Talun Ngana 24:52-63

⁵²Pe Apraham nena hekuleileinga ana non neu longe ke mau pe tualou sio langa ich pe heto heke Non Soke.

⁵³Ol pe lochloch hote ure chalemlem ngana mur pe um chalemlem ngana nenge koikoi pe hengeron mur pe tunge iri lange Rebeka. Pe pule tunge tunginga mur nenge ururia haka toto lange liuna Lapan pe nge tana.

⁵⁴Ke het pe i pe hana nenge te at luluch nge i te ngau pe te in pe te mamani nga miliko lamau. Pe nga uach uruna toto te lo haka pe ana non hele, “A longele iau ke e la mule nge ak soke ol.”

⁵⁵Pe Repeka liuna pe tana te hele ke te teke, “A longala ke atu pol mukam ke he nem tu luluch nge imem ke etue iri analoch ke het pe ala ol.”

⁵⁶Pe ana non hele lange iri ke teke, “A poi hulul ia iau ero, Non soke poia lek inga nganangana ke lohot lo. A longele iau ke ela mule nge ak soke ol.”

⁵⁷Pe iri te hele ke te teke, “Iok ta iu hote hei malolong ngana nem pe ta onteia lemene ngana.”

⁵⁸Iok te iu hote Repeka pe te onteia i ke te teke, “Non nei teke i mulmule lokoi. Pomerei o teke o la lululuch nge i loma?” Pe ana hei tuacholia ke teke, “Oe! E lala lo i.”

⁵⁹Pomalam te longele liuria Repeka ke la luluch nge Apraham nena hekuleileinga ana non neu pe nena hana mur. Pe hei nenge nauelele Repeka nga i kino ngana, la luluch nge iri pule.

⁶⁰Pe te pete Repeka ke te teke, “Opoi! Liumem Repeka la tau. Non Soke pete iong ke o hoho pe tutum mur lape iri halang nge halang toto; pe lape lem tete mur te mene tote reria ngarang mur reria tuele tatana mur.”

⁶¹Ke het pe Relpeka pe nena hekuleileinga ana hehei hel pule te lohaka nga kamel nemur pe te la mule luluch nge non neu. Ke hekuleileinga ana non neu mene i pe te la sapele.

⁶²Te i ke te la mulmule nge Kenan pe Isak lohaka nga ech matana nenge Pia Lahai Roi ke la tu nge Nekep.

⁶³Pe nga ulei e ana non la ke i rara nge hot nga ich nenge te tua ngaunga ia. Pe teke ule matana la pe esia kemel mur nge te atat.