1Yinni Gusunɔ, sɑ nɔni sɔ̃ɔre. Mbɑn sɔ̃nɑ ɑ kɑ sun tomɑ. Mbɑn sɔ̃nɑ ɑ kukuɑ.
2A mɛɛrio nɡe mɛ tɔn kɔ̃sobɑ tii sue. Bɑ yɑ̃ɑrobu nɔni sɔ̃ɔmɔ bɛrum sɑriru sɔɔ. Bɑ bu kɔkirimɔ bɑ suremɔ ben yinɑ sɔɔ.
3Tɔn kɔ̃sobɑ woo kɑnɑmɔ. Ye ben ɡɔ̃ru ɡɑ binɛ sɑ̃ɑ, yerɑ bɑ rɑ kɑsu. Bɑ̀ n ye wɑ, kpɑ bu Gusunɔ wɔmɛ bu nùn yɑɑkoru koosi.
4Ben tii suɑbu sɔɔ, bɑ rɑ nɛɛ, Gusunɔ sɑri, u ǹ bikiɑmɔ ye bɑ mɔ̀.
5Ye bɑ niɑ sɑ̃ɑ, yɑ rɑ koorewɑ. Bɑ ǹ kpɛ̃ bu Gusunɔn siribu tubu. Bɑ rɑ ben yibɛrɛbɑ yɑ̃ɑtɑm siewɑ.
6Kpɑ bu tii sɔ̃ bu nɛɛ, bɑ ǹ wɔrumɑmɔ pɑi! Kɔ̃sɑ ɡɑɑ kun bu deemɑmɔ.
7Bɔ̃ri kɑ weesu kɑ ɡɑri kɔ̃siyɑ yi rɑ n yibɑ ben nɔsɔ. Kɔ̃sɑ ben yɑrɑ yɑ rɑ n wuuwɑ.
8Wuun biruɔrɑ bɑ rɑ n kukuɑ. Miyɑ bɑ rɑ n tɔmbu yɔɔru bwɛ̃ɛyɛ. Tɑɑrɛ sɑriruɡii ɡoo ù n yɑrɑ, bu nùn sɛ̃re bu ɡo. Dɑm sɑriruɡii ù n yɑrimɑ, bu nùn mwɑ bu ɡo.
9Bɑ rɑ n kukuɑwɑ nɡe ɡbee sunɔ ɡe ɡɑ yɑɑ mɑrɑ. Bɑ̀ n dɑm sɑriruɡii mwɑ ben yinɑ sɔɔ, kpɑ bu nùn ɡɑwɑ bu kɑ doonɑ,
10kpɑ bu nùn sɛ̃suku bu ɡo. Ben dɑm bɑkɑm mu nùn kɑmiɑ.
11Bɑ rɑ tii sɔ̃wɑ bu nɛɛ, Gusunɔ kun ben ɡɑri mɔ̀. U ku rɑ mɛɛri ye bɑ mɔ̀.
12Yinni Gusunɔ, ɑ seewo, ɑ ku be bɑ nɔni sɔ̃ɔre duɑri, ɑ bu somiɔ.
13Mbɑn sɔ̃nɑ kɑɑ de tɔn kɔ̃sobu bu nun wɔmɛ bu nɛɛ, ɑ ku rɑ bu sɛɛyɑsie.
14Yinni Gusunɔ, ɑ rɑ n yɛ̃ nɔni swɑ̃ɑ te tɔmbɑ mɔ hɑnduniɑ sɔɔ. A rɑ bu somi. A rɑ mɑɑ ɡobekubɑ nɔɔri. Yen sɔ̃nɑ bɑ rɑ nun tii wɛ̃.
15A tɔn kɔ̃son dɑm buo, ɑ nùn win kɔ̃sɑ kɔsieyo. Kpɑ win nuku kɔ̃suru tu kpe mɑm mɑm.
16Yinni Gusunɔ, wunɑ ɑ sɑ̃ɑ sinɑ boko sere kɑ bɑɑdommɑɔ. Kɑɑ be bɑ ǹ nun sɑ̃ɑmɔ ɡirɑ wunɛn tem di.
17Yinni Gusunɔ, ɑ kɑnɑ nini swɑɑ dɑkio. Wɔnwɔndo ù n nun kɑnɑ, ɑ nùn dɑm kɛ̃ɛyɔ. Be bɑ dɑm dɔremɔ, bɑ̀ n nun sokɑ, ɑ bu wɔro. Be bɑ ɡobekubɑ dɑm dɔremɔ, ɑ bu sirio, kpɑ ɡoo u ku mɑɑ de bɑ n win bɛrum mɔ.
