Tinata Valavalar 19:4-27

⁴Ba tikai i uviana, mangoro dia talaina me; Ma ra luveana, talaina i vana kan ia ka.

⁵A varkurai na tadav ra tena varvai ba i tavir, Ma nina ba i vatang ra vaongo pa na pila ta ra balbali.

⁶Mangoro dia lulul ra tena varmari, Ma ra tarai par dia talaina ma ra tena vartabar. A umana turana par dia milikuane ra luveana,

⁷Ma damana muka ra umana talaina dia vana vailik kan ia! I vila mur diat ma ra tinata, ma pata, dia tar vana ka.

⁸Nina i ongor upi ra kabinana i mari ra balana iat; Ma nina i balaure vake ra minatoto na tikan tadav ra boina.

⁹A tena varvai ba i tavir pa na pila ta ra varkurai, Ma nina ba i vatang ra vaongo na virua.

¹⁰Pa i topa ra lunga pi na lukalukara, Ma damana bula pa i topa tuna ra tultul ba na kure ra umana luluai.

¹¹Ba tikai i matoto i vovovon ma ra kankan, Ma ra magit na gugu pirana pi na nur vue ra nirara.

¹²Ba ra king i kulot i da ra leon i kukukula, Ma ga kana varmari i da ra mavoko ta ra vura.

¹³Ba tika na bul i lunga i da ra magit na varmonong pire tamana, Ma ra varngangar kai tika na vavina i taulai i da ra pal i tuatua vatikai.

¹⁴A pal ma ra tabarikik da kale dir ta ra umana tama i dat, Ma ra Luluai iat i tul tar ra vavina ta dat, a tena kabinana.

¹⁵A mangamangana tabauma i vuna ba da tarurungai, Ma ra tena talanguan na ti malari ma ra mulmulum.

¹⁶Nina i toratorom ta ra vartuluai i balaure kana nilaun iat; Ma nina ba pa i mataure kana vinavana na virua ka.

¹⁷Nina ba i mari ra umana luveana i la tar ra magit tai ra Luluai, Ma ra Luluai na bali boko kana bo na mangamangana.

¹⁸Una virit natum a tutana, tago kan na boina tana; Ma koko una bala upi kana vinirua.

¹⁹A balakadik na varkul boko. Tago ona u varporong ure, una pait mule.

²⁰Una valongore ra tinata na varvateten, ma una kapupi ra varpit, Upi una kabinana ta ra mutuaim.

²¹A tarai dia abe pa mangoro na magit ta ra bala i diat, Ma ra nuknuk i ra Luluai na tur vatikai.

²²A magit di mainge ta ra tutana ia ra varmari, Ma ra luveana i boina ta dir ma ra tena vartuam.

²³A variru tadav ra Luluai i papait na vatavua ra nilaun; Ma nina ba i vatur vake na ti maur vatikai; Pa ta kaina magit na tadav ia.

²⁴A tabauma i vung ra limana ta ra la, Ma pa i tak vaarike mule pi na tulue ta ra ngiene.

²⁵Una luba ra tena varkulumai, ma ra tuptup na tutana na matoto tana; Ma una pit nina i kapa ra nuknukina, ma na gire ilam ra kabinana.

²⁶Nina i vakaina tamana, ma i okole vue nana, Ia ra bul ba i vuna ta ra niruva ma ra vavirvir.

²⁷Natugu, una ngo kan ra valavalongor ta ra varvateten Ona u mainge ke ba una vana irai kan ra tinata na kabinana.