MUKÉTÍMÙ 12:3-15

³Mɔyiisi do tú onìtì wèè í mɔkɛ wènwe tɛfentɛ̀ bɑ́ sɑ́m̀pɔ́, bɑ́ òmɔù í bo kutenkù miɛkɛ wèè ò dònnɛ̀.

⁴Dɛndɛ bɑ̀mbɑ̀ kɛ̀ ti Yiɛ̀ nKuyie nnɑ́kɛ́ Mɔyiisi nɛ̀ Anɔɔ nɛ̀ Midiyɑmmu kɛ dɔ̀: Dí kɔtɛní dimɔu, di tɑ̃ɑ̃ti mɛmmɛ mɛtɑummɛ̀ tou borɛ̀. Kɛ̀ bɛ̀ɛ kɔtɛ.

⁵Kɛ̀ ti Yiɛ̀ nKuyie ncútɛ́ní diwɛtirì miɛkɛ kɛ́cómmú mɛtɑummɛ̀ tou bòrìnùù kɛ yú Anɔɔ nɛ̀ Midiyɑmmu kɛ̀ bɛ̀ɛ kɔtoo bɛdɛ́.

⁶Kɛ̀ ti Yiɛ̀ nKuyie mbɛ̀ bɛ́innɛ̀ kɛ dɔ̀: Kéntɛ́nɛ̀ n yóó di nɑ́kɛ́ tì, kòò mɔù tu di miɛkɛ mpɑ̃ɑ̃nɑ́ɑǹtì nɑ́ɑǹtò mí nKuyie n yóó ò bɛnkɛ m mɑ́ɑ̀ nɛ̀ mɛbɛnkùmɛ̀ miɛkɛ nkɛ, kɛ́ nhò nɑ̀ɑ́nnɛ̀ tidɔuǹtì miɛkɛ.

⁷N kóo tɔ̃ntì Mɔyiisi kpɛrɛ í mɛ ndò, ò pĩ n nìtìbɛ̀ mɛsɑ̀ɑ̀ mmɛ.

⁸Nɛ̀ wenwe ti ɔ̃ nnɑ́ɑ́ nkɛ cɔ́ú ntitɔbɛ̀ mbɛ kɛ̀ dɛ̀ feío, n yí ò nɑ̀ɑ́nnɛ̀ yɛnɑ́ɑǹhɑ̃ntíyɛ̀, nh ɔ̃ɔ̃ ò bɛnkɛmu m mɑ́ɑ̀ kòo yɑ̀ n fènkù. Dɛ̀ dòmmɛ kɛ̀ di í ò dé, wenwe n kóo tɔ̃ntì Mɔyiisi?

⁹Mɛm̀mɛ ti Yiɛ̀ nKuyie mmiɛkɛ bɛ̀ yɛ̀mɛ̀ kɛ̀ kùu ítɛ́.

¹⁰Diwɛtirì kɑ̃ɑ̃tɛ́ dìì mɔ̀nnì mɛtɑummɛ̀ tou ĩ́nkɛ̀, kɛ̀ bɛ̀ nsɔ̃́ ntikɔ̀ntì pĩ mMidiyɑmmu kòo kɔ̃̀ntì pɛikɛ kɛ nɑɑ́ ntikóntì kɛ̀ Anɔɔ ò yɑ̀ kɛ́nsɔ̃́ ntikɔ̀ntì tiì ò pĩ.

¹¹Kòo nɑ́kɛ́ Mɔyiisi kɛ dɔ̀: Áú n yiɛ̀! N dɑ bɑ́ɑ́mmu bɑ́ɑ́ yóu kɛ̀ mɛyɛi nti dɔ̀ɔ̀ mɛ̀ɛ do ti yɔ ĩ́nkɛ̀, ti dɔ̀ɔ̀ tiyɛìntì nti, ti cɑ̀ɑ̀rɛ̀mu.

¹²N dɑ bɑ́ɑ́mmu ɑ bɑ́ɑ́ yóu kòo kɔ̃̀ntì dɔntɛ́ dɔntɛ́ bɛ̀ pɛitɛ́ wè dicírì kpɛti kɔ̃mɛ.

¹³Kɛ̀ Mɔyiisii kuɔ́nnɛ̀ Kuyie nkɛ dɔ̀: N dɑ bɑ́ɑ́mmu wɛ̃́ɛ̃́roo kóò miɛkùnnɛ.

¹⁴Kɛ̀ Kuyie ntɛ̃́nnɛ́ Mɔyiisi kɛ dɔ̀: Kòo cicɛ weè do ntĩ̀ṹtɛ́ o ììkɛ̀ tinɔ́ntɔ̃ũtì, ifɛi nɑɑ bɑ́ nhò bo kɛ dɔ̀ yɛwe yɛ̀yiekɑ̀ɑ̀? Mɛɛ̀ botí nku di dòmmɛ̀ kóò dènnɛ di kó dikɑrì, kɛ̀ yɛwe yɛ̀yiekɛ̀ɛ pɛ̃ɛ̃tɛ́ kòo wɛ̃tɛní.

¹⁵Mɛm̀mɛ kɛ̀ bɛ̀ɛ dennɛ Midiyɑmmu bɛ kɑrì kɛ́nkémmú yɛwe yɛ̀yiekɛ̀ bo pɛ̃ɛ̃tɛ́mɛ̀ kòo wɛ̃tɛní kɛ̀ bɛ̀ nɛ́ nɑ kɛ́pɛ̃ɛ̃tɛ́.