1Kona re goo wetsʼn ne btan na, lee wiz ne or kuu gak re koree ndechet raa kee nay lo goo,
2tak wen ne goo lee wiz kuu bretab Zha Nabee, taxal thib wann kuu nla yaal tsine, or kuu neeka ndate leettsoo goo.
3Leettsa lee re men gab: “Wen nziʼaa ndechet raa ya leettsooʼaa por neeka thib kwaa”, ora lee wiz kuu rid zha yalti tsin, taxal nlaaz leettsoo thib ngot kuu gal zhiinn, ne gagt laa zha lo yalti.
4Per lee reʼaa wetsʼn ne btan na, nzitaa lo yalkow par tsin wiz kuu bretab Zha Nabee loʼaa taxal nla wann kuu ngebeta lee.
5Tak retalee zha tse nakaa ne lo xni chaan Diox nziʼaa, nagtaa zha yaal ne neeka nzitaa lo yalkow.
6Kona ndoblo list yetsinaa ne ndoblot gataa taxal tedib net re zha kuu naxat, sinke ndoblo gakaa taxal thib zha kuu ngobee ne nkenap.
7Tak lee re zha kuu nzhat, yaal nzhat zha, ne lee re zha kuu nzhuu yaal nke zha yalgwiy.
8Per leeʼaa zha tse nakaa; kona ndoblo thibka kobeeʼaa ne thib nali toʼaa yelaazaa Jesucrist ne ke leettsoo altaaʼaa, tak tsa nakaa taxal soldad kuu nzo yiib pech ne list ndo. Ne ndoblo thibka telaazaa leeʼaa ngebetaa taa Jesucrist yalnaban loʼaa, tak tsa nakaa taxal soldad kuu now yek kon bchuyib.
9Tak mlit Diox reʼaa tsa teti Diox reʼaa, sinke mli Diox reʼaa tsa por Jesucrist Zha Nabee loʼaa taa Diox yalnaban loʼaa.
10Lee Jesucrist nguth kwentaa tsa thibka yoʼaa kon Jesucrist, tegal ngutha lee o bee nabanka lee.
11Kona bloney goo leettsoo thib goo ne tedib goo, tsa zhen goo lo kwent chaan Diox, taxal ngetsowa gooy nal.
12Re goo wetsʼn ne btan na, kon dib ndroo leettsoo nee naab nee lo goo, bin goo diiz lo re zha kuu nke rtsin Zha Nabee lo goo, tak re zhaʼa nak zha kuu ntsow xgab goo ne re zhaʼa nteni goo.
13Ndoblo wen wii goo lo zha ne bke leettsoo goo zha kon dib ndroo leettsoo goo, por tsiin kuu ntsow zha lo goo. Ne noga ndoblo wen kwin goo thib goo ne tedib goo.
14Ne noga nabee nee lo goo, kox re zha tsaab kuu nlaazt ke tsiin lo goo, bloney goo leettsoo re zha kuu yent gan leettsoo nyelaaz Diox, btsow goo ayud re zha kuu neyt ndo nyelaaz Diox, ne bxek leettsoo goo bne goo reta men.
15Ne wen wii goo naa kwan tsow goo, tak went tsow goo kuu went lo thib taben goo kuu mtsow kuu went lo goo, sinke ndoblo thibka wen tsow thib goo lo tedib goo ne lo reta men.
16Thibka naley bloo goo leettsoo goo.
17Ne thibka btediz goo lo Diox.
18Taa goo texkix lo Diox por reta kwaa, tak koree nak kuu nlaaz Diox tsow retalee kuu nyelaaz Jesús.
19Ne bin goo diiz kuu nlaaz Mbi Nayon ne Mbi Nayon lo goo.
20Ne ndoblot gab goo nataagt re kuu mni re profet,
21per ndoblo wen wen tsow goo xgab re kuu mni zha, ne ndoblo kayaa goo reta kuu wli ne re kuu wen,
22ne blaa goo tsowt goo reta kuu went.
23Nlazʼn lee Diox kuu ntsow wen nziʼaa, tsow thitanax nambi yaan goo lo Diox ne tsow Diox thitanax gak goo zha Diox, tsa kenap Diox kwerp goo, xbi goo ne yalnaban chaan goo ne dib goo, tsa yent cho keki goo, leettsa bretab Jesucrist, Zha Nabee loʼaa.
24Tak nali nak zha kuu mrezaa ne wlipaa tekenap zha goo.
25Re goo wetsʼn ne btan na, noga naabʼn lo goo bnaab goo lo Diox por nee.
26Bni goo “diox” lo reta wetsaa ne lo re btanaa kwent chaan nee; ne kon dib ndroo leettsoo goo dow goo thib chut cho kwat re zha thib mod nali.
27Ne kon yalnabee chaan Zha Nabee naabʼn lo goo, blab goo yeets ree lo reta zha kuu nak zha Jesús.
28Nlazʼn lee Jesús Zha Nabee loʼaa loo yalnkelaaz chaan lo reta goo. ¡Tbaa gake!
