Salmos 10

1

2

3

8

10

14

15

16

19

22

23

24

27

32

33

34

37

40

42

43

46

47

48

51

63

67

69

72

73

80

84

87

89

90

91

93

95

96

100

103

104

105

107

110

115

116

118

119

121

122

124

126

127

130

137

139

145

148

150

¹Apaa, ¿mayaamsha shiy iyaa arap kasaksha? watam kiyung kachiykiniwa. ¿Mayaamsha tapishuksha?

²Yutaritshishpan tputs pukiree urutamari kiyung yachaksin taakanaya. Tputseem zapan nazanllish tupantsakpaz ashkanaya, Itaru zapish waantatamsin anush pantsayarusin tsipachinlliniya.

³Yutaritshishpan tputs waanaatstamari ungirtaku tsiyatstar ashkiya. Yuwaa waana zandku, anootsimari tsiyatkiya. Itaru, shiyaatsshat, Apaa, mantsir tsiyatkanaya. Nda pakchiyam shiyaa chinamaam zandkanaya.

⁴Waanaatstamari kapung ungirtaku, ¿Chakaja nuwaa wanichinda? Apanll wanindaja, ambimari átu mangush chinaku taakiya.

⁵Waamatamari waana mangush chinaku wanasiri shitungkiya. Itaru shiyaatsshat, Apaa, waneeshish nda pakchiyam punikiya. Tputs waneektaa, anoo nda pakchiyam paziksin, stakanaya.

⁶¿Chaka nuwaa kasichinda? Urutari nuw kis taachina, Nuwaam xarashish ayamtaatiya taacheeja, ndambaree, atanaya.

⁷Uru tputsee mantsir tsiyatkanaya. Ngichzeetsimari tsiyatkusin taakanaya. Tputsee mangutamari tamapingaku wanasir tsiyatkanaya. Itaru mangush kiyung yachamaam chinakanaya.

⁸Tamapingampan washchir tamatarparee ashkanaya. Napa washchir yaktashtaa tapisheeru, tsangayaru, tputsee pachayaru, maachiritaatssha ichingkanaya. Tamapingampani ashkitamanaya.

⁹Mishat, tamapingampan tumuz tamapari ashkitamsina. Tputsee tachitakpaz ashku tsangayaru, tamapingayaru, zata ashkiya. Amb ashkusin, tputsee kasiksin, kiyung yachakanaya. Tputs waanaatsi tapachindamaam pinasakanaya.

¹⁰Yutaritshishpan tputsee kawashishpapaz ashiru kawakanaya. Tputssha shitungamaam pinasakanaya. Kiyung kachiykanaya. Wamarisha yashingchich kasikanaya.

¹¹Mangush chinaku, Yuwaa ashki anoo Apanll mbizachparee, watam wachoo kámanakuri, nuwaa nda pakuwa, atusin, mapiyrsin taakanaya.

¹²Ashiriya, Apaa shiysha, kuwish paxayarush, wizpurirpatish yutaritshishpanee waneengcha. Watam tputsee kiyung yachakanawa. Ashiri shiysha tputsireetsish nayaniyarush istangcha.

¹³Apaa ¿mayaamshta yashingchich shiyaa stakana? Staksin, ¿Mayamandaja nuwaa wanichinda, atanaya?

¹⁴Itaru, shiysha Apaa, ichingaru paksha. Yuwaa yutarit ashkana anoo napanapaw ashkush, izuuru shiy wanichsha. ¿Chakaja, Apaa, tputs pukiree istach? Wanindaja. Shiyamaricha istampan taaksha. Ashirucha shiyamun mang' tatkanaya. Watam shiy mxaxzeetsta uru nayaniyarush istatarshawa.

¹⁵Apaa, yashingchichee pachtama chpakpaz sheerush wizpuree tasámbaytangi. Ndusha tputsee kiyung yachamaam izuuru pastamamari waneengcha.

¹⁶Apaa, shiyamaricha kurakish urutamari kasirush taaktasha. Yashingchich tputs nda minamtiyam shiyash pshtuchinlliniya. Ichingarootssin kapeeteerush kasachsha.

¹⁷Apaa, shaana tputsirish, shiyaa; Istanda tákchusin, shiysha uru mazinakchush istaksha. Tputsireetsish kapung chinakush, uru tuwizpurtaksha.

¹⁸Shiy mxaxzeetstam, misha pukireetstam tputs istangcha. Yutaritshishpan nda urutamari taachinllina, watam tsapurunasshuchiwa. Shiysha anoo tpachingangcha, nimun ayamtaati ndusha tputsee kiyung yachamaama. Ashiri Apaa, wapparee.