongoul itkosr ke pacl Tokosra Asa el leum lun Judah, Zimri el leum fin Israel in acn Tirzah ke len itkosr. Mwet mweun lun Israel elos kuhlusya siti Gibbethon in acn Philistia.

¹⁶Ac ke elos lohng lah Zimri el orek pwapa sulal lainul tokosra ac unilya, na elos nukewa fahkla na in pacl sac mu Omri, mwet kol fulat lun un mwet mweun lalos, pa ac tokosra lun Israel.

¹⁷Omri ac mwet mweun lal elos som liki acn Gibbethon, ac kuhlusya acn Tirzah.

¹⁸Ke Zimri el liye lah siti sac kutangyukla, na el som nu in acn se ma potiyukyak ku na ke inkul fulat sin tokosra, ac esukak, ac el misa ke fulen e uh.

¹⁹Ma se inge sikyak ke sripen ma koluk lal lain LEUM GOD. El oapana Jeroboam su tokosra meet lukel, ke el aktoasrye LEUM GOD ke orekma koluk lal sifacna, oayapa ke el kolla mwet Israel in oru ma koluk.

²⁰Ma nukewa saya ma Zimri el orala, wi pac pwapa sulal ma el oru, simla oasr in Sramsram Matu Ke Tokosra Lun Israel.

²¹Mwet Israel uh nunak luoelik: kutu selos lungse Tibni wen natul Ginath, elan tokosra, a mwet lula lungse in Omri.

²²Saflaiya uh, tuh wi lungse lun mwet ma ke in Omri pa tokosra. Tibni el misa, ac Omri el tokosrala.

²³Ouinge in yac aktolngoul sie ke pacl in leum lal Tokosra Asa lun Judah, Omri el tokosrala lun Israel, ac el leumi acn we ke yac singoul luo. Yac onkosr meet ah el leum in acn Tirzah,

²⁴na el molela eol srisrik soko in acn Samaria ke ipin silver onkosr tausin, sin mwet se pangpang Shemer. Omri el kuhlasak eol soko inge, ac musaela sie siti srisrik we, ac sang inen siti sac Samaria, in oana inen mwet se ma la acn we meet ah: Shemer.

²⁵Omri el orekma koluk lain LEUM GOD yohk liki tokosra nukewa meet lukel.

²⁶El oapana Jeroboam su tokosra meet lukel, in akkasrkusrakye LEUM GOD lun Israel ke orekma koluk lal, ac ke el kolla mwet uh in oru ma koluk ac alu nu ke ma sruloala.

²⁷Ma nukewa saya ma Omri el orala ac oakwuk lal nukewa, simla oasr in Sramsram Matu Ke Tokosra Lun Israel.

²⁸Omri el misa ac pukpuki Samaria, ac Ahab wen natul, el aolul in tokosra.

²⁹n yac aktolngoul oalkosr ke pacl in leum lal Tokosra Asa lun Judah, Ahab wen natul Omri, el tokosrala lun Israel, ac el leum in acn Samaria ke yac longoul luo.

³⁰El oru ma koluk lain LEUM GOD yohk liki tokosra nukewa meet lukel.