1“Siga Yerusalɛn kirane xɔn, i a rakɔrɔsi ki faɲi, i a feene fɛsɛfɛsɛ. I a yirene birin yito. Xa i muxu keden peen to naxan tinxinna nun ɲɔndin fɔxɔ ra, n diɲama nɛn Yerusalɛn kaane ma na yi.
2Hali e na a fala, e naxa, ‘N bata n kɔlɔ habadan Alatala yi!’ e kɔlɔma wulen nan fari.”
3Alatala, i mi lannaya muxun xan fenma ba? I bata e ɲaxankata, koni e mi fe kolonxi ayi, i wa nɛn e raxɔri feni, koni e mi xurun sɔtɔxi na yi. E yɛ xɔdɔxɔ alo fanyena, e tondi e xun xɛtɛ i ma.
4N yi n miri, n naxa, “Yiigelitɔne nan ne ra, e feene ligama xaxilitareyaan nin, bayo e mi Alatalaa kiraan nun e Alaa kiti saxine kolon.
5N sigama nɛn yɛɛratine fɛma, n sa falan ti ne xa. E tan Alatalaa kiraan kolon, e nun Alaa kiti saxine.” Koni, a li, e tan fan birin bata murutɛ Ala ma, e tondi xurɛ a bun.
6Nanara, yatan minima fɔtɔnni, a fu e ma. Kankon kelima burunna ra, a yi e yibɔ. Ɲarin dɔxɔma e yɛɛ ra e taane dɛxɔn, alogo naxan yo na mini, a yi na yibɔ a dungi dungin na. Bayo, muxuni itoe Ala matandin bata gbo ayi, e yanfantenyaan bata radangu ayi.
7Ala yi a fala, a naxa, “N diɲama ɛ ma di nayi? Ɛ diine bata e mɛ n na, e yi e kɔlɔ alane yi naxanye mi ala yo ra. N tan nan yi e balon soma e yii, koni e yi yalunyaan naba, e birin yi e gi siga yalundene banxine yi.
8E luxi nɛn alo soo xɛmɛ kɛndɛna, a nɛma wugɛ a gilɛɛn fɔxɔ ra, birin a lanfana ɲaxanla fɔxɔ ra.
9N mi lan n xa e saran na fe sifane ra ba? N mi n gbeen ɲɔxɛ na yama sifan na ba?” Alatalaa falan nan na ra.
10“Ɛ te e nakɔ sansanne ra, ɛ yi e rabira, koni ɛ nama e raxɔri! Ɛ wudi yiine ba e binle ma, bayo Alatala gbee mi fa e ra.
11Bayo, Yuda yamaan nun Isirayila yamaan bata n yanfa mumɛ!” Alatalaa falan nan na ra.
12E bata e mɛ Alatala ra, e yi a fala, e naxa, “A mi na! Tɔrɔn mi fa fama en ma sɔnɔn, En mi fa yɛngɛn toma, en mi kamɛma.
13Foyen nan tun nabine ra, Ala mi falan tima e xɔn. Nayi, e naxan falama, na xa e tan nan sɔtɔ.”
14Nanara, Alatala, Ala Sɛnbɛn Birin Kanna ito nan falaxi, a naxa, “Bayo ɛ bata na falan ti, n bata n ma falan sa i tan Yeremi dɛ, falan naxan luxi alo tɛɛna, yamani ito findima yegen nan na, na tɛɛn naxan ganma.”
15Alatalaa falan ni ito ra, a naxa, “Ɛ tan Isirayila yamana, n siyana nde rafama nɛn ɛ xili ma sa keli yire makuyeni, siya barakaxin nan a ra, naxan na yi xabu waxati xunkuye, ɛ mi naxan xui mɛma, ɛ mi naxan ma falan yɛɛ toma.
16E xalimakunle faxan tima han! E muxune birin findixi sofa wɛkilɛxine nan na.
17E fama ɛ se xabaxine nun ɛ donseene birin naxɔrideni nɛn, e nun ɛ dii xɛmɛne nun ɛ dii tɛmɛne, e nun ɛ xuruse xunxurine nun a xungbene, e nun ɛ manpa binle nun ɛ xɔdɛ binle. E yi ɛ taa makantanxine kala yɛngɛni ɛ yigi saxi taan naxanye yi.”
18Alatalaa falan ni ito ra, a naxa, “Koni hali na waxatini, n mi ɛ raxɔrima fefe.
19Nayi, muxune na maxɔdinna ti, e naxa, ‘Nanfera, Alatala, en ma Ala ito birin ligama en na?’ I tan Yeremi yi e yabi, i naxa, ‘Bayo ɛ bata ɛ mɛ a ra. Ɛ yi ala xɔɲɛne batu ɛ yamanani. Nayi, ɛ sa walima nɛn xɔɲɛne xa yamana gbɛtɛni dɛnaxan mi findixi ɛ konna ra.’ ”
20“Ɛ ito fala Yaxuba bɔnsɔnna muxune xa, ɛ a fala Yuda yamanani, ɛ naxa,
21Ɛ tuli mati ito ra, ɛ tan yama xaxilitaren miritarena! Ɛ yɛɛne na, koni ɛ mi sese toma! Ɛ tunle na, koni ɛ mi sese mɛma!
22Alatalaa falan ni ito ra. Ɛ mi gaxuma n yɛɛ ra ba? Ɛ mi xuruxurunɲɛ gaxuni n yɛtagi ba? N tan nan baan ɲɛmɛnsinna findixi fɔxɔ igen danna ra, a mi nɔɛ naxan yigidɛ habadan. A walanne tema, koni e mi a nɔɛ, e xuxu xuiin minima, koni e mi danguma a ra.
23Koni yamani ito muxune tengbesen, e murutɛxi e bɔɲɛni, e xun xanbi so, e siga.
24E mi e mirima, e naxa, ‘En xa gaxu Alatala yɛɛ ra, en ma Ala, naxan tulen nafama a waxatini, tule singen nun tule dɔnxɛna, naxan se xaba waxatine ragidixi en xa.’
25Ɛ hakɛne nan ne baxi e kiini. Ɛ yulubine yi ɛ munanfanna kala.
26Bayo muxu ɲaxine n ma yamaan yɛ, alo xɔli suxun naxanye xɔline mamɛlɛnma, e lutine ratima muxune yɛɛ ra.
27E banxine rafexi muxune se kansunxine ra alo xɔli suxun xɔli sa seen nafema kii naxan yi. E findixi sɛnbɛmane nun nafulu kanne ra na kii nin.
28E fatin bata fanɲɛ ayi, e tuyanxi. Dan yo mi e fe ɲaxine ma. E mi kiridine xun mafalama kitini. E nafunla sɔtɔma tun! E mi tɔrɔ muxune xun mayɛngɛ kitine bolonma.
29N mi lan n xa e saran na fe sifane ra ba? N mi n gbeen ɲɔxɛ na yama sifan na ba?” Alatalaa falan nan na ra.
30“Fe ɲaxin bata so yamanani naxan magaxu mumɛ!
31Nabine wule nabiya falane nan tima. Saraxaraline nɔyaan ligama e yɛtɛ sɛnbɛn nan xɔn. Anu, a rafan n ma yamaan ma na kiini. Koni a raɲanna na a li, ɛ nanse ligama nayi?”
