1Toranoo nggara ein! Ai ta parluu surak mafada mae, Lamatuak mamain naa, laꞌe liꞌu hida do bulak fain hida.
2Huu ei basa ngga bubuluk mae, Ndia mamain naa no kaiboik, sama leo naꞌo manu-meo mai nai fai hatun,
3boe ma hatahori noꞌuk kara ranggatuuk pasi-pasi ta no huu-heek, te medak neu ma hambu sosoek. Ndia mamain oo sama leo ina kairuk boe, fo medak neu nameda hedis nae bonggi ena. Mete ma basa iar dadi, na, ita ta tae timba henin talo bee bali! Lamatuak mamain oo leo naak boe.
4Toranoo nggara ein! Boso losak Ndia mamain naa, saꞌe laꞌe ei sama leo naꞌo manu-meo mai nai fati ladak, ndandaak ei sunggu seli. Ei boso leo naak! Ita ta leo-laꞌo nai makiuk-makahatuk dale, sama leo hatahori laen fo mana sunggu selik kara. Tehuu ita fo mana tamahere neu Yesus, leo-laꞌo nai manggaledok dale ena, tahehere fo simbok kana, ma tanea tatalolole ita aon. Ei bubuluk basa matak kara iar ena!
7Huu hatahori mana sungguk, nasiꞌe sunggu nai leꞌodaen. Ma hatahori mana mafuk, nasiꞌe mafu nai leꞌodaen.
8Tehuu ei boso talo naa, te ita iar leo-laꞌo nai manggaledok dale ena. Ei muste manea ei aom. Mete ma ei mamahere taa-taa neu Lamatuak ma esa sue esa, na, sama leo soldadu mana pake bua babata tendek. Mete ma ei mamahena taa-taa neu Lamatuak Yesus fo mana tao nasoi-nasoda ei numa Manetualain nasa-odadedein mai, sama leo soldadu mana suru langgan pake solangga besik.
9Manetualain ta here nala ita fo laꞌe tala Ndia huku-dokin. Tehuu Ana here nala ita fo hambu masoi-masodak, nahuu ita tamahere neu Yesus Karistus, ita Lamatuan.
10Ana mate ena fo nggati ita. Dadi neu faik fo Ana fali mai, ita tasoda takandoo toon, leo mae ita mate ena, do bei tasoda.
11Huu naa de pake au dedeꞌa-kokolang ia, fo kokoe-nanasi ma esa natetea esa, sama leo ei taok numa bakahulun mai.
12Toranoo nggara ein! Masaneda fo fee hada-horomatak neu ina-ama malangga saranik kara. Sira ndia raue-osa fafandek lima-ein nara ma fee nesenedak neu ei, mita fo ei boso tuda.
13Tia-tamba sara no ei susue-lalaim, nahuu sira raa raue-osa rahere soa-neu ei. Esa no esa leo-laꞌo no ndolu ma dame.
14Toranoo nggara ein! Bei ela dedeꞌak hida bali fo ai mae fee nesenedak neu ei talo ia: Mafada mbera-barek kara fo raue-osa tebe-tebe. Matetea dale mana monda-maꞌak kara. Masalaꞌe hatahori kadiꞌi anak kara. Ma makatataka mia basa hatahorir.
15Masaneda fo boso bala manggarauk no manggarauk. Tehuu maote tebe-tebe fo soa tao kada tatao-nonoꞌi neulauk neu basa hatahorir. Boso tao neulauk neu kada ita hatahorin mesa kasa, tehuu hatahori deak kara boe.
16Tao dalem namahoko taa-taa.
17Hule-haradoi hatu-leledon.
18Toke makasi neu Manetualain nai matak bee a mesan, leo mae susa, do nemehokok. Huu Manetualain hii basa hatahorir fo mana tungga Yesus Karistus tao leo naak.
19Boso tao kai-baak neu Manetualain Dula-dalen ue-osan.
20Mete ma hambu toranook esa nae, ndia simbo hara heheluk numa Manetualain mai, na, boso duꞌa mae, dedeꞌa-kokolan mudak ka!
21Tehuu ei muste parisa matalole hara heheluk naa nae, tebe do taa, ana naoka numa Manetualain mai. Mete ma tebe, na, tungga leo.
22Makaheok numa basa maggarauk ndendeen mai.
23Au hule-haradoi oke Manetualain nalalao ei dalem mara ma basa ei leleo-lalaꞌom mara. Ana ndia tao ita tandolu-dalek esa no esa. No dalak naa, neu ita Lamatuan Yesus Karistus fafalin, ei bisa mambariik miu matan no ei ao-inam, dalem ma samanem, ta no sala-singgok hata esa boe na. Tebe! Huu Lamatuak Yesus naa, dalen mahanik. Ana ndia noke nala ei dadi miu Ndia hatahorin. Hata fo Ana kokolak kana, na, ana tao natetun. De ita bubuluk tae, neu ko Ana nuni ei no lolo-laok meni Manetualain matan miu.
25Basa toranoo nggara ein! Boso lilii-ndondou hule-haradoi fee ai nai ia.
26Au oke fo ei haitua hara masodak fee basa Lamatuak saranin nara marai naa.
27Au oke no Lamatuak Yesus naden, fo ei lees au susurang ia, fee basa saranik kara lalaꞌen.
28Au hule neu ita Lamatuan Yesus Karistus, fo natudu dale susuen neu ei basa ngga. Baꞌu kada naa. Sodak-molek, Paulus
