1Âgofâc‐nane, dameŋte â ʒâfore dâŋ wemocte moc qâreŋke‐ŋarenaŋmu?
2Ŋaŋac ʒiŋuc sâcne manaŋgopieŋ: Râsi jaŋe ŋafeo ututuŋ fisieŋgopieŋ, iŋuc jaha dameŋ‐ticne ɋeŋfâfâc jaha maickeocmu.
3Eme ŋic jaŋe aki wama sâko fokac muhuc mana fâserâ juhapie wiac hâhâwicnezi acmâc jaha fisi‐jareocmu. Ŋokac kiwechec moc e gozi onʒoŋ jaha kime fâfâreocmu, iŋuc jaha ŋic iŋucne jaŋe wiac onʒoŋ jaha fua‐jareme wemocko moc wiseniŋmu.
4Âgofâc, ŋoŋe ine dapâcko mi juŋgopieŋ, irec wemocko Wofuŋte dameŋzi râsi iŋucne erâ ututuŋ maic‐ŋopame bipic tatara eniŋmu.
5Ŋoŋe tatamacte â ʒoaŋte kikefuŋ ekicne, nâŋâc ŋafere me dapâcte biŋe aricne.
6Irec ŋic gâcnezi guŋ fopie qâtec‐joparâ guŋ mi fonʒepeneŋ, rucgereŋ‐nâŋec bahuc maŋte sowa junʒepeneŋ.
7Guŋ fofo jaŋe ŋafeo foeŋgopieŋ â gae wowo jaŋe ŋafeo wohuc bâbâsifuc bâfuaeŋgopieŋ.
8Ʒoaŋte biŋe ekicne nâŋâc ine maŋte sowa junʒepeneŋ, ehuc mamanasiŋ â maŋjauŋ izi maruku enârezejec, â bâbâpiaŋte woworiczi dunâŋec ezejec.
9I ʒiŋucte: Anutu e kimbeŋ‐ticnere fârine hotâckenaŋte mâcne, Wofuŋ‐nâŋec Jesu Kristore erâ bâbâpiaŋ rauckenaŋte muekac.
10E hâcne okac‐nâŋec hâmowec, i hâmohuc me ɋâricne juhuc ehec mâmâc junaŋte iŋuc ewec.
11Ŋoŋe irec hâcne faŋ qaqac â hehe ʒakiec eeŋgopieŋ iŋuc jaha ehuc junʒepieŋ.
12Âgo bureŋ, wiac mocte esoc‐ŋopaŋgopeneŋ: Ŋoŋerao ʒâic gie baeŋgopieŋ â Wofuŋte erâ micne baŋareeŋgopieŋ â mu bâtiŋ eŋareŋgopieŋ i jaŋe sâsec‐jopanʒepieŋ.
13Ehuc gie‐jeŋicte erâ maŋjauŋ ejarehuc mana‐jarepie fehâmbâŋkezejec. Erâ wâc wama qaqac ehuc junʒepieŋ.
14Âgofâc, hazec qâuŋ dâŋ moc ŋazape mananiŋ. Ŋic kosa jujune jaŋe uŋ sawaŋ ejarenʒepieŋ, ŋic manabâcne jaŋe mu âkeriŋ ejarenʒepieŋ, bataŋkekicne jaŋe dopec‐jopanʒepieŋ, erâ mâmâc hezu hemiriŋ ejarenʒepieŋ.
15Sâqocnere okac babazuc enʒipiŋte sosoŋaŋ enʒepieŋ. Ŋaŋackoaŋ â ŋic gâcne sasawa jaŋehec eehâmoc erâ erahuc junʒepieŋ.
16Bubiaŋ faio jurâ jurahuc junʒepieŋ.
17Nunumu moc mi hetaranʒepieŋ.
18Wiac irec me irec daŋge mumuteŋ enʒepieŋ, i Kristo Jesure erâ eniŋte Anutuzi muŋarekac.
19Mârore ʒoc mi hehâponʒepieŋ.
20Anuture micdâŋ mufua‐ŋarepie mana qâoma mi enʒepieŋ.
21Dâŋ sasawa mana wosâerâ bâtâc banʒepieŋ, â biaŋne eme bajunʒepieŋ.
22Sâqocne fuŋne fuŋne ine qikiŋnenʒepieŋ.
23Anutu wama rune e jahac ʒure bâpiaŋ eŋareme maŋfuru ejâmbâŋkenʒepieŋ, eme mâro â maŋ qâqâtâc â sahac‐ŋeŋic furu fohame Wofuŋ‐nâŋec Jesu Kristo ere fifisi dameŋko bahacmâc domanʒepieŋ.
24Hefârec‐ŋopakac e mume sasanaŋ, irec gie‐ticne baku batarocmu.
25Âgofâc, ŋoŋe nâŋere erâ numunʒepieŋ.
26Opâ ruac ŋoŋe mitio meo babac efârenʒepieŋ.
27No Wofuŋte maio ŋaza sanaŋkepe: Ŋoŋe papia kecʒi opâ ruac mâmâc sasawa wose‐jarepie mananʒepieŋ.
28Wofuŋ‐nâŋec Jesu Kristo ere aki anonoczi ŋoŋerao fotâcnerâ fozejec.
