SALMOS 79:2-13

²Nochi inintacayo momasehualhua quinmajcajtoque para ma quincuaca totome. Hasta quinmajcajtoque ininacayo mototajtzitzi, nopa tatzejtzeloltique tacame cati moquetzque moixpa, para ma quincuaca tecuanime.

³Quena, tocualancaitacahua quintzontamiltijque nochi nopa masehualme ipan altepet Jerusalén. Huan inieso cati toyajqui motalo quej hueyat, huan amo mocajqui yon se para quintalpachos.

⁴Huan ama nochi talme cati techyahualojtoque techpinajtíaj huan techhuetzquilíaj.

⁵Toteco Dios, ¿hasta quema tamis ticualantos ica tojuanti? ¿Huelis para nochipa mocualancayo eltos quej tit?

⁶Xijtitani mohueyi cualancayo ipan nopa talme campa amo mitzixmatij, huan ipan altepeme campa amo aqui mitzhueyimati, pero amo xijtitani ipan tojuanti.

⁷Pampa inijuanti quintzontamiltijque nochi moisraelita masehualhua huan quinsosolojque nochi calme.

⁸¡Amo xiquelnamiqui huan amo techtatzacuilti por inintajtacolhua tohuejcapan tatahua, cati inijuanti quichijque huejcajquiya! Más cuali nimantzi techtasojta pampa ayecmo tijpiyaj fuerza.

⁹Toteco Dios, titotemaquixtijca, techpalehui, para quej nopa nochi mitzhueyitepanitase. ¡Techmaquixti huan techtapojpolhui totajtacolhua ica mohueyi taicnelilis!

¹⁰Pampa sinta amo techpalehuis, huajca nopa masehualme cati amo mitzneltocaj quiijtose: “¿Canque itztoc ininTeco Dios?” Huajca xiquintatzacuilti, Toteco, iniixpa nochi masehualme, pampa quinmictijque momasehualhua.

¹¹Xijtacaquili inintequipachol nopa masehualme cati tzactoque, huan ica mohueyitilis huan mohueyi chicahualis, xiquinmanahui cati quinixquetztoque para quinmictise. Xiquinmaquixti para nochi ma quiitaca mohueyi chicahualis.

¹²TOTECO, xiquincuepili chicome huelta cati mitzchihuilijque quema mitzpinahualtijque nopa talme cati san mitzhuetzquilíaj.

¹³Huan huajca tojuanti, timomasehualhua cati tiitztoque quej timoborregojhua, timitzhueyichihuase para nochi tonali huan timitzpaquilismacase ica huicat para nochipa.