Pisalem 79:2-13

²Digaula guu wanga nia huaidina o au daangada gi nia manu mamaangi gi geina, mo nia huaidina o au daangada hai hegau gi nia manu llamu dauwa o lodo henua gi geina.

³Digaula gu haga hali nia dodo o au daangada gadoo be nia wai. Nia dodo guu mmidi gadoo be nia wai laa lodo Jerusalem hagatau, tangada ne dubu i golo bolo e danu digau ala ne mmade ai.

⁴Nia guongo ala i madau baahi e haga balumee gimaadou. Digaula e gadagada mai gi gimaadou mo di haganneennee gimaadou.

⁵Meenei Dimaadua, Goe deelaa hua ga hagawelewele mai gi gimaadou gaa hana hua beelaa? Do hagawelewele la ga wele hua beelaa be di ahi?

⁶Huluhia do hagawelewele la gi nia henua ala hagalee daumaha adu gi di Goe, mo ang gi nia daangada ala hagalee dalodalo adu gi di Goe.

⁷Idimaa digaula la ne daaligi au daangada. Digaula guu hai hagahuaidu do henua.

⁸Hudee daaligidia gimaadou idimaa go nia huaidu o madau damana mmaadua. Dumaalia mai gi gimaadou dolomeenei. Madau hagadagadagagee huogodoo la gu hagalee.

⁹Meenei God, hagamaamaa ina gimaadou, haga dagaloaha ina gimaadou. Daawa mai gimaadou mo di dumaalia mai gi gimaadou madau huaidu, e hagalaamua ai do ingoo.

¹⁰Ma e aha dela nia daangada e heheeu mai gi gimaadou boloo, “Di godou God la i hee?” Heia gimaadou gi mmada adu gi di Goe e daaligi digau ala ne haga hali nia dodo o au gau hai hegau.

¹¹Hagalongo gi nia nnguu manawa gee o digau galabudi, hagamehede ina gi o mogobuna aamua digau ala belee daaligi gii mmade.

¹²Meenei Tagi, heia di tala di hui nnolongo haga hidu ang gi nia daangada o nia guongo ala e haganiga gimaadou i nia helekai huaidu huogodoo digaula ala ne hai adu gi di Goe.

¹³Gei gimaadou, ala go au daangada, ala go nia siibi o dau hagabuulinga siibi, ga danggee adu gi di Goe, gaa hana hua beelaa, mo di hagaamu Goe i nia madagoaa huogodoo i nia laangi ala gi maalia.