Kölfel 79:2-13

²Ra ngeni ekewe machang mi mwacho somän noum kewe chon angang pwe ochar, ra ngeni ekewe manmwacho fituken noum kewe chon pin.

³Ra ninätiu char usun koluk pwelin ünükün Jerusalem, nge esap wor eman a peiaseni ekewe somä.

⁴Äm aia uren takir me ren chon ekewe mwü mi nom ünüküm, ra turunufasekem o esitakem.

⁵Ai Samol mi Lapalap, ifa ükükün fansoun om kopwe song ngenikem? Epwe tori feilfeilachök? Ifa usun, om lingeringeritikem epwe chök ngetenget usun ekkei?

⁶Kopwe song ngeni chon ekewe mwü resap sileek, pwal ngeni chokewe resap iotek ngonuk.

⁷Pun ra niela noum aramas o ataela fanüer.

⁸Kosap ukun ngenikem tipisin äm kewe lewo. Kopwe amüttirato om ümöümöch ngenikem, pun äm aia apilükingau.

⁹Kopwe alisikem, ai Kot äm Chon Amanau, pwe itom epwe ling. Kopwe angasakem o amusala äm tipis pokiten itom.

¹⁰Pwota chon ekewe mwü repwe ais, “Ifa i chök ar we Kot?” Kopwe öküna ngenikem usun om kopwe ngeni chon ekewe mwü chappen ar nimanauei noum kewe chon angang.

¹¹Kopwe aüselinga ngüngün ekewe chon fötek. Fän om manaman mi lapalap kopwe angasala ir mi feil ngeni mäla.

¹²Ai Samol, kopwe liwini ngeni chon ekewe mwü fän fisu ar kewe kapasen turunufas ra turunufaseek ren.

¹³Mürin, äm noum aramas, ewe mwichen sipen om mälämäl, äm aipwe kilisou ngonuk tori feilfeilachök. Seni eu täppin aramas tori eu täppin äm aipwe mwareituk.