1Nao i, gio꞉ Ya꞉sulo꞉ mia꞉no꞉ ho꞉len o꞉lia꞉ ofa꞉si o꞉lia꞉yo꞉ a꞉na fa꞉la꞉doma꞉ibka꞉ a꞉la꞉bo꞉ gimo꞉wo꞉ mo꞉sa꞉sa꞉lima꞉no꞉.
2Mo꞉wo꞉, Alan e yakiyo꞉, afalo꞉ dian kalu ko꞉lo꞉ nululo꞉ yan aumb mia꞉ib a꞉la꞉bo꞉, gio꞉ o꞉ma asulufo꞉lab.
3Kaluka꞉isaleya꞉ sa꞉lakiyo꞉, “Nio꞉ hida꞉yo꞉wo꞉ aundo꞉ma, ga꞉li so꞉l,” a꞉la꞉sa꞉la꞉li sen amio꞉, ilo꞉ mogagila꞉ma꞉no꞉wo꞉ wigibole a꞉naka fa꞉la꞉dowaki iligila꞉ma꞉ib ko꞉lo꞉, ga alela꞉sen a꞉ma꞉lo꞉ nagalo꞉ fa꞉la꞉dowan aumbo꞉ fa꞉la꞉doma꞉ib ko꞉lo꞉ kaluka꞉isale a꞉no꞉ mada mo꞉yamisuluma꞉ib.
4Ko꞉sega nao i, gio꞉ sololiya saba ko꞉lo꞉, ho꞉len a꞉no꞉ fa꞉la꞉dowalikiyo꞉, gio꞉ afalo꞉ dian kalu yab amilo꞉ iligan aumbo꞉ mo꞉iligima꞉ib.
5Gio꞉ tambo ho꞉lena꞉ so꞉wa ko꞉lo꞉ ho꞉len usa a꞉lab. Nio꞉ sololi o꞉lia꞉ nulu dowab a꞉ma꞉ so꞉wama.
6A꞉la꞉fo꞉ko꞉lo꞉ kalu nolo꞉ ko꞉lo꞉ alifo꞉lab o꞉leaumbo꞉, nio꞉ mo꞉dimidama꞉niki. Ko꞉sega nio꞉ sikaga siliki, ninina꞉ma꞉la꞉yo꞉ tilidoma꞉niki.
7Mo꞉wo꞉ alilan o꞉lia꞉ aluna꞉ ho꞉no꞉ nakilo꞉ no꞉no꞉lan man a꞉no꞉lia꞉yo꞉, nulu a꞉na dimidan.
8Ko꞉sega nio꞉ ho꞉lena꞉ so꞉wa ko꞉lo꞉ ninina꞉ma꞉la꞉yo꞉ tilidoma꞉niki. Kaluwa꞉lo꞉ bio꞉ ta꞉lian aumbo꞉, niliyo꞉ nol o꞉lia꞉yo꞉ ha꞉fo꞉ disa꞉laki, tilidabuwo꞉ dinafa ta꞉lia꞉niki. A꞉la꞉ta꞉ga꞉ Godeya꞉lo꞉ nilo꞉ gasilia꞉no꞉ a꞉no꞉ hendele fa꞉la꞉doma꞉ib a꞉la꞉bo꞉ asula꞉liki yasilima꞉niki.
9Godeya꞉yo꞉ nio꞉ Ene kulufa꞉yo꞉wa꞉lo꞉ falasila꞉ma꞉no꞉ a꞉no꞉ dima꞉ki da꞉feyo꞉ma. Ko꞉sega Godeya꞉yo꞉ nio꞉ gasiliakiyo꞉, Alan Ya꞉su Kelisowa a꞉la꞉ta꞉ga꞉ ene mela꞉no꞉wo꞉ nimo꞉ dima꞉ki da꞉fe alifa꞉.
10Nio꞉ o꞉salikiyo꞉lo꞉, sowalikiyo꞉lo꞉ Ya꞉su o꞉lia꞉ mesea꞉kiyo꞉, Ya꞉su e ni asuwa꞉taki sowo꞉.
11A꞉la꞉fo꞉ko꞉lo꞉ gio꞉ o꞉gdo꞉ dimida꞉lab o꞉leaumbo꞉, gegelebo꞉ asuwa꞉takiyo꞉, asulo꞉wo꞉ halale alita꞉lubi.
12Ni nao i, kaluka꞉isale gilo꞉ halaido꞉ asuwa꞉tab o꞉lia꞉, gili sa꞉s amilo꞉ bo꞉fo꞉lowan o꞉lia꞉, gi ko꞉lo꞉ hagugakilo꞉ digalo꞉ tolo꞉ sa꞉la꞉lab i a꞉no꞉, giliyo꞉ asulaki, a꞉ma꞉ ha꞉ga dowa꞉bi.
13Iliyo꞉ nanog halaido꞉ dimidabo꞉lo꞉b a꞉la꞉bo꞉, giliyo꞉ dinafa asula꞉sa꞉ga꞉, imo꞉wo꞉ ha꞉fo꞉wo꞉ disa꞉lakiyo꞉, ili ha꞉ga mada dowa꞉bi. A꞉la꞉ta꞉ga꞉ gio꞉ gegelebo꞉ ha꞉sa dowa꞉bi.
14Ni nao i, gio꞉ kaluka꞉isale bo꞉sulakilo꞉ sab imo꞉wo꞉ hagugubo꞉ sa꞉la꞉bi. Kaluka꞉isale tagilakilo꞉ sab i a꞉no꞉ halale alitaki, towo꞉ sa꞉la꞉lubi. Kaluka꞉isale halaido꞉lo꞉ mo꞉sab a꞉no꞉ asuwa꞉ta꞉bi. A꞉la꞉ta꞉ga꞉ kaluka꞉isale tambomo꞉wo꞉ ha꞉sa dowa꞉bi.
15Kaluka꞉isale nolba꞉yo꞉ man mogago꞉lo꞉ dimidab o꞉mo꞉wo꞉ wa꞉deabena꞉ki, gio꞉ ka꞉la꞉lubi. Ho꞉leno꞉ tambo gegelebo꞉lo꞉, ha꞉la꞉ kalumo꞉wo꞉lo꞉, tambo ha꞉fo꞉wo꞉ disa꞉la꞉lubi.
16Gio꞉ ho꞉leno꞉ tambo sagala꞉lubi. Godemo꞉wo꞉ dulugu sa꞉la꞉i ha꞉na꞉ mela꞉no꞉wo꞉ eda꞉so꞉bo.
18Gilo꞉ amio꞉ kelego꞉ ko꞉li ko꞉lilo꞉wo꞉ fa꞉la꞉dowalikiyo꞉, Godemo꞉wo꞉ mada o꞉m a꞉la꞉sa꞉la꞉lubi. Gio꞉ Ya꞉su Kelisowa dowakiyo꞉, Godeya꞉yo꞉ gio꞉ man o꞉leo꞉ngo꞉ ko꞉lo꞉ dimidama꞉ki asulab.
19Mamaya꞉lo꞉ nanog dimidama꞉no꞉ a꞉no꞉ de o꞉ngo꞉ ko꞉lo꞉ dalila꞉so꞉bo.
20Kaluka꞉isale abeyo꞉ Godeya꞉ wiya a꞉la꞉ta꞉ga꞉ dinali sa꞉lalikiyo꞉, gio꞉ to a꞉no꞉ da꞉ba꞉no꞉wo꞉ mo꞉bea꞉so꞉bo.
21To sa꞉lab a꞉no꞉ tambowo꞉ aloba꞉da꞉sa꞉ga꞉, nafa dowab a꞉no꞉ kudu ha꞉naki, man mogago꞉ a꞉no꞉ tambo tinia꞉i ha꞉na꞉lubi.
23Ha꞉salo꞉ dowan Gode eyo꞉ gio꞉ malilo꞉le tambo ta꞉fo꞉ melea꞉ki, dulugu so꞉lo꞉l. A꞉la꞉ta꞉ga꞉ Godeya꞉yo꞉ gili mela꞉no꞉ mama o꞉lia꞉ asulo꞉ o꞉lia꞉, do꞉mo꞉ o꞉lia꞉ma꞉yo꞉ man mogago꞉ mo꞉dimidama꞉ki ta꞉fo꞉ ha꞉na꞉la꞉ga꞉, Alan Ya꞉su Kelisolo꞉ yab amio꞉, hala dofo꞉leno꞉ mo꞉bo꞉ba꞉ki, dulugu so꞉lo꞉l.
24Gode gilo꞉ da꞉fe alita꞉lab a꞉ma꞉yo꞉, Ene dinali sio꞉ a꞉no꞉ hendele dimida꞉sen ko꞉lo꞉ Eyo꞉ mada dimidama꞉ib.
25Ni nao i, giliyo꞉ nio꞉ Godemo꞉ dulugu sa꞉la꞉biyo꞉.
26Gao nol o꞉lia꞉ sagale alitakiyo꞉, ebean aumbo꞉ mimila꞉bi.
27Alana꞉ wiya iliki, niyo꞉ to halaido꞉ we gimo꞉ so꞉lo꞉l ko꞉lo꞉ giliyo꞉ mo꞉fo꞉s sa꞉sa꞉lo꞉ we, Keliso kaluka꞉isale tambomo꞉wo꞉ agela꞉ mia꞉bi.
28Nili Alan, Ya꞉su Kelisowa꞉ ene kanulan man a꞉no꞉ gi o꞉lia꞉ dowa꞉biyo꞉.
