1Phralale, pal o časi, kana oda avela, na kampel tumenge te pisinel,
2bo korkore mištes džanen, hoj o Džives le Rajeskero avela avke sar o živaňis prekal e rat.
3Bo sar vakerena: “Smirom hin a na mušinas pes te daral,” akor e bari bibach, avela jekhvareste pre lende, sar o dukha pre khabňi džuvľi – na denašena a ena zňičimen.
4Ale tumen, phralale, na san andro kaľipen, hoj tumen oda Džives te zachudel sar o živaňis.
5Bo tumen savore san o čhave le svetloskere the o čhave le dživeseskere. Amen na sam o čhave le kaľipnaskere the la račakere.
6Vašoda, te na sovas avke sar okla džene, ale te avas upre a te avas strižbe.
7Bo ola, ko soven, rači soven a ola, ko mačon, hine rači mate.
8Ale amen, save sam o čhave le dživeseskere, avas strižbe, uras pre peste o pancjeris le pačabnaskero the le kamibnaskero a sar e prilba o užaripen (naďej) pro spaseňje.
9Bo o Del peske amen na kidňa avri pre peskeri choľi, ale pre oda, hoj te dochudas e spaseňje prekal amaro Raj Ježiš Kristus,
10savo muľa vaš amenge, hoj te dživas jekhetane leha – či sam džide abo mule.
11Vašoda tumen zoraľaren a podhazden jekh avres, avke sar oda the keren.
12Mangas tumen, phralale, hoj tumenge te ľikeren olen, save maškar tumende keren e phari buči, save hine upral tumende andro Raj a sikaven tumen.
13Le kamibnaha ľikeren len igen bares vaš lengeri buči. Mi el maškar tumende o smirom!
14A mangas tumen, phralale: Dovakeren olenge, save na kamen te kerel buči, podhazden olen, save pes pomukle, pomožinen le slabenge a sakoneha ľikeren avri.
15Dikhen, hoj ňiko varekaske te na visarel pale o nalačho vaš o nalačho, ale furt keren lačho jekh avreste the savorenge manušenge.
16Furt radisaľon!
17Ma preačhen tumen te modľinel!
18Andre savoreste paľikeren, bo ada hin le Devleskeri voľa prekal tumende andro Ježiš Kristus.
19Ma murdaren andre e jag le Sentne Duchoskeri a na zaľikeren les.
20Ma dikhen tele o proroctva,
21ale savoro probaľinen (skušinen) a o lačho tumenge muken.
22Ňič tumen te na chal le nalačhipnaha.
23A o Del korkoro, savo amen del o smirom, mi kerel tumendar sentnen andre savoreste a mi ľikerel tumen – calo tumaro duchos, duša the ťelos – bi e mel, medik na avela pale amaro Raj o Ježiš Kristus.
24Verno hino Oda, ko tumen vičinel: Ov oda the kerela.
25Phralale, modľinen tumen vaš amenge!
26Pozdravinen šukares savore phralen jilestar.
27Mangav tumen anglo Raj: Pregenen oda ľil savore sentne phralenge.
28O lačhipen (milosť) amare Rajeskero le Ježišoskero Kristoskero mi el tumenca! Amen.
