1Wanhu wose walandula madizi yawo na walila ichilo icho.
2Waisilaili wose walongelela kwa Musa na Haluni, wanhu wose walonga, “Ihawile muhavu chihadanganikile muna iisi ya Misili, hebu ihawile muhavu chihadanganikile muna ichuwala chino!
3Habali Mndewa Mulungu kachigala muna iisi ino muladi chikomigwe kwa panga? Wake zetu na wanetu wezakuwa mateka. Vino siyo muhavu chibwele Misili?”
4Wailongela, “Chimsagule mulangulizi na chibwele Misili.”
5Maabaho Musa na Haluni watumbala mavindi na vihanga vawo vidalisa hasi haulongozi wa Waisilaili wose.
6Yoshua mwana wa Nuni na Kalebu mwana wa Yefune, wakalile wamwe wa wapelembaji, wadega viwalo vawo kwa usungu,
7na wawalongela Waisilaili wose, “Isi yochihitile kuipelemba inoga ng'hani.
8One Mndewa Mulungu yahanogelwa na cheye, kezachigala kuna iisi iyo na kuching'ha iwe yetu, isi ili na ulongo unogile ng'hani.
9Sekemumuleke Mndewa Mulungu hebu sekemuwadumbe wakaya wa isi iyo, mana wawo chizawahuma. Hawakalizigwa, mbali Mndewa Mulungu kahamwe na cheye, sekemuwadumbe.”
10Wanhu wose walonda kuwatowa na mabwe. Maabaho utunhizo wa Mndewa Mulungu uwalawilila Waisilaili wose hana dihema da Mulungu.
11Mndewa Mulungu kamulongela Musa, “Wanhu wano wezanizeha mbaka zuwaki? Hawezanihuwila mbaka zuwaki, ingawa nitenda vilaguso ivo vose kumwawo?
12Nizawagalila hulo da utamu na kuwaleka. Nizakwing'ha ng'holo nyingi zili na ludabwa kufosa wawo.”
13Mbali Musa kamulongela Mndewa Mulungu, “Wamisili wezahulika mbuli iyo, kuwa kuwagala wanhu wano kwa udahi wako hagati yawo,
14maabaho wezawalongela wakaya wa isi ino. Wahulika kuwa weye Mndewa Mulungu kwahagati ya wanhu wano, mana weye Mndewa Mulungu kowoneka chihanga kwa chihanga na wingu jako dokwima uchanyha yawo. Weye imisi kowalongolela muna diwingu dilingile fana mhanda, na ichilo kowalongolela muna umoto ulingile fana mhanda.
15Lelo one uhawakoma wanhu wano wose mwanza umwe, wanhu wa zisi zimwenga wahulike mbuli izo wezalonga,
16‘Mndewa Mulungu kapotigwa kuwagala wanhu wano muna iisi iyawalaganile kuweng'ha, ivo kawakoma kuichuwala.’
17Nopula udahi wako weye Mndewa Mulungu uwe mkulu ng'hani fana viuchilaganile viulongile,
18‘Mndewa Mulungu kabule ludoko lwa hima hima na kamema ulondo wa kufunya umoyo na kolekelela ubananzi na uhasanyi. Mbali hezaleka kuwatagusa wana na wazukulu wa nyelesi yetatu na yekane kwa ubananzi wa tati zawo.’
19Nokulamba uwalekelele wanhu wano kwa kusondelela ulondo wako wa kufunya umoyo, fana viuwalekelele wanhu wano kwandusila viwalawile muna iisi ya Misili mbaka sambi.”
20Mndewa Mulungu kamwidika, “Niwalekelela fana viupulile.
21Mbali fana vonili mgima na fana isi yose voimema utunhizo wangu,
22habule hata imwe yawonile utunhizo wangu na mauzauza yangu yonitendile Misili na kuchuwala maabaho kaiyoha kunigeza miyanza iyo yose bila kutegeleza dizi jangu,
23yondayawone isi yoniwalaganile tati zawo. Chila munhu yanizehile hezaiwona.
24Mbali msang'hani wangu Kalebu kavingi, kanisondelela kwa moyo wose, nizamgala muna iisi iyahitile, na welesi wake wezaisola isi iyo.
25Kwaviya Waamaleki na Wakanaani wokala muna dikolongo ijo, igolo hindukeni muhite kuchuwala kwa kufosela nzila yoihita Bahali ya Shamu.”
26Maabaho Mndewa Mulungu kawauza Musa na Haluni,
27“Nizakala na mting'hano uno ulongelela mbaka zuwaki? Nilegela kuhulika kulongelela kwawo.
28Walongeleni, ‘Noilaha fana vonili mgima, Nizamtendelani fana vimunilongele.
29Mwizadanganika na mitufi yenu izakwasigwa muna ichuwala chino. Kwaviya mulongelela kumwangu, habule hata munhu imwe yapetigwe yeli na miyaka malongo maidi na kugendelela vimwili yondayengile muna iisi ija.
30Niilaha kuwa nizamulekani mukale muna iisi iyo, mbali habule munhu yondayafike, ila Kalebu mwana wa Yefune na Yoshua mwana wa Nuni.
31Mbali wanenu, womulongile kuwa wezakuwa mateka, nizawagala muna iisi iyo, nawo wezaimanya isi yomuilemile.
32Mbali mweye mwizadanganikila muna ichuwala chino.
33Wanenu wezakuwa wadimi muna ichuwala kwa miyaka malongo mane na wezagaya kwa ichimu cha kuleka kwaminika kwenu, chila imwe wenu kezadanganika kuchuwala.
34Kwa peta ya siku zimpelembe isi, siku malongo mane, chila siku yopetigwa kuwa mwaka. Kwa ichimu cha uhasanyi wenu, mwizagaya kwa miyaka malongo mane na mwizavimanya kuwa nihilwa.
35Niye Mndewa Mulungu nilonga. Kweli nizawatendela vino wanhu wano wehile wowaiduganye kwa kunilema, wezadanganika muna ichuwala chino.’ ”
36Ivo wanhu waja Musa woyawatumile wakaipelembe isi ija, wowabwelile na kuwatenda wanhu wose walongelele kwa kugala mbuli zihile za isi iyo,
37wadanganika kwa kugaliligwa hulo na Mndewa Mulungu.
38Mbali Yoshua mwana wa Nuni na Kalebu mwana wa Yefune hawadanganike bule mwa waja wowahitile kuipelemba isi.
39Musa kawalongela Waisilaili wose mbuli zino, nawo walila kwa usungu ng'hani.
40Igolo yake imitotondo ng'hani walamka na wakwela kuna inhembeti ya isi ya mulima. Walonga, “Chitogola chitenda uhasanyi mbali chahano chohita hanhu haja Mndewa Mulungu hoyachilaganile.”
41Mbali Musa kalonga, “Habali hamuzindilila malagilizo ya Mndewa Mulungu? Mbuli iyo haizadahika!
42Sekemukwele kwaviya Mndewa Mulungu heli hamwe na mweye. Mwizahumigwa na wehi wenu.
43Mana Waamaleki na Wakanaani wakuulongozi wenu. Mwizadanganika kwa upanga kwaviya hamumsondele Mndewa Mulungu, ivo hezakuwa hamwe na mweye.”
44Mbali wageza kukwela kuinhembeti ya isi ya mulima, ingawa sanduku da lagano da Mndewa Mulungu hadilawile muna dilago hebu Musa halawile.
45Maabaho Waamaleki na Wakanaani wowakalile kuna iisi ya mulima, wahulumuka na kuwatowa. Wawawinga mbaka wafika Holima.
