Proveps-Knare Nomaniza 20:4-25

⁴Feru vahe'mo'ma hozama ante knare'ma mopama rekorino hozama ontesuno'a, hozama hamare knarera ne'zana ohamaregahie.

⁵Vahe'mofo antahi'zamo'a tirukna huno me'neanagi, ama' antahizane vahe'mo'a ana tirupintira ana antahizana afi anaga netre.

⁶Rama'a vahe'mo'za, tavesi negantone hugahazanagi, mago mago vahe'mo'za tamage hu'za kavesigante'gahaze.

⁷Fatgo avu'ava'ene ne'mo'a, mani fatgo huno nemanie. Agri mofavre zgamo'za, asomu erigahaze.

⁸Kini vahe'mo'ma keagama refako hunaku'ma trate'ma mani'neno, keaga refko huno havi avu'avazana ke fore nehie.

⁹Nagu'amo'a fatgo higena, nagra agru hu'noankino nagripina kumira omane'ne huno iza hugahie?

¹⁰Havige hu'za makazama refko huza kna'ama ke'zane, havige hu'za avamente refkoma osu'zanena Ra Anumzamo'a avesra huno agotenezmante.

¹¹Mofavremofona avu'avate negenka, agri avu'avamo'a agru hu'neanki, fatgo mofavre mani'neanki hugahane.

¹²Tagesama me'neana keaga antahizane, tavuragama me'neana tavuma ke'za me'neankino tarega'zana Ra Anumzamo museza tami'ne.

¹³Kagrama kavu'ma masetenka manizankuma kavesi kavesima haniana, kamuntera omanegosie. Kavu'ma omasesanana ne'zama nesana zamo'a rama'a megahie.

¹⁴Knare osu'ne! Knare osune! Huno mago'a zama mizama seku'ma himo'a nehie. Hianagi mizaseno kantegama nevuno'a, ana zankura knare'za erue huno rama'a muse ke hume nevie.

¹⁵Antahizama ami kemo'a, koline zago'amo'ma marerisa havea ageterene.

¹⁶Onke'nenana vahe'mo'ma nofima nehinkeno magomo apasegahue hanigenka, anamofo anakreku'a huvame hunka eri'negeno, ana nofima hu'neazana eme apaseno. Savri a'mo'ma nofima hanigenoma mago'mo apasegahue'ma hanigenka, aza hu'na apasentegahue huno kaminia zana erio.

¹⁷Kumzafa kave'mo'a haganentake hugahianagi, refuzufupe havemo kagipi aviteno kagi traga hiankna henka'a hugahie.

¹⁸Antahi'zana vahepinti erintenka erizama eri antahizana retro huo. Hagi knare antahi'zama mago'mofompinti'ma e'orinesunka hatera ovuo.

¹⁹Vahe zamagenkema hu vahe'moza vahe'mokizmi oku'zana hu ama nehaze. E'ina hunegu vahe zamagenkema hu vahe enena tragotenka omanio.

²⁰Nerera nefama huhaviza huntesia vahe'mofona tvi'amo asu hanigeno kumazu hanimpi maniankna huno frigahie.

²¹Arera a'fama ofri maninesigeno'ma erisinti haregahanema hu'nesia zama ame'ama huno erisia mofavremo'a, atuparega asimu'a omanegosie.

²²Kefo avu'avama hugante'sagenka anahukna huna nona huzamantegahue osuo. Hagi avega antenegeno Ra Anumzamo kaza huno ana knazana erino.

²³Mago'azama mizaseku'ma hanigeno kna'ama refako huno kezama (skel) erinteno refako hu so'e osu avu'avazana, Ra Anumzamo'a avesra huno agonete.

²⁴Vahe'mo'ma mika zama hiazana, Ra Anumzamoke azeri ante fatgo nehie. Inankna huno mago'a vahemo'a agra'ma nehia zana keno antahino hugahie?

²⁵Kagesa antahi ankeretenka Anumzamofontera huvempa huo. Ame'ama hunka huvempama hutesunka henka'a anama hu'nesana kegu kagesa antahintahi nehunka kagraka'a kazeri haviza hugahane.