Proveps-Knare Nomaniza 23:4-24

⁴Feno vahe'ma mni'zankura maragu'zatinka kazeri havizana osunka, ama' antahiza e'nerigeno feno vahe'ma mani antahizamo'a kazeri havizana osino.

⁵Kavuma keramage'ma hanankna huno, feno zankamo'a fanane hugahie. Na'ankure agekona eri atareno tumpa namamo hareno hampompi mareriankna huno, afe hugahie.

⁶Veva osu ne'mo'ma ne'za emeno huno kagi hania nezantera ovuo. Knare ne'za krentesia nezantera, ksanegura osuo.

⁷Na'ankure agra e'inahukna ne'kino, nama'a mizana hugahie antahintahi hakare nehuno, ne'zana nenenka tina no hugahianagi, agri agu'amo'a, kagri'enena omane'ne.

⁸Anama ne'nana nezana amu'atinetrenka, nanekema hu so'e huntenana zamo'a, amanezankna hugahie.

⁹Neginagi vahe'ma mani'nenafina keaga osuo, na'ankure ama' antahizanteti hanana kea, huhaviza hugahaze.

¹⁰Tamagehe'mo'za koma re'ne'naza kanagi kana akasi kantugma osuge, megusa mofavre'mofo mopa kavunofi ahenka e'orio.

¹¹Na'ankure zamahoma ke'nia Nera hankave Ne' mani'neankino, tamagrira keaga Agra'a hurmantegahie.

¹²Kagu'areti kavumro kea nentahinka, antahizama kami kere kagesa antenka antahio.

¹³Mofavrema azeri fatgoma huzankura, korera osuo. Kagrama knoma amisanana ofrigahie.

¹⁴Azeri fatgo hu knoma amizamo'a, fri vahe kumapima vuzankura agu amena agu'vazigahane.

¹⁵Mofavre'nimoke, ama' antahizama erisiana, Nagri nagu'amo'a muse nehuno,

¹⁶kagipinti'ma fatgo ke'ma antahi'sugeno'a, mika nagu'amo'a muse hugahie.

¹⁷Kumi vahe'mokizmi zamavu'zmavakura kegasanea osuo. Hianagi Ra Anumzamofonku kore'ma hunteno agorga'ama manizanku maka kna, kagesa antahio.

¹⁸Henkama fore hania zankuma tamage hunka kagesa nentahinka, amuhama nehana zamo'a amnezanknara osugahie.

¹⁹Mofavre'nimoka, ke'ni'a antahinka knare antahi'zana erinka, fatgo kante kagu'a antenka vuo.

²⁰Rama'a aka'tima nene'za neginagi nehaza vahe'ene, rama'a zgagfamofo ame'are'ma nehaza vahe'enena, trago oteho.

²¹Aka tinte vahe'ene ra'ma'a nezama ne' vahe'mo'za, zmunte omne vahe manigahaze. Hagi avu'ma mase vava vahe'mo'a, kukena zamimo'a tagato tagatu hugahie.

²²Kasema kante'nea negafa ke'a nentahinka, negrerama tvavaresigenka kefenkamia otro.

²³Tamage ke'ma mizase'nenunka zgorera otro, ama' antahizanki, huoguma rempima hugamisiazanki, antahi'ama huno refkoma hu'zana erio.

²⁴Fatgo avu'avama nehia mofavremofo nefa'a, tusi'a muse hugahie. Hagi ama' antahiza eri'nea mofavre'agura, nefa'a muse huntegahie.