Proveps-Knare Nomaniza 19:4-27

⁴Amunte'ma me'nea ne'mofona, rama'a knampa'a manigahaze. Hagi fenoma'a omane ne'mofona knampa'amo'za netraze.

⁵Keagare'ma omatinesia vahe'ma havigema huno huamama hunteno azama hanimo'a, knazana erigahie. Hagi havi kema hanimo'a, mizama'a erigahie.

⁶Rama'a vahe'mo'za zamazama hania vahe arone manizanku zamave'nesie. Hagi maka vahe'mo'za muse zama zamiza vahe'mofo rone nemanize.

⁷Kagrima kamunte'ma omanesige'za, kafuhe'za kavesi ogantegahaze. Hagi knampa ka'amo'za mago'ane agatere'za zamavesra hugantegahaze. Kazama hanazegu'ma hake'sanana, zamagra omanigahaze.

⁸Kagrama knare antahi'zama erisunka, kagraka'agu avesinentane. Kagrama ama' antahi'zama azeri hampo'nama hanunka, knare hunka manigahane.

⁹Keagafima otisia vahe'ma havigema huno huama huntesia vahe'mo'a knaza erigahie. Hagi havigema hanaza vahe'mo'za, frigahaze.

¹⁰Neginagi vahe'mo'za marerisa zampina manigara osu'naze. Kazokzo eri'za vahe'mo'ma kva vahe manino, kva (princes) vahe'ma kegva huntezamo'a, knarera osu'tfaza hu'ne.

¹¹Knare antahi'zama eri'nesia ne'mo'a, ame huno arimpa ohegosie. Hagi havizama huntesia zanku'ma agesama ontahisiana, husga huntegahaze.

¹²Kini vahe'mofo rimpa he'zamo'a, laionimo rankrafa hiankna nehie. Hianagi vahe'ma zamavesinteno zamazama hu avu'avazamo'a, trazante ata ko arunteankna nehie.

¹³Mago ne'mofavremo'ma neginagi avu'avazama hiana, nefana tusi'a hazenke eri'nemie. Hagi mago ne'mofo a'mo'ma kefra nehuno, ke huvava hania a'mo'a, nomofo anuntupinti ko'arigeno varivri hiankna hugahie.

¹⁴Negrera negafampinti none fenozanena erisanti haregahane. Hianagi Ra Anumzamoke, ama' antahizane a'ra kamigahie.

¹⁵Feru vahe'moka kavu mase vava hugahane. Hagi eriza e'ori vahe'moka nezanku frigahane.

¹⁶Iza'o kasegema amage'antesimo'a knare huno manigahie. Hagi iza'o Ra Anumzamofo avu'avama amefi'ma humisimo'a, frigahie.

¹⁷Iza'o amunte omane vahe'ma knare avu'avama hunentemo'a, Ra Anumzamofo anara hunente. Hagi agrama hania avu'avamofo avamente, mizana amigahie.

¹⁸Mofavre kamofona azeri fatgoma hugama hu'nesire, avumaroma antenka azeri fatgo huo. Hagi azeri fatgoma osnanana, frinogu kave'nesie.

¹⁹Hantaka hunoma arimpa ahe vahe'mo'a, hazenke'a erigahie. Na'ankure kagrama aza hunka eri'amane hanankeno'a, henka ana ne'mo'a anazana nehinkenka aza huvava hugahane.

²⁰Kavumro antesia kema nentahinka, kazeri fatgoma hania kema avaririsunka, mani so'e hunka vugahane.

²¹Vahe'mo'a rama'a zanku antahi'zana eri retro huno hugahue hugahianagi, Ra Anumzamo'ma antahino fore hugahie hu'nesia zamoke fore hugahie.

²²Ra zama me'neana huvempama huntenesia kere, amagema anteno mani'zane. Hagi amunte omane vahe'ma manizamo'a, havige vahera agaterene.

²³Ra Anumzamofonkuma koro'ma hunteno agorga'ama manizamo'a, kavreno knare mni'zante vugahie. Hagi iza'o e'inahu'ma hanimo'a, mago'zankura korera osuno knare huno manigahie.

²⁴Eri'za e'ori feru vahe'mo'a, ne'za nenaku tafepi azana antesigeno vugahianagi, ana ne'zana agipina erinteno onegahie.

²⁵Vahe'ma huhaviza nehania vahe'ma azerinka sefu'ma amisankeno'a, knare antahi'zama omane vahe'mo'za nege'za, knare avu'avara amage antegahaze. Hianagi knare antahizama me'nea vahe'ma azeri fatgo hanankeno'a, mago'ane antahizana erigahie.

²⁶Mago mofavremo'ma nefama neheno, nererama nompinti'ma ahenati atresia mofavremo'a, tusi'a agazeza erino naga'afina eme antegahie.

²⁷Kavumroma antesianke'ma ontahi'sanana, e'i knare antahizamofo kana atrenka havifi vugahane.