Sua Tutŋana 23:4-24

⁴Nu lem ŋgar. Tana pun kat mburom be we mbio uunu pepe. Ŋonoono, nu lelem be kam koroŋ boozo. Tamen yaraama itum.

⁵Pa koroŋ boozomen ta tomtom tindoundou isu toono na, ina imapmap karau men. Ina kembei koroŋ ta terre la pa, mi matanda kolom na, ila ne kek. Nu so koroŋ ku tana ko imbotmbot ma molo? Som. Ko kembei ta manboŋ. Itir begeene na, irie ma ila ne kek!

⁶Zin wal ta so tikampewe zin tomtom som na, ŋgurem kutkut pa kini kizin pepe. Ŋonoono, kini ambaimbaiŋan matakiŋa imbotmbot se mbalia kizin be kan. Mi kini tana ikam motom pepe.

⁷Pa wal ta kembei, gorgori tikamam ŋgar biibi pa pat kizin ta tipasansaana pa kini na. Ŋonoono, kwon na, tiso pu be kan ma win. Mi tiur kat lelen pu som.

⁸Tana kini ri ta so kan, na kaimer ko lulu. Mi sua pakurŋana ta so kam pizin pa kini tana, na nu so sorok. Pa kaimer zin ko tikam kosasa pu mini som.

⁹Wal kankaanaŋan ta tizorzooro na, la kizin ma niomŋan koso sua pepe. Pa sua ŋgarŋana ta so kam pizin, na zin ko tirepiili kembei koroŋ sorok.

¹⁰Toono ka kambasa tau tiur ta muŋgu kek na, siri pepe. Mi sei lem toono kizin monmoondo pepe.

¹¹Pa zin len Tomtom Mburaanaŋana ta imbotmbot be imenderkaala zin. Sombe niomru kakam sua, ko rao?

¹²Sua pazalŋana ta so tikam pu, na kiskis ma imbol la lelem. Mi sua ta izzwe ŋgar ambaiŋana na, ŋgungun talŋom pa.

¹³Sombe lutum sa ikamam ŋoobo mbulu, na leeli pepe. Kam ke mi balisi pa bekena pazali. Kam ŋgar boozo pepe. Ni ko irao imeete na som.

¹⁴Tana balisi. Naso kamke i pa zaala ki meeteŋana.

¹⁵O lutuŋ, sombe nu kiskis ŋgar ambaiŋana ila lelem, nako kam ma leleŋ ambai kat.

¹⁶Mi sombe sua ndeeŋeŋana men iwedet pa kwom, nako leleŋ ndabok kat.

¹⁷Zin wal ta mbulu kizin irao pa Anutu mataana som na, motom berber pizin pepe. Zoŋ ise ma ila zoŋ isula na, mototo Yooba mi leŋleŋ la kalŋaana.

¹⁸Naso mbot ambai, mi koroŋ ambaiŋana ta urur motom pa i, nako kam.

¹⁹O lutuŋ, leŋ la sua tio ti. Naso we tomtom ŋgarŋom. Mi motom iŋgalŋgal be to kat zaala ambaiŋana.

²⁰Zin wal ta tiwinin yok baen ma zaza na, mbotmbot raama zin pepe. Mi zin wal ta tikanan saaba kini na, gabgaaba zin pepe.

²¹Pa wal ta kembei tikamam uraata som mi gorgori tikenne len sorok. Tana kaimer zin ko tisu ma timbot ŋoobo, mi tizebzeebe zin pa mburu marrazaŋana men.

²²Tomom ta iuru. Tana leŋleŋ la kalŋaana. Mi sombe nom iwe kolman ma isaana, na motom pasomi pepe.

²³Re: Kokena ziiri sua ŋonoono ma ila ne. Kam kinkiini pa sua ŋonoono mi ŋgar ambaimbaiŋan matakiŋa bekena kam ma iwe lem.

²⁴Pikin ta so ikamam mbulu ndeeŋeŋana, nako tamaana menmeeni biibi pini. Mi sombe ikam le ŋgar ambaiŋana, nako tamaana leleene pini ilip.