1Ala kava neꞌmo alagepa vekamo maiꞌniyaꞌmofeꞌmo agaefekeꞌmo hao ke heyo. Hau huno neꞌapateyanageno muki afinaꞌaeꞌmo hau huno apatege apatege huno maigiye.
2Isaleli vayaꞌmogitamo, Hau huno neꞌapateyanageno muki afinaꞌaeꞌmo hau huno apatege apatege huno maigiye, huta higetao.
3Eloni nofi vayaꞌamogitapamo, Hau huno neꞌapateyanageno muki afinaꞌaeꞌmo hau huno apatege apatege huno maigiye, hutapa hiyo.
4Muki vayaꞌamogitapamo agaefekeꞌmo koli hutetapa mono nehaya vayaꞌmogitapamo, Hau huno neꞌapateyanageno muki afinaꞌaeꞌmo hau huno apatege apatege huno maigiye, hutapa hiyo.
5Lusi hanageke yaꞌmo aliꞌneꞌnaeꞌmo Ala kava nefekeꞌmo keya aeꞌna ge huꞌnogenoꞌaeꞌmo geꞌnimo afiteno hatu maeno nateꞌnigeꞌna afaꞌa maiꞌnove.
6Ala kava neꞌmo nagae vekamogeno naha maesiyafeꞌmo maiꞌniyaꞌmofeꞌmo vayaꞌmogi nagaetegamo hisaya kavafeꞌmo koli osuguve.
7Ala kava neꞌmo nagae vekamogeno naha maesiyafeꞌmo maiꞌniyaꞌmofeꞌmo apakeꞌnovana kame vayaꞌnimo asagauꞌa aigae.
8Vayaꞌmogimo laha maesayafeꞌmo lagesamo afisunana kanale osugifa Ala kava nefekeꞌmo laha maegaiye, huta lagesamo afisunana kanale hugiye.
9Ala apaki aliteꞌa neꞌyagaiya vayaꞌmogi laha maesayafeꞌmo lagesamo afisunana kanale osugifa Ala kava nefekeꞌmo laha maegaiye, huta lagesamo afisunana kanale hugiye.
10Muki alu nofi vaya alu nofi vayaꞌmo kame vayaꞌnimo maiꞌneꞌa faiꞌa ku aiꞌa nateꞌnageꞌnaeꞌmo Ala kava neꞌmo himamuꞌaletiꞌmo alagi aliꞌna hano huꞌna apatalegauve.
11Muki haopalega maiꞌneꞌa faiꞌa ku aiꞌa nateꞌnageꞌnaeꞌmo Ala kava neꞌmo himamuꞌaletiꞌmo alagi aliꞌna hano huꞌna apatalegauve.
12Kevegevegana huꞌa faiꞌa ku aiꞌa nateꞌnayaꞌmonanafa aufe nofipiꞌmo malage huno atamo leno yu neheya kava huꞌna Ala kava neꞌmo himamuꞌaletiꞌmo alagi aliꞌna hano huꞌna apatalegauve.
13Kameꞌnimogae, huꞌna, alika nagoꞌya faitalanageꞌna heleve hugefe huꞌnogenoꞌaeꞌmo Ala kava neꞌmoꞌa naha maeꞌniye.
14Ala kava neꞌmoꞌa lokiya vaino nateꞌnigeꞌna yoke nehuve. Agaemo nagufamo ago alino katino nateꞌniye.
15Afiyo, huꞌna, alagepa vayaꞌmogimo seli noꞌapifatiꞌmo apakufamo ago alino katino apateꞌniya kavafeꞌmo yoke huꞌapaeꞌmo, Ala kava neꞌmoꞌa himamuꞌaletiꞌmo ani kavaꞌmo huꞌniye.
16Himamuꞌaletiꞌmo aeta apakaseꞌnone, huꞌa nehae.
17Ofaliꞌna afaꞌa maiꞌneꞌnaeꞌmo Ala kava neꞌmoꞌa huꞌniya kavafeꞌmo ava gemo aeꞌna hakalo huꞌna hapa paiguve.
18Ala kava neꞌmoꞌa lusi kava huno namagiꞌniyaꞌmonanafa falisuvafeꞌmo afaꞌa oꞌnataleꞌniye.
19Alopa mono noꞌmo kitamo yakika nategeꞌnao haiꞌna Ala kava nefeꞌmo hao ke heno.
20Ala kava neꞌmoꞌa kipaꞌamo haneꞌnigeꞌa alagepa vayaꞌageꞌmo faleꞌa nehaiye.
21Geꞌnimo afiteka nagufamo alika katika nateꞌnanaꞌmofeꞌmo kahao ke nehove.
22Yafatetiꞌmo no nekiya vayaꞌmogimo mago no nekiya yafafeꞌmo, afa yafane, huꞌa huteꞌa aliꞌa yaga auꞌa ataleꞌnagenoꞌaeꞌmo Gotiꞌa ani yafafeꞌmo, hogote yafaꞌmo noꞌmo faiꞌna atesuvafeꞌmo konale yafaꞌmo haneꞌniye, huno huteno alino asaga huno ateꞌniye.
23Ala kava neꞌmoꞌa ani kavaꞌmo huꞌnigetaeꞌmo ageteta aeto agufa kanale kava huꞌniye, huta lahau aiꞌnone.
24Ala kava neꞌmoꞌa ani afinaꞌmo hu maleꞌniye. Ani afinaꞌmo lamogaga aigetao.
25Aukaya hutaeꞌmo, O Ala kava nene, huta, lagufamo alika katika lato. O Ala kava nene, huta, laha maegenoꞌao aliꞌyatimoꞌmo alagepa huno afole aino, huta aukaya nehune.
26Gotiꞌa Ala kava neꞌmo agiꞌalefeꞌmo neꞌeya vekamo fiku ha maeno amino. Lagaemo Ala kava neꞌmo mono noꞌafatiꞌmo Gotiꞌa fiku lapa maeno lapamino, huta nehune.
27Ala kava neꞌmo Gotiꞌa maiꞌniye. Agaemo ha le yaꞌamo alino lamiꞌniye. Ofalini afumo alitapa hiꞌyalamuteꞌmo maleꞌnetapa nofitetiꞌmo kitapa atafau maleyo.
28Gotiꞌnimogamo maiꞌnananageꞌna kahao ke hegauve. Gotiꞌnimogamo maiꞌnananageꞌna ala kagikamo kamiguve.
29Ala kava neꞌmo alagepa vekamo maiꞌniyaꞌmofeꞌmo agaefekeꞌmo hao ke heyo. Hau huno neꞌapateyanageno muki afinaꞌaeꞌmo hau huno apatege apatege huno maigiye.
