1Balaamu kamulongela Balaki, “Nizengele hano mapango saba, unigalile madang'ang'a ya ng'ombe malume saba na mabebelu ya ng'hondolo saba.”
2Balaki katenda fana viya viyalongile Balaamu. Balaki na Balaamu walava nhambiko ya dang'ang'a da ng'ombe lume na bebelu da ng'hondolo uchanyha ya chila lupango.
3Maabaho Balaamu kamulongela Balaki, “Ima hano habehi na nhambiko yako, niye nisegele. Huwenda Mndewa Mulungu kezaiting'hana na niye. Chochose chondayanilagusile nizakwiza kukulongela.” Ivo kahita yaidumwe kuna inhembeti ya mulima.
4Mulungu kaiting'hana nayo, Balaamu kamulongela, “Nisasala mapango saba, na chila lupango nilava nhambiko ya dang'ang'a da ng'ombe lume na bebelu da ng'hondolo.”
5Mndewa Mulungu kamwing'ha Balaamu mbuli za kulonga na kamulongela, “Bwela kwa Balaki ukamulongele mbuli zino.”
6Ivo kabwela na kamfika Balaki yang'hali kema habehi ya nhambiko yake ya kutimbula, yeye hamwe na walangulizi wose wa Moabu.
7Balaamu kalava ulotezi uno, “Balaki mfalume wa Moabu kanigalila kulawa Alamu, kulawa Siliya, kulawa ulawilo wa zuwa wa milima. Kalonga, ‘Izo uwaduwile wanhu wa Yakobo kwa ichimu changu, izo, uwalonge vihile Waisilaili.’
8Mbali nizamduwilaze munhu haduwiligwe na Mulungu? Nizawalongaze vihile wanhu waja Mndewa Mulungu hawalongile vihile?
9Nowawona kulawa kuinhembeti ya maluwe, nomsungulilani kulawa kuinhembeti ya milima. Wanhu wowokala waidumwe, wowoiwona kuwa hawalingile fana wanhu wamwenga.
10Yelihi yodaha kuyapeta matimbwisi ya Yakobo, hebu kupeta lobo ya Isilaili? Vondanidanagnike niwe fana wanhu wanogile, fana Waisilaili.”
11Maabaho Balaki kamulongela Balaamu, “Kunitendela choni? Nikugala hano muladi uwaduwile wehi wangu, mbali weye kuwatemela mate!”
12Balaamu kamwidika, “Vino silondeka kulonga mbuli ziya Mndewa Mulungu ziyazikile muna umulomo wangu?”
13Maabaho Balaki kamulongela Balaamu, “Chihite hanhu hamwenga hondaudahe kuwawona. Kwizawawona wadodo mbali hwizadaha kuwawona wose. Kulawa uko, waduwile kwa ichimu changu.”
14Balaki kamsola Balaamu mbaka kuna umgunda wa Sofimu, mbaka kuna inhembeti ya mulima wa Pisiga, kazenga mapango saba, kalava nhambiko ya dang'ang'a da ng'ombe lume na bebelu da ng'hondolo uchanyha ya chila lupango.
15Balaamu kamulongela Balaki, “Ima hano habehi na nhambiko yako ya kutimbula, niye nihite kuumwambu nikaiting'hane na Mndewa Mulungu.”
16Mndewa Mulungu kamwing'ha Balaamu mbuli za kulonga na kamulongela, “Bwela kwa Balaki ukamulongele mbuli zino.”
17Ivo kabwela na kamfika Balaki yang'hali kema habehi na nhambiko yake ya kutimbula, hamwe na walangulizi wa Moabu. Balaki kamuuza Balaamu, “Mndewa Mulungu kolongaki?”
18Balaamu kamwimbila, kalonga, “Lamka Balaki, utegeleze, nihulike weye mwana wa Sipoli.
19Mulungu siyo munhu, mbaka yalonge uvwizi, hebu siyo mwana wa munhu, mbaka yagalule magesa yake. Vino kodaha kulaganila chochose na sekeyachitende, hebu kulonga chinhu na sekeyachifikize?
20Ning'higwa amuli ya kutemela mate, yeye kawatemela mate, niye sidaha kugalula.
21Halolile wihi kwa wanhu wa Yakobo, iviya hawonile magayo mwa Isilaili. Mndewa Mulungu, Mulungu wawo kahamwe nawo, dizi da mfalume da hagati yawo.
22Mulungu yoyawasolile kulawa Misili, kawagombela na wehi wawo fana ng'ombe mbago.
23Uhawi haudaha kuwahuma wanhu wa Yakobo, hebu uganga haudaha kuwahuma Isilaili. Mbuli za Yakobo na Isilaili zizalongigwa, ‘Loleni mauzauza yoyatendile Mndewa Mulungu!’
24Waisilaili wenuka fana simba zike, wokwima fana simba lume, fana simba yeli hagona mbaka yagwile chiya chiyowinga, na kung'wa damu ya chiya chiyawingile.”
25Balaki kamulongela Balaamu, “Basi sekeuwaduwile, hebu sekeuwatemele mate!”
26Balaamu kamwidika Balaki, “Vino sikulongele kuwa nolondeka kutenda chiyolonga Mndewa Mulungu?”
27Balaki kamulongela Balaamu, “Izo nikugale hanhu hamwenga. Huwenda Mndewa Mulungu kezanogelwa uniduwilile wanhu wawo kulawa uko.”
28Ivo Balaki kamsola Balaamu kahita nayo kuna inhembeti ya mulima wa Peoli, hanhu baho munhu yahema kowona chuwala hasi yake.
29Balaamu kamulongela Balaki, “Nizengele mapango saba hano, na uning'he ng'ombe walume saba na mabebelu ya ng'hondolo saba.”
30Balaki katenda fana viyalongile Balaamu, kalava ng'ombe lume na bebelu da ng'hondolo uchanyha ya chila lupango.
