1Joiji na toenxin lago mé, ngain nonttehe Gadara.
2Co are Jesús vac̈hjexin de ngá barco, joí ngain Jesús ná xí que vechonda espíritu jianha.
3Xí mé vehe ngaxinhi tti vaẍanguindehe na chojni que ndavaguenhe tiempo mé. Co ẍonhi chojni coixinhi coia xa masqui conixin cadena.
4Tsje nttiha are icha saho chojni ẍa vaquixinhi na vaquiaxin na xa cadena rotté xa co rá xa, pero cainxin tiempo jehe xa vaconc̈hintaon xa cadena co vagáña xa cadena. Co iẍonhi chojni vaquixinhi ngain xa.
5Co cain tti vacji xa ngagaha jna co ngaxinhi tti vaẍanguindehe na chojni que ndavaguenhe puro vacoyao xa ttie co nchanho, co vanchenihi nttaohe xa conixin ẍo.
6Pero are vicon xa Jesús ẍa cjion, jehe xa coinga xa joí xa ngain Jesús co vettoxin nttajochjihi xa ngattoxon con Jesús;
7co ndac̈ho xa sén: ―¿Quedonda dixintte nganji, jaha Jesús, Xenhe Dios que ttjen ngajni? Conixin nombré Dios nttatsanha ñao que ncheguetanha na tangui janha.
8Ndac̈ho jañá ixin Jesús ojindac̈ho ngain: ―¡Jaha espíritu jianha, sattjixin de ngain xí jihi!
9Co Jesús joanchiangui co ndac̈ho: ―¿Queẍén dinhi jaha? Co jehe espíritu jianha ndac̈ho: ―Janha dinhi na Legión ixin janha na anto tsje na.
10Co espíritu jianha anto joinchetsenhe ñao Jesús ixin senguixinha de ngain región mé.
11Co ixin nttiha vintte anto tsje cocochi vajinea va chiaon rotté ná jna,
12mexinxin cain espíritu jianha joinchetsenhe ñao Jesús co ndac̈ho: ―Rroanha ni ra ngain cocochi taha co tanc̈hjanda ni ra sixinhi na ngaxinhi va.
13Cottimeja Jesús joanjo joachaxin, co cain espíritu jianha mé vac̈hjexin de ngaxinhi xí mé, co sajoixinhi ngaxinhi cocochi. Nttiha vintte inchin yó mil cocochi, co cainxin cocochi mé ndavinttecoloco va co coinga va xincanji va ngain lago co nttiha joingui va jinda co ndavintteguenxin cainxin va ixin vinttecjonhe va jinda.
14Cottimeja cain chojni que vaquingaria cocochi mé ẍaon na co coinga na joiquequín na chojni ngagaha rajna co icha chojni que vintte ngataon jngui. Co cjoi chojni mé joitsjehe na quehe conhe.
15Co are joiji na tti jí Jesús, vicon na tti xí que vechonda tsje espíritu jianha ojingá xa lonttoe xa co tají xa ndacoa. Co jehe na are vicon na mé, anto ẍaon na.
16Co cain chojni que vicon coequin na queẍén conhe tti xí que vechonda tsje espíritu jianha co queẍén conhe cain cocochi.
17Cottimeja cain na coexinhi na joinchetsenhe na ñao Jesús que satsjixin de ngain nonttehe na.
18Are Jesús coani barco, tti xí que vechonda tsje espíritu jianha joinchetsenhe ñao Jesús ixin rrocji ngain Jesús cai.
19Pero Jesús c̈hoha, co ndac̈ho: ―Sattji para nchiandoi co diquequinhi cain ni ichó cainxin tti joinchehe Dios nganji, co queẍén coiaconoaha.
20Cottimeja tti xí mé sacjoi co joiquequín chojni que vintte regioen Decápolis cainxin tti joinchehe Jesús ngain jehe. Co cainxin chojni que coinhi, goan na admirado.
21Co are Jesús cjan toenxin lago iná conixin barco, cjoi anto tsje chojni ngain Jesús, co jehe nttiha tavehe ngandehe jinda.
22Cottimeja joí ná xí que vaquetonha xa ngain nihngo nttiha, co vinhi xa Jairo. Are Jairo joí, vettoxin nttajochjihi ngain Jesús,
23co anto joinchetsenhe ñao Jesús co ndac̈ho: ―Xannc̈hichjanhna ndajidenhe xan. Nttatsanha ñao, chjin na co ttín rá ngataha xan para rroxingamehe xan co sechon xan icha.
24Cottimeja sajoicao xí mé Jesús. Pero anto tsje chojni cjoi cai co anto conttedo na ngaca Jesús.
25Co ngacjén chojni mé vehe ná nc̈hí que venihi nc̈ha; ovechonda tteyó nano que veguenguihi nc̈ha jni.
26Co anto tsje ngain xincheẍoan cjoi nc̈ha pero ẍonhi ẍoan vittja. Ojoexin joinchexinhi nc̈ha cainxin tti vechonda nc̈ha, pero icha co icha venihi nc̈ha.
27Co are coinhi nc̈ha ixin Jesús vanchexingamehe tsje chojni, conchienhe nc̈ha ngacjén chojni co jimao catte nc̈ha lonttoe Jesús,
28ixin vaẍaxaon nc̈ha co vandac̈ho nc̈ha: “Si rrocatte masqui jeho lonttoe Jesús, janha rroxingamana.”
29Co are nc̈hí mé catte nc̈ha lonttoe Jesús, rato mé tavehe jni que jehe nc̈ha vechonda nc̈ha. Co conohe nc̈ha ngain cuerpoe nc̈ha ixin ondaxingamehe.
30Cottimeja Jesús conohe ixin ná chojni ojoinchegonda joachaxin que chonda Jesús. Mexinxin ngaria Jesús co tsjehe ngayehe chojni co joanchiangui co ndac̈ho: ―¿Quensen catte lonttona?
31Cottimeja chojni que vacao Jesús ndac̈ho na: ―Soixin dicon que anto tsje chojni tonttedo na ngaca soixin, mexinxin quedonda soixin danchiangui: “¿Quensen catte?”
32Pero Jesús tsjehe ngayehe na para rroguicon quensen catte lonttoe.
33Cottimeja nc̈hí mé onohe quehe conhe, co jiẍanga nc̈ha de ixin joaẍaon cjoi nc̈ha vettoxin nttajochjihi nc̈ha ngain Jesús, co ndac̈ho nc̈ha ixin quehe joinchehe nc̈ha.
34Cottimeja Jesús ndac̈ho ngain nc̈hí mé: ―Jaha oxingamaha ixin vitticaon na. Sattji contenta ixin irrocjanha tsoniha de ixin chin que jaha joarichonda.
35ẍa jinichja Jesús jañá are joí canxion chojni de ngain nchiandoha Jairo co ndac̈ho na ngain Jairo: ―Xanha ondavenhe xan. Inchemolestaha ximaestro.
36Pero Jesús joincheha caso tti ndac̈ho na, co ndac̈ho Jesús ngain Jairo: ―Ẍaonha; jeho ditticaon na janha.
37Co sajoicao Jairo Jesús ngain nchiandoha pero Jesús c̈hoha joicao tsje chojni, jeho Pedro, Jacobo co Juan xanchó Jacobo.
38Co are joiji na ngain nchiandoha Jairo, cainxin chojni que te nttiha anto tetsjanga na co tetoyao na.
39Jesús joixinhi co ndac̈ho ngain na: ―¿Quedonda anto toyao jaha ra co tsjanga ra? Xannc̈hichjan ndavenha xan, jeho tajijoa xan.
40Pero jehe na cjoanoa na Jesús. Cottimeja Jesús ndache cain chojni mé que vac̈hjexin na de nchia. Co jeho Jesús conixin ndodé xannc̈hichjan co janné xan conixin tti ní chojni que joicao Jesús joixinhi na tti jí xannc̈hichjan mé.
41Co Jesús tsehe rá xan co ndac̈ho ngain xan: ―Talita, cumi ―que rroc̈ho: Xannc̈hí, janha rrondattjo, dingattjen.
42Co rato mé, jehe xannc̈hichjan mé, que vechonda tteyó nano, vingattjen xan co nchao sacjoixin rotté xan. Co cain chojni nttiha anto goan na admirado.
43Pero Jesús anto coetonhe na ixin ẍonhi chojni rrondache na de ixin tti joinchehe Jesús. Co ndac̈ho Jesús cai ixin rrochjé na xannc̈hichjan mé sine xan.
