1Amumi Dwata, ise di gami fye gumlé dad to dayen. Ise di gami! Alò ge i fye gumlé dayen du mdà di kakdom landè kgilin na too ge gsalig.
2I dad to di dad sahal banwe, kan ku snalekla gami, manla, “Tanè i Dwatayu?”
3Én gami Dwata, ditù kenen di langit, na nimoan balù tan i knayean.
4Kabay i dad fnangamfù dad to i smalek gami, alò nimò mdà di salafì na blawen, dad ise glut dwata du nimò alò i dad to.
5Nun bàla, bay là ale gtalù, na nun matala, bay là ale mite.
6Nun klingela, bay là ale mlinge, na nun ilungla, bay là ale gambun.
7Nun kmalla, bay là ale gamgagot, na nun blìla, bay là ale gagu, na balù satu uni, landè di bkakongla.
8I dad to mimò dun, mbaling dad to landè gukmamu salngad i dad dwata nimòla, na salngad kagkah i dad to smalig di dad ise glut dwata.
9E gamu bel Israél, smalig gamu di Amuito Dwata, du kenen alò i gamtabeng na kamlung gamu.
10Gamu dad bàmi di Dwata, i bel Aron, smalig gamu di Amuito Dwata, du kenen alò i gamtabeng na kamlung gamu.
11Kdeeyu dad to nun klikò di Dwata, smalig gamu di kenen, du kenen alò i gamtabeng na kamlung gamu.
12I Amuito Dwata là mlifet gito, na toon ito banlé kafye, banlén kafye i bel Israél, na banlén kafye i dad baito di Dwata, i bel Aron.
13Banlén kafye i dad to nun klikò di kenen, i dad to mdatah na dad to mdanà, salngad i kablén kafye di dale.
14Gamu, na kel di belyu, too fbel moon i Amuito Dwata.
15I Dwata mimò i langit na tanà, fye moon ku mlé kenen kafye di gamu.
16I langit, alò Dwata mfun dun, bay i tanà, tablén di dad to.
17I dad to mati, dunan i talà nan gtalù, là ale gamdayen i Amuito Dwata.
18Kabay gito dad to mto, mlé ito fye di kenen, mdà di duh ani na kel di landè gusenan. Dnayenito i Amuito Dwata!
