SEDEMII 46

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Ntɛ Kuyie nní nnɑ̀kɛ́ tì mí nSedemii yɛbotɛ̀ kpɛ́í.

²Kuyie nnɑ̀kɛ́ tì Esibiti kpɛ́í nɛ̀ o kó bɛhɑ̃ɑ̃pɔ̀mbɛ̀, nɛ̀ bɛ kóo kpɑ̀ɑ̀tì Nɛko, ò do bo Kɑdikemiisi nwe kukó nhEfɑdɑti mpɛɛ́mmɛ̀ kɛ̀ Nɛbukɑnnɛsɑɑ Bɑbidɔnni kóo kpɑ̀ɑ̀tì ò do mudoò kóò nɑ. Dɛ̀ do sɔ̃́ nSudɑɑ kɔbɛ kóo kpɑ̀ɑ̀tì Sosiɑsi birɛ Sosɑkimmu bo o kpɑ̀tì benni dinɑɑnnì ndi.

³Kɛ̀ Kuyie ndɔ̀: Tũntɛnɛ̀ di dɔpììtì sɑ́m̀pɔ́tì nɛ̀ tidiɛtì, kétɛ́nɛ̀ kɛ́kɔtɛ mudoò.

⁴Boúnɛ̀ sisɛ̃ĩ́ si kɔ̃̀nkɛ̀, bɛsɑ̃ndèèbɛ̀ dekɛnɛ̀ di sɛ̃ĩ́, ókɛ́nɛ̀ di pìkɛ̀ kɛ́cómmú, sṹɔ̃́kɛ́nɛ̀ di kpɑ̃ɑ̃̀! Piinnɛ̀ tikɔ̃̀ntì di cĩ̀ncĩ̀rɛ̀.

⁵Bɑ nni ndɛ n nɛ́ wúómmɛ̀? Kufɔ̃wɑɑ́ nkuù bɛ̀ ɑutɛ́, kɛ̀ bɛ̀ bótìrì kɛ wĩɛ̃ti bɛ fɔ̃nkó, kɛ̀ bɛkɔ̃mbɔ̀tiebɛ duò, kɛ cokù bɑ́ bɛ̀ í wɛ̃ɛ̃riní, kufɔ̃wɑɑ́ nnɛ́ nku tipíìtì timɔu. Mí ndi Yiɛ̀ nKuyie míì bɛ́i!

⁶Tɛnɑɑ̀cɛ̀cɑ̃ɑ̃tɛ yiɛ̀ mbɑ́ bennɛ́ kɛ́cokɛ́, okɔ̃m̀bɔ̀teu í yóó cootɛ́, kubɑkù yoú bíɛ́kɛ̀ kukó nhEfɑdɑti kó mɛpɛɛ́mmɛ̀, bɛ̀ dɛ mbétírí kɛ duò.

⁷Wennínwe wèè iitiní, kɛ dò nkukó nNiidi ɔ̃ɔ̃ tɑ mɛniɛ kɛ́nyiitimɛ̀? We nkùtiri kɛ kpɛ́inko, ikó ndiɛyì kó yɛnɛ́fĩ̀nfĩ̀rɛ̀ kɔ̃mɛ?

⁸Esibiti weè iitiní kukó nNiidi kɔ̃mɛ, kòo niɛ mpiɛku ikó ndihɛì tɛ̃mɛ̀! Weè do nɑ́ɑ́ nkɛ tú: M bo píɛ nkɛ dɑ́tínnɛ́ yɛhɛkɛ̀ nɛ̀ yɛ nìtìbɛ̀.

⁹Sisɛ̃ĩ́, kétɛ́nɛ̀! Sinɑɑsɛ̃ĩ́ butɛ́nɛ̀ yɛtɑ̀rɛ̀, bɛkɔ̃m̀bɔ̀tiebɛ yɛ̀nnɛ̀nní, Etiopii nɛ̀ Puti dɛ ɛkɛ̀ kɔbɛ bɛ̀ɛ̀ nɔ nkɛ kɛ́í ntidɔpììtì. Duti ɛì kɔbɛ díndi bɛtɑ̃ntɑ̃ũbɛ̀.

¹⁰Di nyiè tu mí ndi Yiɛ̀ nKuyie Mpɑkɛdɑɑ kpɛri ndi, diyiè ndi n yóó pɛitɛ ndì n dootitɔbɛ̀, n kpɑ̀rìseú bo si kɛ́nsɑ̀nnɛ̀, n seú bo yɑ̃̀ mɛnitiyĩ̀ĩ̀ kɛ́muɔ́. Mí ndi Yiɛ̀ nKuyie míì ɑ̃nnɛ́ diféúbɑnni, kubɑkù yoú kó kutempɛ̃ kukó nhEfɑdɑti pɛɛ́mmɛ̀.

¹¹Esibiti kɔbɛ kpɛrɛ dò mmɛsémmɛ̀ mmɛ, kɔtɛnɛ̀ Kɑdɑɑdi mutie wɑmmù kɛ̀ di dɔ́ di wɑmmú kɛ́wɑmmú dɛtie dɛtetìrɛ̀ ndɛ, mutie mɑmù í bo mùù bo di tɑɑ̀.

¹²Yɛbotɛ̀ kèèmu di dimɛ̀ ifɛi, yɛ̀ kèèmu di kuɔ̀mmɛ̀, kɛ kèè okɔ̃m̀bɔ̀teu cootimɛ̀ kɛ bètɛ́ otɔù kɛ̀ bɛ̀ do bɛdɛ́.

¹³Kɛ̀ ti Yiɛ̀ nKuyie nni nnɑ́kɛ́ mí nSedemii Bɑbidɔnni kóo kpɑ̀ɑ̀tì Nɛbukɑnnɛsɑɑ kɔ̀rimɛ̀ kɛ bo do Esibiti kɔbɛ mudoò.

¹⁴Pĩɛ̃kɛ́nɛ̀ ti Esibiti, yeenɛ̀ ti Mikidɔdi ɛì kɔbɛ, yeenɛ̀ ti Mɑnfi nɛ̀ Tɑpɑnɛsi ɛkɛ̀ kɔbɛ, nɑ́kɛ́nɛ̀ bɛ kɛ tú: Bɑ́ɑ́tínɛ̀ kɛ yɛ̃́ bɛ̀ domɛ̀ di pɛɛtitɔbɛ̀ mudoò.

¹⁵Dɛ̀ nɛ́ dòmmɛ kɛ̀ di kó dibɔɔ̀ Apiisi do? Dɛ̀ yĩ́mɛ kòò yɑ̀ntoo? Ti Yiɛ̀ nKuyie nkuù ò yèètɛ.

¹⁶Bɛhɑ̃ɑ̃pɔ̀mbɛ̀ kusṹkù bétírí kɛ duòmu bɛtɔbɛ̀ ĩ́nkɛ̀, kɛ nɑ́ɑ́ mbɛtɔbɛ̀ kɛ tú: Ítɛ́nɛ̀ kɛ̀ ti kɔtɛ ti kɔbɛ borɛ̀, ti ɛì bɛ̀ ti piɛ́ dɛ̀, kɛ́yentɛ́nɛ̀ kukpɑ̀rìseú yɛiku.

¹⁷Yúnɛ̀ Esibiti kóo kpɑ̀ɑ̀tì kɛ dɔ̀: Kutoweku dɛtetìrɛ̀ kɔku yiɛ̀, ò yóu kɛ̀ dɛ̀ ɔɔtɛmu.

¹⁸Kɛ̀ Ti Yiɛ̀ nKuyie mbɛ́i nkɛ dɔ̀: Tɑbɔɔ tɑ̃rì dɛunɛ̀mɛ̀ yɛtɑ̃rɛ̀ sɔnyɛ, Kɑdimɛɛdi tɑ̃rì ikúnɛ̀mɛ̀ dɑ̀mɛ́ɛ̀rì, Esibiti kóo kpɑ̀ɑ̀tì kèríní kɛ yó nkpeńnì mɛɛ̀ botí. M bomu, mí nhokpɑ̀ɑ̀tì wèè yètìrì tu Mpɑkɛdɑɑ kɛ̀ míì bɛ́i.

¹⁹Díndi Esibiti kɔbɛ, pɑ̃̀nkɛ mbounɛ̀ di nɛntì, bɛ̀ yóó di pĩ́mmúmu, Mɑnfi kó dihɛì bo dɔúnko kɛ́nɑɑ́ ndikpɑ́ɑ̀, dì bo cɔ́útɛ́ kɛ́nɑɑ́ ntidobontì.

²⁰Esibiti tu dinɑɑsɛrì sɑ̀ɑ̀rì ndi, kɛ̀ disɑ̃nsũɔ̃̀ mɛ nyìtɛ́ní kubɑkù yoú bíɛ́kɛ̀ kɛ kéríní, dì kèrínímu.

²¹Bɛhɑ̃ɑ̃pɔ̀mbɛ̀ bɛ̀ yietí bɛ̀ mudoò kpɛ́í, bɛ̀ í cɑ̃́ɑ̃́nnɛ̀ yɛnɑɑdɑkɛ̀ bɛ̀ dùnnɛ yɛ̀, bɛ̀ múnkɛ bùtínnɛ́mu kɛ dɛ̀ítɛ́ itɑ̃́ɑ̃́, bɛ̀ cokɛ́mu bɛmɔu, òmɔù í bɑ̀ɑ̀o, bɛ kó mudorimù muù tùɔ̀kɛ, bɛ yɛ̃ĩti yiè diì tùɔ̀kɛ.

²²Kɛ̀ bɛ̀ tu núɔ́ɔ́, fɛwɑ̀ɑ̀fɛ̀ ɔ̃ɔ̃ kèè kuwɑɑroo kɛ́yĩ́mɛ̀. Bɛ dootitɔbɛ̀ bɛɛ̀ kèríní ditĩ̀nnì nɛ̀ sipɛ̃ɛ̃́ bɛtekɔ̃ũbɛ̀ tɛ̃mɛ̀.

²³Bɛ̀ yóó kɔ̃ṹmu o túúkù. Mí ndi Yiɛ̀ nKuyie míì bɛ́i! Bɑ́ kù mɛ nfĩḿmɛ̀ kɛ í dò nkɛ́nɑ kɛ́tɑ, kɛ yɛ̃́ bɛkɔ̃ũbɛ̀ sũmɛ̀mu kɛ dò nfɛcofɛ dòmmɛ̀, kɛ í dò nkɛ́nɑ kɛ́kɑɑ nkɛ́deè.

²⁴Ifɛi iì kùɔ̀ Esibiti ɛì kɔbɛ, kubɑkù yoú bíɛ́kɛ̀ kɔbɛ bɛ̀ nɑmu.

²⁵Mí ndi Yiɛ̀ nKuyie Mpɑkɛdɑɑ Isidɑyɛɛribɛ tũ nkù míì bɛ́i nkɛ tú: N yìtɛ́ kɛ còḿmúmu dibɔɔ̀ Amɔɔ dìì bo Tɑbɛsi ɛì di kpɛ́í, Esibiti kóo kpɑ̀ɑ̀tì nɛ̀ o nìtìbɛ̀ bɛ kpɛ́í, Esibiti kɔbɛ nɛ̀ bɛ kóo kpɑ̀ɑ̀tì nɛ̀ bɛ̀ɛ̀ ò bùɔ́ bɛ kpɛ́í.

²⁶N yóó bɛ̀ ɑ̃nnɛ́mu bɛ̀ɛ̀ dɔ́ bɛ kɔ̀ù bɛ nɔu miɛkɛ, bɛ̀ɛ̀ tu: Nɛbukɑnnɛsɑɑ Bɑbidɔnni kóo kpɑ̀ɑ̀tì nɛ̀ o kɔbɛ, o kó bɛtɔ̃mbɛ̀. Dɛ kó difɔ̃nkúò kɛ̀ Esibiti ɛìi wɛ̃tɛ kɛ́mɑɑ́ di do dòmmɛ̀ nɛ̀ dimɔ̀nnì. Mí ndi Yiɛ̀ nKuyie míì bɛ́i.

²⁷Díndi n kóo tɔ̃ntì Sɑkɔbu yɑɑ̀bí di bɑ́ nyĩɛ̃̀kù, díndi Isidɑyɛɛribɛ di bùɔ̀tì bɑ́ nduò. N yóó di dennɛmu dihɛì dɛ́tirì miɛkɛ, di yɑɑ̀bí í yó nkpɑɑní bɛ̀ ì pĩ̀ḿmu kɛ kònnɛ̀ kɛ̀. Sɑkɔbu yɑɑ̀bí wɛ̃timu kɛ bo kɑri bɑ̀mmùù bɑ́ òmɔù bɑ́ nyì kɔɔ́nnɛ̀.

²⁸Díndi n kóo tɔ̃ntì Sɑkɔbu yɑɑ̀bí di bɑ́ nyĩɛ̃̀kù, n di bonɛ̀mu, n yóó kuɔmu ibotí imɔu, n di cìɛ́ nkɛ̀ di tɑɑ́ ìì miɛkɛ, m bo ì dèè m mɛ nyí yóó deè díndi biɛ, n nɛ́ yóó di potɛ́mu di mɑ̀nnɛ̀ tìì yɛ̃ĩti, dɛ̀ í tú n yó ndi wúónko mɛmmɛ, kɛ dò ndi í cɑ̀ɑ̀rɛ̀ mùmɑmù. Mí ndi Yiɛ̀ nKuyie míì bɛ́i.