1A DUEN anjau o auer, ri ai kan, menda i en intin won komail.
2Pwe pein komail aja mau, me ran en Kaun o pan pwarado dueta lipirap amen ni pon.
3Pwe irail lao pan inda: A muei mau, o jota apwal kot mia, i anjau kaupa pan lel on irail dueta li lijean amen; a irail jota pan pitila.
4A komail ri ai kan, jolar mi ni rotorot, pwe ran o de konodi komail duen lipirap amen.
5Komail karoj jeri en marain, o jeri en ran. Kitail jo kijan pon o rotorot.
6Kitail ari ender mamair dueta me tei kan, a kitail en majamajan o daulikin.
7Pwe me mair, kin mamair ni pon, o me jokolar, kin jokolar ni pon.
8A kitail, me kijan ran, en liki jan, til won nan pere pan marmar en pojon o limpok, o lijoropeki kaporopor pan maur.
9Pwe kaidin onion, me Kot kotin kileledi on kitail, a jen konodi maur joutuk ki atail Kaun Iejuj Krijtuj,
10Me mata kin kitail er, pwe ma kitail papat de mamair, en maur pena re a.
11Komail ari panau o jauaj pena nan pun omail duen me komail kin wia.
12A je poeki re omail, ri ai kan, komail, en apwali me kin dodok nan pun omail, o me kaun komail da pan Kaun o, o me kin panaui komail.
13Komail kaka kin ir kaualap ni limpok, pweki ar wiawia; o komail popol pena.
14Je panaui kin komail, ri ai kan, komail en kapun on me katiwo kan, o kamait, me ar pojon tikitik, o apapwali me luet akan, o kanonama on karoj.
15Komail majamajan, pwe amen ender depukki on amen me jued me jued, a en inon ion me mau eta nan pun omail o on amen amen.
16Komail pereperen anjau karoj.
17Kapakapta joutuk.
18Komail danke ni meakaroj, pwe iduen kupur en Kot ren Krijtuj Iejuj on komail.
19Der kakundi Nen.
20Der mamaleki deideikop akan.
21Kajojon on meakan karoj, ap koledi me mau.
22Liki jan jon en jued karoj.
23A Kot en popol en kajaraui komail la kaualap, nen omail, o monion omail, o war omail en nekinek mau on en atail Kaun Iejuj Krijtuj a pwarado.
24Melel i, me kotin molipe komail er, me pan pil wiada.
25Ri ai kan kapakapa kin kit.
26Ranamauki ri at akan karoj metik jaraui.
27I kauki on Kaun, me komail pan wadok kijin likau kij et on jaulan jaraui kan karoj.
28Mak en atail Kaun Iejuj Krijtuj en mi re omail!
