2मेकोपुकीमी इन गेय पाइब आन बेक्शो रां चिक्ब आन कली ब्वचा गेम्तेक्म। मिनु इन योव़शो मुर आन श्ये ब्वाकी ङा जन्तु आन कली ब्वचा गेम्तेक्म।
3मेकोपुकीमी मेको आन हुश ब्वाक्कु खोदेंशो पा यरूसलेम आ एर ओंथ नेल्ल शाइक्पाइक्तेक्म। मिनु मेको आन कली थिम्ब सुइ मबाक्म।
4आंइ नेक्था बाक्ब मुरपुकीमी आंइ कली शुक्शी पाइक्नीम। मिनु आंइ एर ओंथ ङा मुरपुकीमी आंइ कली रिश्शा तोक्शा लोव़ पाइनीम। भजन संग्रह ४४:१४
5परमप्रभु यावे, गे गेना सम्म गाइक्स ङा गाइक्स बाक्नीनी? इन गेहे पतीके गेना सम्म मी खोदेंशो पा ब्रस ङा ब्रस बाक्बा?
6इन कली मतुइक्ब रागी रागी ङा मुर नु इन नें मथीब राज्य आन तार इन गाइक्चा मोतीन। येरमीया १०:२५
7मारदे हना मेकोपुकीमी याकूब आ थर ङा मुर आन कली खतम सेल्शो दाक्तेक्म। मिनु आन बाक्तीक खिं प्रेश्शा खतम सेल्तेक्म।
8आंइ किकी पिपी आन पशो पाप आ क्येक्क आंइ कली मलेत्तीन। आंइ कली रीब पा इन शिशी गेकी। मारदे हना आंइ थुं लुक्च लशो बाक्ब।
9आंइ कली श्येत रे प्रोंइब परमप्रभु, इन नें ङा सक्तिमी आंइ कली वारच पने। इन नें आ पर्बम आंइ कली प्रोनीन। मिनु आंइ पाप क्याम्दीने।
10मारदे रागी रागी ङा मुरपुकीमी “मेको आन परमप्रभु ते बाक्म?” दे हिल्लो पाइनीमी। रागी रागी ङा मुरपुकीमी इन मुर आन कली आन ङोंइती साइश्शो आ क्येक्क लेप्ब, दे तुइक्तमेक्ल। भजन संग्रह ११५:२; योएल २:१७
11चोक्चा पुंइसीशो आन हुकयी पशो इन ङोंइती जाक्ल। साइक्चा पुंइसीब दुम्शो आन कली इन सक्तिमी प्रोनीन।
12परमप्रभु आ पर्बम शुक्शी पा मुरपुकीमी मुने तोक्चा माल्शो बाक्नीमी। मेको मो पशो ङा आंइ नेक्था ङा मुर आन कली ७ खेयप क्येक्क लेत्तीन। भजन संग्रह १३७:७-९
13गो इन मुर, इन योव़शो भेडा खोदेंशो नकी। गो इन कली “गे रिम्शो पाइब बाक्नीनी” दे आंइ चच युइ आन पाला सम्म ठेयब सेल्नीकी। मिनु इन पर्बम लोव़ पाइनीकी।
भजन संग्रह 79
भजन संग्रह 79:2-13