Proveps-Knare Nomaniza 13:16-24

¹⁶Maka zamofo ankereno hu vahe'mo'a agesa antahiteno, maka zana nehie. Hianagi neginagi antahintahine vahe'mo'za, zamagesa ontahi neginagi zmavu'zmavaza eri ama nehaze.

¹⁷Kefo vahe'mofoma katogema huntesigeno vaniana, hazenkefi ufregahie. Hianagi iza'o tamagema huno kema hu vahe'ma, ke erino vanigu'ma katogema huntesigeno erino vaniana, vahe'mokizmia zmazeri knare hugahie.

¹⁸Iza'o avumaroma antesaza kema ontahisimofona amunte omnesigeno, agazegu hugahie. Hianagi izano azeri fatgohu kema asamisigeno antahino amage antesimofona, agrira husaga huntegahaze.

¹⁹Avenesinia zama e'nerisigeno'a, agu'amo'a muse hugahie. Hianagi neginagi vahe'mo'za havi zmavu'zmavama nehaza zampintima atreno atiramizankura zmavesra nehie.

²⁰Iza'o knare antahizane vahe enema vanoma nehia vahe'mo'a, knare antahiza erigahie. Hianagi neginagi vahe enema tagrote'za vanoma nehaza vahe'mo'za, hazenke erigahaze.

²¹Hazenke zamo'a kumi vahe'mokizmi nezmavaririe. Hianagi fatgo vahe'mokizmia, fenozmimo'a rama'a hugahie.

²²Knare vahe'mo'a mofavre'amo'ene henka negehoma eri sintima haresia zana, ko retro huzmanteteno nefrie. Hianagi kumi vahe'mo'zama fenoma eri atruma haza fenona, fatgo vahe'mo'za erigahaze.

²³Zamunte omane vahe'mokizmi hozafina, rama'a neza fore hugahianagi hazenke nomanizamo'a timo'ma hiaza huno harafi huno vugahie.

²⁴Iza'o mofavre'amo hazenke nehanigeno knoma amino azeri fatgoma osanuno'a, mofavre'a avesinonte. Hianagi iza'o mofavre'ama avesima nentemo'a, hanavetino azeri fatgo hugahie.