Salmo 79:2-13

²Din awak di napodno ay ipogaw mo ay mansilsilbin sik-a, inpakan da sin titit ya atap ay animal sin daga.

³Kaman danom ay inbokbok da sin nanliniked ed Jerusalem din dada da, yan magay mangiponpon en daida.

⁴Din nanasyon ay nanliniked en dakami, laslasoyen ya sis-iyekan das dakami.

⁵Ay mabonget kan dakamis eng-enggana, Apo? Ay adi mad-ep din kaman apoy ay bonget mo?

⁶Din bonget mo, ipalak-am mo koma sin nanasyon ay adi mandayaw ya mankararag en sik-a.

⁷Tan din ipogaw mo yan pinse da, din ilim yan dinadael da.

⁸Adi ka koman domosa begew sin basol di ap-apo mi. Maseg-ang ka kod en dakami ed wani, tan enggay magay namnama mi.

⁹Bomadang ka kod ta omisalakan ka, Apo, pakawanem basbasol mi gapo sin dayaw mo.

¹⁰Adim ipalobos ay din nanasyon yan kanan da, “Into pay din Diyos da?” Ipailam koman dakami din panosaam en daida begew sin namsean da sin mansilsilbi en sik-a.

¹¹Dengngem koma din adawag di balod, Apo, ta babaen sin panakabalin mo, din nakeddengan ay matey yan isalakan mo.

¹²Baesam koma si mamin pito din nanasyon ay nangoy-oyaw en sik-a, Apo.

¹³Et dakami ay ipogaw mo ay kaman mon karnero, man-iyaman kamis eng-enggana, Apo.