Proverbio 30:3-24

³Magay sirib ay inadal ko et magay ammok maipanggep en Diyos ay Nasantoan.

⁴Sino di nakaeey ed langit ay nantaoli isnan daga? Ay waday makabael ay manpap sin dagem? Sinoy makabongon sin danom si lopot ya nangikeddeng si beddeng isnan daga? Mo waday ammom si makabael isna, ibagam di ngadana ya ngadan di anak na.

⁵Din kalin Diyos et napaneknekan ay kostokosto. Kaman salida ay manalaknib sin komamang en sisya.

⁶Adi ka taptapian din kalin Diyos tan yamyaman daka ya ipaila na ay maetek ka.

⁷Apo Diyos, waday dowa ay banag ay kedawek en sik-a sakbay ay mateyak:

⁸Panbalinem kod sak-en ay matalek ta adiak polos man-etek ya adi kan palaloan ay pabaknangen ono pabitegen sak-en. Say idawat mo koma din kostokosto ay kasapolak,

⁹tan mo mansobsobraak, into et mo dokogak sik-a yan kanak, “Sino od si Yahweh?” Mo bomitegak abe, mangakewak et ibabain kos sik-a ay Diyos ko.

¹⁰Adi kan palawlawaen di esa ay baa sin apo na tan baosan daka sin baa ay sana et man-ikaro ka.

¹¹Waday odom ay ipogaw ay pankalian das lawa da ama da en ina da.

¹²Din odom yan kanan da en magay basbasol da olay mo kinmadodogis da si basol da.

¹³Din odom yan palalo ay ipapangato da di awak da.

¹⁴Waday palalo di kinagamgam da et posen da din sanikwan di nabiteg ya kakkaasi.

¹⁵Waday singin ay matek. Kanan da ay dowa, “Omya ka, omya ka.”

¹⁶Wada abey opat ay banag ay adi kapkapnek, adi dan polos kanan en kosto: din kad-an di natey, din basig ay babai, din nakgang ay lota ya manbidbidang ay apoy.

¹⁷Din manglasoy en ama na ya adi manongpal en ina na, awni et okiten di gayang sin tanap din mata na ya isidan di dadakke ay titit din lamlames na.

¹⁸Waday opat ay nakaskasdaaw ay adiak maawatan:

¹⁹din iyat di agila ay tomayaw ed kayang, din iyat di eweg ay manbodos sin kabatbatoan, din iyat di bapor ay manbalasat sin baybay ya din iyat di baro ya balasang ay manlinayad.

²⁰Siya nay kaiarigan di makikamalala ay babai: mangan asi na ponasan din tepek na yan kanana en magay basol na.

²¹Waday opat ay banag ay panpayegpegan di kaipoipogaw isnan lobong, tan adi dan maanosan:

²²din bag-en ay manbalin ay ari, din naong-ong ay mawadaan si ad-ado ay makan ya amin ay kasapolana,

²³din sinigsigaan da ay babai ay maasawaan ya din balasang ay bag-en ay maiskat sin babai ay among na.

²⁴Waday opat ay kinittoy ay animal isnan daga, ngem nankalalaing da: