1Lenge toꞌ tatai poi, yukur ya plihe mini yip malaŋatme ŋup tikin Lahmborenge ŋaiye ka plihe ot.
2Yip si sisyeme, ŋupe ŋaiye Lahmborenge ka ot pe, ka ot nilyehe si tuꞌe miyeꞌ endei ŋaiye nat ŋup.
3Ŋupe ŋaiye lenge miyeꞌ tuweinge ka yininge tuꞌe leꞌe na, “Poi tukwini, poi marp syumbe ŋumwaiye topoꞌe hriphrip supule.” Pe ŋup uku mane ka ot me lenge miyeꞌ tuweinge ŋaiye yukur bilip me Got. Ka tuꞌe ŋaiye tuwei wasande syohe ŋaiye ta waraꞌe talah pe, ka ŋahilyeh tuꞌe ŋaiye lenge miyeꞌ tuweinge yukur tatame ka se jirnge yosokome mane luku, pakai supule.
4Kom lenge toꞌ tatai ŋam, yip yukur yarp yepelmbe taꞌe lenge miyeꞌ tuweinge ŋaiye yeteteme wusyep tikin Got. Ŋup uku yukur ka ende yip pa yenge plai tuꞌe ŋaiye yip yetekeꞌe miyeꞌ endei ŋaiye nat, pakai.
5Poi lenge miyeꞌ tuweinge lalme tikin yirise, topoꞌe ŋau ŋaiye naŋarꞌe. Poi yukur miyeꞌ tuweinge tikin ŋup topoꞌe yepelmbe, pakai.
6Taꞌe luku pe, poi lenge Kristen, ya mende miꞌmiꞌ murp tuꞌe ŋaiye miyeꞌ tuweinge yarp hlaꞌ. Yukur ya mite posoh tuꞌe lenge miyeꞌ syeꞌ, topoꞌe yukur ya monoꞌe pinip kwote.
7Ŋup pe, lenge miyeꞌ tuweinge yate posoh, topoꞌe tinge yonoꞌe pinip kwote no, ŋondoh tinge talalai pe, tinge yende kwite kwote.
8Kom poi mitiŋ tikin ŋau pe, ŋoiheryembe poi ka si bwore bwarme. Poi ya murpe gare ŋoihmbwaip ŋaiye teŋeime Got pe, ya mende nihararme lenge mitiŋ pe, yaŋah bwore luku ka ungwisme poi tuꞌe temhroŋ kapa. Poi marp meseperhme Got ŋaiye ka ambaꞌe poi. Ki taꞌe ŋaiye galaꞌ kapa.
9Got yukur nalaŋatme poi nange ya mambaꞌe ŋoihmbwaip nihe kin, pakai. Kin nalaŋatme poi ŋaiye ya murp meseperhme ŋup tikin Jisas ŋaiye ka ota ambaꞌe poi.
10Somohon kin nulme nungwisme poi lalme. Taꞌe luku pe, poi lahmende ŋaiye tukwini marp laip kekep eꞌe, topoꞌe lahmende ŋaiye si yule no, ŋupe ŋaiye Lahmborenge ka plihe ot pe, poi ya murp laip topoꞌe kin nyermbe nyermbe.
11Taꞌe luku pe, pa yininge wusyep bwore ŋaiye ka ende bongolme yiptip, tuꞌe ŋaiye tukwini yip yende.
12Lenge toꞌ tatai poi, poi misilihme yip ŋaiye pa yusyunde wusyep lenge miyeꞌ wah tikin Lahmborenge ŋaiye yende wah yungwisme yip. Yip pa yurp tuwihme tinge. Detale, Lahmborenge kin nalaŋatme tinge ŋaiye ka yurp miyeꞌ ondoh yip. Tinge ka syep erŋeme yip me ŋaimune ŋaiye pupwa.
13Yip sisyeme wah ŋaiye tinge yende pe, pa yahraꞌe naŋ tinge, topoꞌe pa yende nihararme tinge. Topoꞌe pa yurp ŋumwaiye ŋoihmbwaip ilyeh topoꞌe lenge toꞌ tatai yip.
14Lenge toꞌ tatai poi, poi misilihme yip ŋaiye pa yininge bongol me lahmende ŋaiye yarp pakaiye yende ŋulmbwai, topoꞌe pa yende bongolme ŋoiheryembe lenge mitiŋ ŋaiye hiꞌ worhe, topoꞌe pa yungwis lenge miyeꞌ ŋaiye ŋoihmbwaip tinge yukur teŋeime Got bongol. Pa syumbe yurp bwore ŋumwaiye yotop lenge mitiŋ lalme.
15Taꞌe luku pe, pa sisyeme tuꞌe leꞌe, ŋaiye miyeꞌ ende ka ende hwap me yip pe, yukur pa tungwisme hwap kin, na pakai. Kut ŋoihmbwaip bumbe yip ka si el ŋaiye pa yende ŋoihmbwaip bwore yile yut yip tip lenge Kristen miyeꞌ tuweinge, topoꞌe lenge miyeꞌ tuweinge lalme.
16Yip pa yurp hriphrip nyermbe nyermbe.
17Nyermbe nyermbe ŋupe ŋau pa yisilihme Got.
18Ŋaimun bwore lakai pupwa ka ot me yip, kom nye nyermbe pa yininge wusyep yirisukwarme Got. Detale, Got si ŋasande yip miyeꞌ tuweinge ŋaiye yarp sehei me Jisas pe, pa junde yaŋah uku.
19Ŋupe ŋaiye Yohe Yirise ŋasande ka ende wah pe, yukur pa yuipe nih tikin Yohe Yirise.
20Topoꞌe prepwan ŋaiye pa tule lahmende ŋaiye yana yip wusyep profet.
21Te yiyarꞌe wusyep lalme. Wusyep ŋaiye bwore mise pe, pa yurpe, tu wusyep molohe pe, pa yusme.
22Yip pa yusme ŋaiye yende ŋaiꞌe ŋaiꞌe tetehei pupwa.
23Got, kin tehei ŋaiye yip yarp ŋoihmbwaip ŋumwaiye, topoꞌe kin nongohe hwap yip pe, kin ŋende yip tahar bwore prihe. Pe Got nalaŋatme yip kitikin. Bwore mise, kin bepeteme yipihinge, topoꞌe wahriꞌ yip, ŋaiye pa yurp bwore bwarme supule yil ŋembep kin ŋupe ŋaiye Lahmborenge Jisas Krais ka ot.
24Got si nalaŋatme yip miyeꞌ tuweinge kin bwore mise pe, se ka ungwisme yip tuꞌe ŋaiye yerkeime kin si ŋanange nange ka ende.
25Lenge toꞌ tatai poi, yisilihme Got me poi.
26Yirir lenge Kristen miyeꞌ tuweinge lalme.
27Ŋam misilihme yip nato naŋ tikin Krais ŋaiye pa jonose tup eꞌe yil lenge Kristen toꞌ tatai lalme.
28Ŋoih miꞌmiꞌ tikin Lahmborenge Jisas Krais sai topoꞌe yip.
