1Koari doduru vina betobeto zuapa vuaheni, si kaqu veko pani gamu sari na gale tadirini pu veko gale koa gamu.
2Guahe si kaqu tavetia gamu: Gamu doduru sapu ade paki nia poata si keke tie Izireli turaṉamia, si kaqu veko pania sa nana gale. Lopu kaqu podekia sa pude la vagia sa poata, ura e Zihova tu telena zama nia pude veko pania sa gale.
3Kote boka vagia gamu sa mia poata koasa tie karovona pu veko gale koa gamu, ba lopu kaqu boka vagia gamu sa poata koa keke turaṉamia soti pu veko gale koa gamu.
4Lopu keke koa gamu Nana tinoni soti si kaqu koa malaṉa, ura kaqu manani gamu e Zihova sa mia Tamasa si gamu, koasa popoa sapu kaqu ponini gamu Sa,
5be va tabei na kopuni gamu pa korapa bulomia sari doduru tiṉitoṉa saripu va tumatumaeni gamu rau pa rane ṉinoroi.
6Kaqu manani gamu Sa, gua si va tatara nia e Zihova koa gamu, meke sokudi ri na butubutu si kaqu ta adei paki poata koa gamu. Ba lopu kaqu keke koari na butubutu sara, si kaqu ade pakini gamu poata. Kaqu baṉara ni gamu pa mia ṉiniraṉira sari soku butubutu, ba loke butubutu si kaqu baṉarani gamu si gamu.
7Be koa nana si keke tie Izireli turaṉamia soti, sapu malamalaṉana, meke koa si asa pa keke vasileana koasa popoa sapu ponini gamu e Zihova sa mia Tamasa, si mi lopu puhi nia keketoṉa koasa, ba mi ponia na toka nia si asa.
8Mi poni moka va sokusoku nia sa tie malamalaṉana sana.
9Lopu hekiheki ba mi variponi, lopu kiluna be tata kamo sa totoso pude taleosae sari na gale. Mi lopu va malumi sari na binalabala kaleadi gua arini pude nuquru pa mia binalabala. Be lopu va egoa gamu pude ponia poata si asa, si kote kebokeboni gamu sa koe Zihova, meke lopu kaqu ta qetue koe Zihova si gamu, meke kote ta poho sa mia sinea.
10Lopu puhi, ba mi poni mokaia sa tie malamalaṉana, meke kaqu manani gamu e Zihova koari doduru tiṉitoṉa sapu tavetia gamu.
11Kaqu koadia tugo si kaiqa tie Izireli habahualadi na malamalaṉadi, gua asa ke tozini gamu rau, mi poni mokai sari na tasimia.
12Be keke tie babe barikaleqe Izireli tasimia, si vata holu pule nia, pude na pinausu koa goi, mamu vata rupahia goi si asa sipu va hokotia sa sa nana ninabulu koa goi koari ka onomo vuaheni dodurudi, meke koasa sa vina zuapa vuaheni, si kaqu vata rupahia goi meke taloa si asa.
13Pana vata rupahia goi si lopu kaqu kokobana limana meke va taloa ia goi si asa.
14Ele tamanae hola koe Zihova si goi ke mamu poni moka nia, sipi, huiti, meke na vaeni goi si asa.
15Mi balabala pulea sapu na pinausu mo si gamu pa popoa Izipi pukerane, meke e Zihova sa mia Tamasa vata rupaha gamu; gua asa ke tozini gamu rau sa vina tumatumae hie kamahire.
16Ba be lopu hiva taluarae sa mua pinausu koa goi; gina kote tataru nigo sa meke sari na mua tatamana, meke kote hiva koa hola si asa.
17Pana gua asa, si mamu turaṉa la nia pa sasadana sa mua vetu, mamu lopa ia taliṉana vasina; meke kaqu na mua pinausu si asa ninae rane. Mu tavete kekeṉoṉo gunia tugo sa mua pinausu vineki.
18Mu lopu balabala va tasuna ia pana vata rupahia goi si keke pinausu, ura ele nabulu nigo sa koari ka onomo vuaheni dodurudi, meke sa poata sapu holu nia goi si asa tatasana si kukuruna mo sa tinabarana sa tie tavetavete. Tavetia sapu gua asa meke kaqu manani gamu e Zihova sa mia Tamasa koari doduru mia tinavete.
19Sari na bulumakao na sipi kokoreo podo kenudi si kaqu ta vala koe Zihova sa mia Tamasa. Kaqu ta vizata vata kale si arini. Lopu kaqu tavetaveteni gamu sari na bulumakao podo kenudi meke lopu kaqu kotoi gamu sari na sipi podo kenudi.
20Koari hopeke vuaheni si kaqu henai gamu, meke sari na mia tatamana pa kenuna e Zihova si arini, pa vasina sapu vizatia Zihova pude varigara meke vahesia.
21Ba be kaiqa toṉa si sea koari na kurukuru, gina ike va kaleana nenedi, babe behu, si lopu kaqu va vukivukihi lani gamu koe Zihova sa mia Tamasa si arini. Ba kaqu va vukivukihi lani gamu sarini pu loke ari kisakisa tinidia.
22Kote boka henai mo gamu sari na kurukuru gua arini pa mia vetu. Gamu pu via mia babe lopu via mia koasa tinarae te Zihova, si kaqu henai si arini. Kaqu henai kekeṉoṉo guni gamu sari na kurukuru saripu ta pozae dia meke anitelopi.
23Ba lopu kaqu henai babe napoi gamu eharadi, ba zoropo guni mo na kolo pa pepeso.
